Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 3891

Click on a sentence to show its analysis
Keep the mouse pointer over a lemma to show its meanings.

yudhiṣṭhira uvāca / (1.1) Par.?

kasminkalpe mahābhāgā narmadeyaṃ dvijottama / (1.2) Par.?

vibhaktā ṛṣibhiḥ sarvaistapoyuktairmahātmabhiḥ // (1.3) Par.?

etadvistarataḥ sarvaṃ brūhi me vadatāṃ vara / (2.1) Par.?

kalpānte yadbhavetkaṣṭaṃ lokānāṃ tattvameva ca // (2.2) Par.?

atīte tu purā kalpe yatheyaṃ vartate 'nagha / (3.1) Par.?

asyāntyasya ca kalpasya vyavasthāṃ kathaya prabho / (3.2) Par.?

evamuktaḥ sabhāmadhye mārkaṇḍo vākyamabravīt // (3.3) Par.?

mārkaṇḍeya uvāca / (4.1) Par.?

vakṣye 'haṃ śrūyatāṃ sarvaiḥ katheyaṃ pūrvataḥ śrutā // (4.2) Par.?

mahatkatheyaṃ vaiśiṣṭī kalpādasmātparaṃ tu yā / (5.1) Par.?

lokakṣayakaro ghora āsītkālaḥ sudāruṇaḥ // (5.2) Par.?

tasminnapi mahāghore yatheyaṃ vā mṛtā satī / (6.1) Par.?

parituṣṭairvibhaktā ca śṛṇudhvaṃ tāṃ kathāmimām // (6.2) Par.?

yugānte samanuprāpte pitāmahadinatraye / (7.1) Par.?

mānasā brahmaṇaḥ putrāḥ sākṣādbrahmeva sattamāḥ // (7.2) Par.?

sanakādyā mahātmāno ye ca vaimānikā gaṇāḥ / (8.1) Par.?

yamendravaruṇādyāśca lokapālā dinatraye // (8.2) Par.?

kālāpekṣāstu tiṣṭhanti lokavṛttāntatatparāḥ / (9.1) Par.?

tataḥ kalpakṣaye prāpte teṣāṃ jñānamanuttamam // (9.2) Par.?

sarveṣāṃ naśyate cāyuryugarūpānusārataḥ / (10.1) Par.?

bhūrlokaṃ te parityajya agamaṃśca bhuvaṃ tadā // (10.2) Par.?

svarlokaṃ ca mahaścaiva janaścaiva tapastadā / (11.1) Par.?

āśrayaṃ satyalokaṃ ca sarvalokamanuttamam // (11.2) Par.?

kālaṃ yugasahasrāntaṃ putrapautrasamanvitāḥ / (12.1) Par.?

satyaloke ca tiṣṭhanti yāvatsaṃjāyate jagat // (12.2) Par.?

brahmaputrāśca ye kecitkalpādau na bhavanti ha / (13.1) Par.?

trailokyaṃ te parityajya anādhāraṃ bhavanti ca // (13.2) Par.?

taiḥ sārdhaṃ ye tu te viprā anye cāpi tapodhanāḥ / (14.1) Par.?

yakṣarakṣaḥpiśācāśca anye vaimānikā gaṇāḥ // (14.2) Par.?

ṛṣayaśca mahābhāgā varṇāścānye pṛthagvidhāḥ / (15.1) Par.?

sīdanti bhūmyāṃ sahitā ye cānye talavāsinaḥ // (15.2) Par.?

anāvṛṣṭirabhūttatra mahatī śatavārṣikī / (16.1) Par.?

lokakṣayakarī raudrā vṛkṣavīrudvināśinī // (16.2) Par.?

trailokyasaṃkṣobhakarī saptārṇavaviśoṣaṇī / (17.1) Par.?

tato lokāḥ kṣudhāviṣṭā bhramantīva diśo daśa // (17.2) Par.?

kaṃdairmūlaiḥ phalairvāpi vartayante suduḥkhitāḥ / (18.1) Par.?

saritaḥ sāgarāḥ kūpāḥ sevante pāvanāni ca // (18.2) Par.?

tatrāpi sarve śuṣyanti saridbhiḥ saha sāgarāḥ / (19.1) Par.?

tato yānyalpasārāṇi sattvāni pṛthivītale // (19.2) Par.?

tānyevāgre pralīyante bhinnānyurujalena vai / (20.1) Par.?

atha saṃkṣīyamāṇāsu saritsu saha sāgaraiḥ // (20.2) Par.?

