Texts

śrīmārkaṇḍeya uvāca / (1.1) Par.?

tato gacchettu rājendra naradeśvaramuttamam / (1.2) Par.?

tīrthānāṃ paramaṃ tīrthaṃ nirmitaṃ nāradena tu // (1.3) Par.?

yudhiṣṭhira uvāca / (2.1) Par.?

nāradena muniśreṣṭha kasmāttīrthaṃ vinirmitam / (2.2) Par.?

etadākhyāhi me sarvaṃ prasanno yadi sattama // (2.3) Par.?

śrīmārkaṇḍeya uvāca / (3.1) Par.?

parameṣṭhisutaḥ pārtha nārado munisattamaḥ / (3.2) Par.?

revāyāścottare kūle tapastena purā kṛtam // (3.3) Par.?

navanāḍīnirodhena kāṣṭhāvatyāṃ gatena ca / (4.1) Par.?

toṣitaḥ paśubhartā vai nāradena yudhiṣṭhira // (4.2) Par.?

īśvara uvāca / (5.1) Par.?

tuṣṭo 'haṃ tava viprendra yoginātha ayonija / (5.2) Par.?

varaṃ prārthaya me vatsa yaste manasi vartate // (5.3) Par.?

nārada uvāca / (6.1) Par.?

tvatprasādena me śambho yogaścaiva prasidhyatu / (6.2) Par.?

acalā te bhavedbhaktiḥ sarvakālaṃ mamaiva tu // (6.3) Par.?

svecchācārī bhave deva vedavedāṅgapāragaḥ / (7.1) Par.?

trikālajño jagannātha gītajño 'haṃ sadā bhave // (7.2) Par.?

dine dine yathā yuddhaṃ devadānavamānuṣaiḥ / (8.1) Par.?

pātāle martyaloke vā svarge vāpi maheśvara // (8.2) Par.?

paśyeyaṃ tvatprasādena bhavantaṃ pārvatīṃ tathā / (9.1) Par.?

tīrthaṃ lokeṣu vikhyātaṃ sarvapāpakṣayaṃkaram // (9.2) Par.?

īśvara uvāca / (10.1) Par.?

evaṃ nārada sarvaṃ tu bhaviṣyati na saṃśayaḥ / (10.2) Par.?

cintitaṃ matprasādena sidhyate nātra saṃśayaḥ // (10.3) Par.?

svecchācāro bhavervatsa svarge pātālagocare / (11.1) Par.?

martye vā bhrama vai yoginna kenāpi nivāryase // (11.2) Par.?

sapta svarāstrayo grāmā mūrcchanāścaikaviṃśatiḥ / (12.1) Par.?

tānā ekonapañcāśatprasādānme tava dhruvam // (12.2) Par.?

mama priyaṃkaraṃ divyaṃ nṛtyagītaṃ bhaviṣyati / (13.1) Par.?

kaliṃ ca paśyase nityaṃ devadānavakinnaraiḥ // (13.2) Par.?

tvattīrthaṃ bhūtale puṇyaṃ matprasādād bhaviṣyati / (14.1) Par.?

vedavedāṅgatattvajño hyaśeṣajñānakovidaḥ / (14.2) Par.?

ekastvamasi niḥsaṅgo matprasādena nārada // (14.3) Par.?

ityuktvāntardadhe devo nāradastatra śūlinam / (15.1) Par.?

sthāpayāmāsa rājendra sarvasattvopakārakam // (15.2) Par.?

pṛthivyāmuttamaṃ tīrthaṃ nirmitaṃ nāradena tu / (16.1) Par.?

tatra tīrthe nṛpaśreṣṭha yo gacchedvijitendriyaḥ // (16.2) Par.?

māsi bhādrapade pārtha kṛṣṇapakṣe caturdaśī / (17.1) Par.?

upoṣya parayā bhaktyā rātrau kurvīta jāgaram // (17.2) Par.?

chatraṃ tatra pradātavyaṃ brāhmaṇe śubhalakṣaṇe / (18.1) Par.?

śastreṇa tu hatā ye vai teṣāṃ śrāddhaṃ pradāpayet / (18.2) Par.?

te yānti paramaṃ lokaṃ piṇḍadānaprabhāvataḥ // (18.3) Par.?

kapilā tatra dātavyā pitṝn uddiśya bhārata / (19.1) Par.?

ityuccārya dvije deyā yāntu te paramāṃ gatim // (19.2) Par.?

asya śrāddhasya bhāvena brāhmaṇasya prasādataḥ / (20.1) Par.?

narmadātoyabhāvena nyāyārjitadhanasya ca / (20.2) Par.?

teṣāṃ caiva prabhāvena pretā yāntu parāṃ gatim // (20.3) Par.?

ityuccārya dvije deyā dakṣiṇā ca svaśaktitaḥ / (21.1) Par.?

haviṣyānnaṃ viśālākṣa dvijānāṃ caiva dāpayet // (21.2) Par.?

dīpaṃ bhaktyā pradātavyaṃ nṛtyaṃ gītaṃ ca kārayet / (22.1) Par.?

avāptaṃ tena vai sarvaṃ yaḥ karotīśvarālaye // (22.2) Par.?

sa yāti rudrasāṃnidhyam iti rudraḥ svayaṃ jagau / (23.1) Par.?

vidyādānena caikena akṣayāṃ gatim āpnuyāt // (23.2) Par.?

dhūrvahāstatra dātavyā bhūmiḥ sasyavatī nṛpa / (24.1) Par.?

citrabhānuṃ śubhairmantraiḥ prīṇayet tatra bhaktitaḥ // (24.2) Par.?

ājyena suprabhūtena homadravyeṇa bhārata / (25.1) Par.?

ye yajanti sadā bhaktyā trikālaṃ nṛtyameva ca // (25.2) Par.?

tīrthe nāradanāmākhye revāyāścottare taṭe / (26.1) Par.?

citrabhānumukhā devāḥ sarvadevamaya ṛṣiḥ // (26.2) Par.?

ṛṣiṇā prīṇitāḥ sarve tasmāt prītyo hutāśanaḥ / (27.1) Par.?

pūjite havyavāhe tu dāridryaṃ naiva jāyate // (27.2) Par.?

dhanena vipulā prītir jāyate pratijanmani / (28.1) Par.?

kulīnāśca suveṣāśca sarvakālaṃ dhanena tu // (28.2) Par.?

plavo nadīnāṃ patiraṅganānāṃ rājā ca sadvṛttarataḥ prajānām / (29.1) Par.?

dhanaṃ narāṇāmṛtavastarūṇāṃ gataṃ gataṃ yauvanamānayanti // (29.2) Par.?

dhanadatvaṃ dhaneśena tasmiṃstīrthe hyupārjitam / (30.1) Par.?

yamena ca yamatvaṃ hi indratvaṃ caiva vajriṇā // (30.2) Par.?

anyairapi mahīpālaiḥ pārthivatvamupārjitam / (31.1) Par.?

nāradeśvaramāhātmyād dhruvo niścalatāṃ gataḥ // (31.2) Par.?

sarvatīrthavaraṃ tīrthaṃ nirmitaṃ nāradena tu / (32.1) Par.?

pṛthivyāṃ sāgarāntāyāṃ revāyāścottare taṭe / (32.2) Par.?

tadvaraṃ sarvatīrthānāṃ mahāpātakanāśanam // (32.3) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe nāradeśvaratīrthamāhātmyavarṇanaṃ nāmāṣṭasaptatitamo 'dhyāyaḥ // (33.1) Par.?