Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 3919

Click on a sentence to show its analysis
Keep the mouse pointer over a lemma to show its meanings.

śrīmārkaṇḍeya uvāca / (1.1) Par.?

tato gaccheta rājendra guhāvāsīti cottamam / (1.2) Par.?

yatra siddho mahādevo guhāvāsī samārbudam // (1.3) Par.?

yudhiṣṭhira uvāca / (2.1) Par.?

kena kāryeṇa bho tāta mahādevo jagadguruḥ / (2.2) Par.?

guhāyām anayatkālaṃ sudīrghaṃ dvijasattama // (2.3) Par.?

etadvistarataḥ sarvaṃ kathayasva mamānagha / (3.1) Par.?

śrotumicchāmyahaṃ sarvaparaṃ kautūhalaṃ hi me // (3.2) Par.?

mārkaṇḍeya uvāca / (4.1) Par.?

sādhu praśno mahārāja pṛṣṭo yo vai tvayottamaḥ / (4.2) Par.?

purāṇe vistaro hyasya na śakyo hi mayādhunā // (4.3) Par.?

kathituṃ vṛddhabhāvatvādatīto bahukālikaḥ / (5.1) Par.?

saṃkṣepāt tena te tāta kathayāmi nibodha me // (5.2) Par.?

purā kṛtayuge rājannāsīd dāruvanaṃ mahat / (6.1) Par.?

nānādrumalatākīrṇaṃ nānāvallyupaśobhitam // (6.2) Par.?

siṃhavyāghravarāhaiśca gajaiḥ khaḍgairniṣevitam / (7.1) Par.?

bahupakṣiyutaṃ divyaṃ yathā caitrarathaṃ vanam // (7.2) Par.?

tatra kecin mahāprājñā vasanti saṃśitavratāḥ / (8.1) Par.?

vasanti parayā bhaktyā caturāśramabhāvitāḥ // (8.2) Par.?

brahmacārī gṛhasthaśca vānaprastho yatis tathā / (9.1) Par.?

svadharmaniratāḥ sarve vāñchantaḥ paramaṃ padam // (9.2) Par.?

tāvadvasantasamaye kasmiṃścit kāraṇāntare / (10.1) Par.?

vimānastho mahādevo gacchanvai hyumayā saha // (10.2) Par.?

dadarśa toya āvāsamṛksāmayajurnāditam / (11.1) Par.?

alakṣyāgatanirgamyaṃ sarvapāpakṣayaṃkaram // (11.2) Par.?

taṃ dṛṣṭvā muditā devī harṣagaṅgadayā girā / (12.1) Par.?

papraccha devadeveśaṃ śaśāṅkakṛtabhūṣaṇam // (12.2) Par.?

devyuvāca / (13.1) Par.?

kasyāyamāśramo deva vedadhvaninināditaḥ / (13.2) Par.?

yaṃ dṛṣṭvā kṣutpipāsādyaiḥ śramaiśca parihīyate // (13.3) Par.?

maheśvara uvāca / (14.1) Par.?

kiṃ tvayā na śrutaṃ devi mahādāruvanaṃ mahat / (14.2) Par.?

bahuviprajano yatra gṛhadharmeṇa vartate // (14.3) Par.?

atra yaḥ strījanaḥ kaścid bhartṛśuśrūṣaṇe rataḥ / (15.1) Par.?

nānyo devo na vai dharmo jñāyate śailanandini // (15.2) Par.?

etacchrutvā paraṃ vākyaṃ devadevena bhāṣitam / (16.1) Par.?

kautūhalasamāviṣṭā śaṅkaraṃ punarabravīt // (16.2) Par.?

yattvayoktaṃ mahādeva patidharmaratāḥ striyaḥ / (17.1) Par.?

tāsāṃ tvaṃ madano bhūtvā cāritraṃ kṣobhaya prabho // (17.2) Par.?