ṛṣīṇāṃ ṣaṣṭisāhasraṃ kurukṣetranivāsinām / (21.1) Par.?

ye ca vaikhānasā viprā dantolūkhalinastathā // (21.2) Par.?

himācalaguhāguhye ye vasanti tapodhanāḥ / (22.1) Par.?

sarve te māmupāgamya kṣuttṛṣārtāstapodhanāḥ // (22.2) Par.?

ūcuḥ prāñjalayaḥ sarve sīdayāmo mahāmune / (23.1) Par.?

saritsāgaraśailāntaṃ jagatsaṃśuṣyate dvija // (23.2) Par.?

kutra yāsyāma sahitā yāvatkālasya paryayaḥ / (24.1) Par.?

dīrghāyurasi viprendra na mṛtastvaṃ yugakṣaye // (24.2) Par.?

bhūtaṃ bhavyaṃ bhaviṣyacca sarvaṃ tava hṛdi sthitam / (25.1) Par.?

tasmāttvaṃ vetsi sarvaṃ ca kathayasva mahāvrata // (25.2) Par.?

kīdṛkkālaṃ mahābhāga kṣapiṣyāmo 'tha suvrata / (26.1) Par.?

anāvṛṣṭihataṃ sarvaṃ sīdate sacarācaram // (26.2) Par.?

paritrāhi mahābhāga na yathā yāma saṃkṣayam / (27.1) Par.?

tataḥ saṃcintya manasā tvaranviprān athābravam // (27.2) Par.?

kurukṣetraṃ tyajadhvaṃ ca putradārasamanvitāḥ / (28.1) Par.?

tyaktvodīcīṃ diśaṃ sarve yāmo yāmyāmanuttamām // (28.2) Par.?

nagaragrāmaghoṣāḍhyāṃ purapattanaśobhitām / (29.1) Par.?

gacchāmo narmadātīraṃ bahusiddhaniṣevitam // (29.2) Par.?

rudrāṅgīṃ tāṃ mahāpuṇyāṃ sarvapāpapraṇāśinīm / (30.1) Par.?

paśyāmastāṃ mahābhāgāṃ nyagrodhāvārasaṃkulām // (30.2) Par.?

māheśvarairbhāgavataiḥ sāṃkhyaiḥ siddhaiḥ susevitām / (31.1) Par.?

anāvṛṣṭibhayādbhītāḥ kūlayorubhayorapi // (31.2) Par.?

āśrame hyāśramāndivyānkārayāmo jitavratāḥ / (32.1) Par.?

evamuktāstu te sarve sametānucaraiḥ saha // (32.2) Par.?

narmadātīramāsādya sthitāḥ sarve 'kutobhayāḥ / (33.1) Par.?

kiṃcit pūrvam anusmṛtya purā kalpādibhirbhayam // (33.2) Par.?

prāptāstu narmadātīramādāveva kalau yuge / (34.1) Par.?

tato varṣaśataṃ pūrṇaṃ divyaṃ revātaṭe 'vasan // (34.2) Par.?

ṣaḍviṃśacca sahasrāṇi varṣāṇāṃ mānuṣāṇi ca / (35.1) Par.?

tatrāścaryaṃ mayā dṛṣṭamṛṣīṇāṃ vasatāṃ nṛpa // (35.2) Par.?

anāvṛṣṭihate loke saṃśuṣke sthāvare care / (36.1) Par.?

bhinne yugādikalane hāhābhūte vicetane // (36.2) Par.?

cāturvarṇe pralīne tu naṣṭe homabalikrame / (37.1) Par.?

niḥsvāhe nirvaṣaṭkāre śaucācāravivarjite // (37.2) Par.?

iyamekā saricchreṣṭhā ṛṣikoṭiniṣevitā / (38.1) Par.?

nānyā kācittriloke 'pi ramaṇīyā nareśvara // (38.2) Par.?

yatheyaṃ puṇyasalilā indrasyevāmarāvatī / (39.1) Par.?

devatāyatanaiḥ śubhrairāśramaiśca sukalpitaiḥ // (39.2) Par.?

