Texts

śrīmārkaṇḍeya uvāca / (1.1) Par.?

tato gacchenmahīpāla cāhalyeśvaramuttamam / (1.2) Par.?

yatra siddhā mahābhāgā tvahalyā tāpasī purā // (1.3) Par.?

gautamo brāhmaṇastvāsīt sākṣād brahmeva cāparaḥ / (2.1) Par.?

satyadharmasamāyukto vānaprasthāśrame rataḥ // (2.2) Par.?

tasya patnī mahābhāgā hyahalyā nāma viśrutā / (3.1) Par.?

rūpayauvanasampannā triṣu lokeṣu viśrutā // (3.2) Par.?

asyā apyatirūpeṇa devarājaḥ śatakratuḥ / (4.1) Par.?

mohito lobhayāmāsa hyahalyāṃ balasūdanaḥ // (4.2) Par.?

māṃ bhajasva varārohe devarājam anindite / (5.1) Par.?

krīḍayasva mayā sārddhaṃ triṣu lokeṣu pūjitā // (5.2) Par.?

kiṃ kariṣyasi vipreṇa śaucācārakṛśena tu / (6.1) Par.?

tapaḥsvādhyāyaśīlena kliśyantīva sulocane // (6.2) Par.?

evamuktā varārohā strīsvabhāvāt sucañcalā / (7.1) Par.?

manasādhyāya śakraṃ sā kāmena kaluṣīkṛtā // (7.2) Par.?

tasyā viditvā taṃ bhāvaṃ sa devaḥ pākaśāsanaḥ / (8.1) Par.?

gautamaṃ vañcayāmāsa duṣṭabhāvena bhāvitaḥ // (8.2) Par.?

viditvā cāntaraṃ tasya gṛhītvā veṣamuttamam / (9.1) Par.?

ahalyāṃ ramayāmāsa viśvastāṃ mandirāntike // (9.2) Par.?

kṣaṇamātrāntare tatra devarājasya bhārata / (10.1) Par.?

ājagāma muniśreṣṭho mandiraṃ tvarayānvitaḥ // (10.2) Par.?

āgataṃ gautamaṃ dṛṣṭvā bhītabhītaḥ puraṃdaraḥ / (11.1) Par.?

nirgataḥ sa tato dṛṣṭvā śakro 'yamiti cintayan // (11.2) Par.?

tataḥ śaśāpa devendraṃ gautamaḥ krodhamūrchitaḥ / (12.1) Par.?

ajitendriyo 'si yasmāttvaṃ tasmād bahubhago bhava // (12.2) Par.?

evamuktastu devendrastatkṣaṇādeva bhārata / (13.1) Par.?

bhagānāṃ tu sahasreṇa tatkṣaṇād eva veṣṭitaḥ // (13.2) Par.?

tyaktvā rājyaṃ suraiḥ sārddhaṃ gataśrīko jagāma ha / (14.1) Par.?

tapaścacāra vipulaṃ gautamena mahītale // (14.2) Par.?

ahalyāpi tataḥ śaptā yasmāt tvaṃ duṣṭacāriṇī / (15.1) Par.?

prekṣya māṃ ramase śakraṃ tasmād aśmamayī bhava // (15.2) Par.?

gate varṣasahasrānte rāmaṃ dṛṣṭvā yaśasvinam / (16.1) Par.?

tīrthayātrāprasaṅgena dhautapāpā bhaviṣyasi // (16.2) Par.?

evaṃ gate tataḥ kāle dṛṣṭā rāmeṇa dhīmatā / (17.1) Par.?

viśvāmitrasahāyena tyaktvā sāśmamayīṃ tanum // (17.2) Par.?

pūjayitvā yathānyāyaṃ gatapāpā vimatsarā / (18.1) Par.?

āgatā narmadātīre tīrthe snātvā yathāvidhi // (18.2) Par.?

kṛtaṃ cāndrāyaṇaṃ māsaṃ kṛcchraṃ cānyaṃ tataḥ param / (19.1) Par.?

tatastuṣṭo mahādevo dattvā varamanuttamam // (19.2) Par.?

jagāmādarśanaṃ bhūyo reme comāpatiściram / (20.1) Par.?

ahalyā tu gate deve sthāpayitvā jagadgurum // (20.2) Par.?

ahalyeśvaranāmānaṃ svagṛhe cāgamatpunaḥ / (21.1) Par.?

tatra tīrthe tu yaḥ snātvā pūjayet parameśvaram // (21.2) Par.?

sa mṛtaḥ svargamāpnoti yatra devo maheśvaraḥ / (22.1) Par.?

krīḍayitvā yathākāmaṃ tatra loke mahātapāḥ // (22.2) Par.?

gate varṣasahasrānte mānuṣyaṃ labhate punaḥ / (23.1) Par.?

dhanadhānyacayopetaḥ putrapautrasamanvitaḥ // (23.2) Par.?

vedavidyāśrayo dhīmāñjāyate vimale kule / (24.1) Par.?

rūpasaubhāgyasampannaḥ sarvavyādhivivarjitaḥ / (24.2) Par.?

jīvedvarṣaśataṃ sāgram ahalyātīrthasevanāt // (24.3) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe ahalyātīrthamāhātmyavarṇanaṃ nāma ṣaṭtriṃśadadhikaśatatamo 'dhyāyaḥ // (25.1) Par.?