īśvara uvāca / (18.1) Par.?

yattvayoktaṃ ca vacanaṃ na hi me rocate priye / (18.2) Par.?

brāhmaṇā hi mahadbhūtaṃ na caiṣāṃ vipriyaṃ caret // (18.3) Par.?

manyupraharaṇā viprāścakrapraharaṇo hariḥ / (19.1) Par.?

cakrātkrūrataro manyus tasmād vipraṃ na kopayet // (19.2) Par.?

na te devā na te lokā na te nagā na cāsurāḥ / (20.1) Par.?

dṛśyante triṣu lokeṣu ye tairdṛṣṭair na nāśitāḥ // (20.2) Par.?

teṣāṃ mokṣas tathā svargo bhūmirmartye phalāni ca / (21.1) Par.?

yeṣāṃ tuṣṭā mahābhāgā brāhmaṇāḥ kṣitidevatāḥ // (21.2) Par.?

evaṃ jñātvā mahābhāge asadgrāhaṃ parityaja / (22.1) Par.?

tatra loke viruddhaṃ vai kupyante yena vai dvijāḥ // (22.2) Par.?

devyuvāca / (23.1) Par.?

nāhaṃ te dayitā deva nāhaṃ te vaśavartinī / (23.2) Par.?

akṛtvādhaśva vai tāsāṃ mānaṃ surasupūjitam // (23.3) Par.?

lokaloke mahādeva aśakyaṃ nāsti te prabho / (24.1) Par.?

kriyatāṃ mama caivaikam etat kāryaṃ surottama // (24.2) Par.?

evamukto mahādevo devyā vākyahite rataḥ / (25.1) Par.?

kṛtvā kāpālikaṃ rūpaṃ yayau dāruvanaṃ prati // (25.2) Par.?

mahāhitajaṭājūṭaṃ niyamya śaśibhūṣaṇam / (26.1) Par.?

kaṇṭhatrāṇaṃ paraṃ kṛtvā dhārayan karṇakuṇḍale // (26.2) Par.?

vyāghracarmaparīdhāno mekhalāhārabhūṣitaḥ / (27.1) Par.?

nūpuradhvaninighoṣaiḥ kampayan vai vasuṃdharām // (27.2) Par.?

mahānūrddhvajaṭāmālī kṛttibhasmānulepanaḥ / (28.1) Par.?

kṛtvā haste kapālaṃ tu brahmaṇaśca mahātmanaḥ // (28.2) Par.?

mahāḍamarughoṣeṇa kampayan vai vasuṃdharām / (29.1) Par.?

prabhātasamaye prāpto mahādāruvanaṃ prati // (29.2) Par.?

tāvat puṇyajanaḥ sarvapuṣpapatraphalārthikaḥ / (30.1) Par.?

nirgato bahubhiḥ sārddhaṃ pavamānaḥ samantataḥ // (30.2) Par.?

tad dṛṣṭvā mahadāścaryaṃ rūpaṃ devasya bhārata / (31.1) Par.?

yuvatīnāṃ manas tāsāṃ kāmena kaluṣīkṛtam // (31.2) Par.?

śobhanaṃ puruṣaṃ dṛṣṭvā sarvā api varāṅganāḥ / (32.1) Par.?

kledabhāvaṃ tato jagmurmudā dāruvanastriyaḥ // (32.2) Par.?

vikārā bahavastāsāṃ devaṃ dṛṣṭvā mahādbhutam / (33.1) Par.?

saṃjātā viprapatnīnāṃ tadā tāsu narottama // (33.2) Par.?

paridhānaṃ na jānanti kāścid dṛṣṭvā varāṅganāḥ / (34.1) Par.?

uttarīyaṃ tathā cānyā mahāmohasamanvitāḥ // (34.2) Par.?

keśabhāraparibhraṣṭā kācidevāsanotthitā / (35.1) Par.?

dātukāmā tadā bhaikṣyaṃ ceṣṭituṃ naiva cāśakat // (35.2) Par.?

kācid dṛṣṭvā mahādevaṃ rūpayauvanagarvitā / (36.1) Par.?

utsaṅge saṃsthitaṃ bālaṃ vismṛtā pāyitum stanam // (36.2) Par.?

kāmabāṇahatā cānyā bāhubhyāṃ pīḍya sustanau / (37.1) Par.?

niḥśvasantī tadā coṣṇaṃ na kiṃcit pratijalpati // (37.2) Par.?

evaṃ saṃkṣobhya taṃ sarvaṃ strījanaṃ parameśvaraḥ / (38.1) Par.?

jagāma tatra vai tāsāṃ kṣobhaṃ kṛtvā mahādbhutam // (38.2) Par.?

tāvat te brāhmaṇāḥ sarve bhramitvā kānanaṃ mahat / (39.1) Par.?