śobhate narmadā devī svarge mandākinī yathā / (40.1) Par.?

yāvadvṛkṣā mahāśailā yāvatsāgarasaṃbhavā // (40.2) Par.?

ubhayoḥ kūlayos tāvan maṇḍitāyatanaiḥ śubhaiḥ / (41.1) Par.?

hūyadbhir agnihotraiśca havirdhūmasamākulā // (41.2) Par.?

babhūva narmadā devī prāvṛṭkāla iva śarvarī / (42.1) Par.?

devatāyatanairnaikaiḥ pūjāsaṃskāraśobhitā // (42.2) Par.?

saridbhirbhrājate śreṣṭhā purī śākrī ca bhāskarī / (43.1) Par.?

kecitpañcāgnitapasaḥ kecidapyagnihotriṇaḥ // (43.2) Par.?

kecid dhūmakamaśnanti tapasyugre vyavasthitāḥ / (44.1) Par.?

ātmayajñaratāḥ kecidapare bhaktibhāginaḥ // (44.2) Par.?

vaiṣṇavajñānam āsādya kecicchaivaṃ vrataṃ tathā / (45.1) Par.?

ekarātraṃ dvirātraṃ ca kecitṣaṣṭhāhabhojanāḥ // (45.2) Par.?

cāndrāyaṇavidhānaiśca kṛcchriṇaścātikṛcchriṇaḥ / (46.1) Par.?

evaṃvidhaistapobhiśca narmadātīraśobhitaiḥ // (46.2) Par.?

yajadbhiḥ śaṃkaraṃ devaṃ keśavaṃ bhāti nityadā / (47.1) Par.?

ekatve ca pṛthaktve ca yajatāṃ ca maheśvaram // (47.2) Par.?

kalau yuge mahāghore prāptāḥ siddhimanuttamām / (48.1) Par.?

yasya yasya hi yā bhaktirvijñānaṃ yasya yādṛśam // (48.2) Par.?

yasminyasmiṃśca deve tu tāṃtāmīśo 'dadātprabhuḥ / (49.1) Par.?

svabhāvaikatayā bhaktyā tāmetyāntaḥ pralīyate // (49.2) Par.?

saṃsāre parivartante ye pṛthagbhājino narāḥ / (50.1) Par.?

ye mahāvṛkṣamīśānaṃ tyaktvā śākhāvalambinaḥ // (50.2) Par.?

punarāvartamānāste jāyante hi caturyuge / (51.1) Par.?

devānte sthāvarānte ca saṃsāre cābhramankramāt // (51.2) Par.?

punarjanma punaḥ svarge punarghore ca raurave / (52.1) Par.?

ye punardevamīśānaṃ bhavaṃ bhaktisusaṃsthitāḥ // (52.2) Par.?

yajanti narmadātīre na punaste bhavanti ca / (53.1) Par.?

ā dehapatanāt kecid upāsantaḥ paraṃ gatāḥ // (53.2) Par.?

keciddvādaśabhirvarṣaiḥ ṣaḍbharanye tapodhanāḥ / (54.1) Par.?

tribhiḥ saṃvatsaraiḥ kecitkecitsaṃvatsareṇa tu // (54.2) Par.?

ṣaḍbhirmāsaistu saṃsiddhās tribhir māsais tathāpare / (55.1) Par.?

munayo devamāśritya narmadāṃ ca yaśasvinīm // (55.2) Par.?

chittvā saṃsāradoṣāṃśca agamanbrahma śāśvatam / (56.1) Par.?

evaṃ kaliyuge ghore śataśo 'tha sahasraśaḥ // (56.2) Par.?

narmadātīramāśritya munayo rudramāviśan // (57.1) Par.?

ye narmadātīramupetya viprāḥ śaive vrate yatnam upaprapannāḥ / (58.1) Par.?

trikālam ambhaḥ pravigāhya bhaktyā devaṃ samabhyarcya śivaṃ vrajanti // (58.2) Par.?