āgatāḥ svagṛhe dārān dadṛśuś ca hataujasaḥ // (39.2) Par.?

yāsāṃ pūrvatarā bhaktiḥ pātivratye patīnprati / (40.1) Par.?

calitāstā viditvāśu nirjagmurdvijasattamāḥ // (40.2) Par.?

saṃvidaṃ paramāṃ kṛtvā jñātvā devaṃ maheśvaram / (41.1) Par.?

kṣobhayitvā manastāsāṃ tataścādarśanaṃ gatam // (41.2) Par.?

krodhāviṣṭo dvijaḥ kaścid daṇḍamudyamya dhāvati / (42.1) Par.?

kalmāṣayaṣṭimanye ca tathānye darbhamuṣṭikām // (42.2) Par.?

itaścetaśca te sarve bhramitvā kānanaṃ nṛpa / (43.1) Par.?

ekībhūtvā mahātmāno vyājahruśca ruṣā giram // (43.2) Par.?

yad idaṃ ca hutaṃ kiṃcid guravas toṣitā yadi / (44.1) Par.?

tena satyena devasya liṅgaṃ patatu cottamam // (44.2) Par.?

āśramād āśramaṃ sarve na tyajāmo vidhikramāt / (45.1) Par.?

tena satyena devasya liṅgaṃ patatu bhūtale // (45.2) Par.?

evaṃ satyaprabhāvena triruktena dvijanmanām / (46.1) Par.?

śivasya paśyato liṅgaṃ patitaṃ dharaṇītale // (46.2) Par.?

hāhākāro mahānāsīllokāloke 'pi bhārata / (47.1) Par.?

devasya patite liṅge jagataśca mahākṣaye // (47.2) Par.?

patamānasya liṅgasya śabdo 'bhūcca sudāruṇaḥ / (48.1) Par.?

ulkāpātā diśāṃ hāhā bhūmikampāśca dāruṇāḥ // (48.2) Par.?

patanti parvatāgrāṇi śoṣaṃ yānti ca sāgarāḥ / (49.1) Par.?

devasya patite liṅge devā vimanaso 'bhavan // (49.2) Par.?

sametya sahitāḥ sarve brahmāṇaṃ parameṣṭhinam / (50.1) Par.?

kṛtāñjalipuṭāḥ sarve stuvanti vividhaiḥ stavaiḥ // (50.2) Par.?

tatas tuṣṭo jagannāthaś caturvadanapaṅkajaḥ / (51.1) Par.?

ārtānprāha surānsarvānmā viṣādaṃ gamiṣyatha // (51.2) Par.?

brahmaśāpābhibhūto 'sau devadevastrilocanaḥ / (52.1) Par.?

tuṣṭaistaistapasā yuktaiḥ punarmokṣaṃ gamiṣyati // (52.2) Par.?

etacchrutvā yayurdevā yathāgatamarindama / (53.1) Par.?

bhāvayitvā tataḥ sarve munayaścaiva bhārata // (53.2) Par.?

viśvāmitravasiṣṭhādyā jābāliratha kaśyapaḥ / (54.1) Par.?

sametya sahitāḥ sarve tamūcus tripurāntakam // (54.2) Par.?

brahmatejo hi balavaddvijānāṃ hi sureśvara / (55.1) Par.?

kṣāntiyuktastapastaptvā bhaviṣyasi gataklamaḥ // (55.2) Par.?

yataḥ kṣobhādṛṣīṇāṃ ca tadevaṃ liṅgamuttamam / (56.1) Par.?

patitaṃ te mahādeva na tatpūjyaṃ bhaviṣyati // (56.2) Par.?

na tacchreyo 'gnihotreṇa nāgniṣṭomena labhyate / (57.1) Par.?

prāpnuvanti ca yacchreyo mānavā liṅgapūjane // (57.2) Par.?

devadānavayakṣāṇāṃ gandharvoragarakṣasām / (58.1) Par.?

vacanena tu viprāṇām etat pūjyaṃ bhaviṣyati // (58.2) Par.?