dhyānārcanairjāpyamahāvrataiśca nārāyaṇaṃ vā satataṃ smaranti / (59.1) Par.?

te dhautapāṇḍurapaṭā iva rājahaṃsāḥ saṃsārasāgarajalasya taranti pāram // (59.2) Par.?

satyaṃ satyaṃ punaḥ satyamutkṣipya bhujam ucyate / (60.1) Par.?

idamekaṃ suniṣpannaṃ dhyeyo nārāyaṇaḥ sadā // (60.2) Par.?

yo vā haraṃ pūjayate jitātmā māsaṃ ca pakṣaṃ ca vasennarendra / (61.1) Par.?

revāṃ samāśritya mahānubhāvaḥ sa devadevo 'tha bhavetpinākī // (61.2) Par.?

kīṭāḥ pataṃgāśca pipīlikāśca ye vai mriyante 'mbhasi narmadāyāḥ / (62.1) Par.?

te divyarūpāstu kulaprasūtāḥ śataṃ samā dharmaparā bhavanti // (62.2) Par.?

kālena vṛkṣāḥ prapatanti ye 'pi mahātaraṃgaughanikṛttamūlāḥ / (63.1) Par.?

te narmadāṃbhobhirapāstapāpā dedīpyamānāstridivaṃ prayānti // (63.2) Par.?

akāmakāmāśca tathā sakāmā revāntam āśritya mriyanti tīre / (64.1) Par.?

jaḍāndhamūkās tridivaṃ prayānti kimatra viprā bhavabhāvayuktāḥ // (64.2) Par.?

māsopavāsairapi śoṣitāṅgā na tāṃ gatiṃ yānti vimuktadehāḥ / (65.1) Par.?

mriyanti revājalapūtakāyāḥ śivārcane keśavabhāvayuktāḥ // (65.2) Par.?

nīvāraśyāmākayaveṅgudādyair anyair munīndrā iha vartayanti / (66.1) Par.?

āpritya kūlaṃ tridaśānugītaṃ te narmadāyā na viśanti mṛtyum // (66.2) Par.?

bhramanti ye tīramupetya devyās trikāladevārcanasatyapūtāḥ / (67.1) Par.?

viṇmūtracarmāsthitiropadhānāḥ kukṣau yuvatyā na vasanti bhūyaḥ // (67.2) Par.?

kiṃ yajñadānairbahubhiśca teṣāṃ niṣevitaistīrthavaraiḥ samastaiḥ / (68.1) Par.?

revātaṭaṃ dakṣiṇamuttaraṃ vā sevanti te rudracarānupūrvam // (68.2) Par.?

te vañcitāḥ paṅgujaḍāndhabhūtā lokeṣu martyāḥ paśubhiśca tulyāḥ / (69.1) Par.?

ye nāśritā rudraśarīrabhūtāṃ sopānapaṅktiṃ tridivasya revām // (69.2) Par.?

yugaṃ kaliṃ ghoramimaṃ ya iccheddraṣṭuṃ kadācinna punar dvijendraḥ / (70.1) Par.?

sa narmadātīramupetya sarvaṃ sampūjayet sarvavimuktasaṃgaḥ // (70.2) Par.?

vighnair anekair atiyojyamānā ye tīram ujhanti na narmadāyāḥ / (71.1) Par.?

te caiva sarvasya hitārthabhūtā vandyāśca te sarvajanasya mānyāḥ // (71.2) Par.?

bhṛgvatrigārgeyavaśiṣṭhakaṅkāḥ śataiḥ sametair niyatās tvasaṃkhyaiḥ / (72.1) Par.?

siddhiṃ parāṃ te hi jalaplutāṅgāḥ prāptāstu lokānmarutāṃ na cānye // (72.2) Par.?

jñānaṃ mahatpuṇyatamaṃ pavitraṃ paṭhantyado nityaviśuddhasattvāḥ / (73.1) Par.?

gatiṃ parāṃ yānti mahānubhāvā rudrasya vākyaṃ hi yathā pramāṇam // (73.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe narmadāmāhātmye narmadāsnānaphalaśrutikathanaṃ nāma daśamo'dhyāyaḥ // (74.1) Par.?

Duration=0.73888778686523 secs.