brahmaviṣṇvindracandrāṇām etat pūjyaṃ bhaviṣyati / (59.1) Par.?

yatphalaṃ tava liṅgasya iha loke paratra ca // (59.2) Par.?

evamukto jagannāthaḥ praṇipatya dvijottamān / (60.1) Par.?

mudā paramayā yuktaḥ kṛtāñjalir abhāṣata // (60.2) Par.?

brāhmaṇā jaṅgamaṃ tīrthaṃ nirjalaṃ sārvakāmikam / (61.1) Par.?

yeṣāṃ vākyodakenaiva śudhyanti malino janāḥ // (61.2) Par.?

na tatkṣetraṃ na tattīrthamūṣaraṃ puṣkarāṇi ca / (62.1) Par.?

brāhmaṇe manyumutpādya yatra gatvā sa śudhyati // (62.2) Par.?

na tacchāstraṃ yanna viprapraṇītaṃ na tad dānaṃ yanna viprapradeyam / (63.1) Par.?

na tatsaukhyaṃ yannavipraprasādānna tadduḥkhaṃ yanna vipraprakopāt // (63.2) Par.?

pṛthivyāṃ yāni tīrthāni gaṅgādyāḥ saritas tathā / (64.1) Par.?

ekasya vipravākyasya kalāṃ nārhanti ṣoḍaśīm // (64.2) Par.?

abhinandya dvijānsarvānanujñāto maharṣibhiḥ / (65.1) Par.?

tato 'gamat tadā devo narmadātaṭamuttamam // (65.2) Par.?

paramaṃ vratamāsthāya guhāvāsī samārbudam / (66.1) Par.?

tapaścacāra bhagavāñjapasnānarataḥ sadā // (66.2) Par.?

samāpte niyame tāta sthāpayitvā maheśvaram / (67.1) Par.?

vandyamānaḥ suraiḥ sārddhaṃ kailāsamagamat prabhuḥ // (67.2) Par.?

narmadāyās taṭe tena sthāpitaḥ parameśvaraḥ / (68.1) Par.?

tenaiva kāraṇenāsau narmadeśvara ucyate // (68.2) Par.?

yo 'rcayennarmadeśānaṃ yatir vai saṃjitendriyaḥ / (69.1) Par.?

snātvā caiva mahādevam aśvamedhaphalaṃ labhet // (69.2) Par.?

dadāti yaḥ pitṛbhyastu tilapuṣpakuśodakam / (70.1) Par.?

triḥsaptapūrvajāstasya svarge modanti pāṇḍava // (70.2) Par.?

yastu bhojayate viprāṃs tasmiṃstīrthe narādhipa / (71.1) Par.?

pāyasaṃ ghṛtamiśraṃ tu sa labhet koṭijaṃ phalam // (71.2) Par.?

suvarṇaṃ rajataṃ vāpi brāhmaṇebhyo yudhiṣṭhira / (72.1) Par.?

dadāti toyamadhyasthaḥ so 'gniṣṭomaphalaṃ labhet // (72.2) Par.?

aṣṭamyāṃvā caturdaśyāṃ nirāhāro vaset tu yaḥ / (73.1) Par.?

narmadeśvaramāsādya prāpnuyājjanmanaḥ phalam // (73.2) Par.?

agnipraveśaṃ yaḥ kuryāt tasmiṃstīrthe narādhipa / (74.1) Par.?

tasya vyādhibhayaṃ na syāt saptajanmasu bhārata // (74.2) Par.?

anāśakaṃ tu yaḥ kuryāt tasmiṃstīrthe narādhipa / (75.1) Par.?

anivartikā gatis tasya rudraloke bhaviṣyati // (75.2) Par.?

eṣa te vidhir uddiṣṭas tasyotpattir narottama / (76.1) Par.?

purāṇe vihitā tāta saṃjñā tasya tu vistarāt // (76.2) Par.?

etaṃ kīrtayate yastu narmadeśvarasambhavam / (77.1) Par.?

bhaktyā śṛṇoti ca naraḥ so 'pi snānaphalaṃ labhet // (77.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe narmadāmāhātmye narmadeśvaratīrthamāhātmyavarṇanaṃ nāmāṣṭatriṃśo 'dhyāyaḥ // (78.1) Par.?

Duration=0.34777498245239 secs.