Texts

śrīmārkaṇḍeya uvāca / (1.1) Par.?

narmadādakṣiṇe kūle tīrthaṃ paramaśobhanam / (1.2) Par.?

skandena nirmitaṃ pūrvaṃ tapaḥ kṛtvā sudāruṇam // (1.3) Par.?

yudhiṣṭhira uvāca / (2.1) Par.?

skandasya caritaṃ sarvamājanma dvijasattama / (2.2) Par.?

tīrthasya ca vidhiṃ puṇyaṃ kathayasva yathārthataḥ // (2.3) Par.?

śrīmārkaṇḍeya uvāca / (3.1) Par.?

devadevena vai taptaṃ tapaḥ pūrvaṃ yudhiṣṭhira / (3.2) Par.?

vijñaptena suraiḥ sarvairumādevī vivāhitā // (3.3) Par.?

nāsti senāpatiḥ kaściddevānāṃ surasattama / (4.1) Par.?

nīyante dānavairghoraiḥ sarve devāḥ savāsavāḥ // (4.2) Par.?

yathā niśā vinā candraṃ divaso bhāskaraṃ vinā / (5.1) Par.?

na śobhate muhūrtaṃ vai tathā senā vināyakā // (5.2) Par.?

evaṃ jñātvā mahādeva parayā dayayā vibho / (6.1) Par.?

senānīr dīyatāṃ kaścittriṣu lokeṣu viśrutaḥ // (6.2) Par.?

etacchrutvā śubhaṃ vākyaṃ devānāṃ parameśvaraḥ / (7.1) Par.?

kāmayāna umāṃ devīṃ sasmāra manasā smaram // (7.2) Par.?

tena mūrchitasarvāṅgaḥ kāmarūpo jagadguruḥ / (8.1) Par.?

kāmayāmāsa rudrāṇīṃ divyaṃ varṣaśataṃ kila // (8.2) Par.?

devarājastato jñātvā mahāmaithunagaṃ haram / (9.1) Par.?

saṃmantrya daivataiḥ sārddhaṃ praiṣayajjātavedasam // (9.2) Par.?

tena gatvā mahādevaḥ paramānandasaṃsthitaḥ / (10.1) Par.?

sahasā tena dṛṣṭo 'sau hāhetyuktvā samutthitaḥ // (10.2) Par.?

tataḥ kruddhā mahādevī śāpavācamuvāca ha / (11.1) Par.?

vepamānā mahārāja śṛṇu yatte vadāmyaham // (11.2) Par.?

ahaṃ yasmāt suraiḥ sarvairyācitā putrajanmani / (12.1) Par.?

kṛtā ratiśca viphalā saṃpreṣya jātavedasam // (12.2) Par.?

tasmātsarve putrahīnā bhaviṣyanti na saṃśayaḥ / (13.1) Par.?

hareṇoktastato vahnirasmākaṃ bījamāvaha // (13.2) Par.?

yathā bhavati lokeṣu tathā tvaṃ kartum arhasi / (14.1) Par.?

mama tejastvayā śakyaṃ gṛhītuṃ surasattama / (14.2) Par.?

devakāryārthasiddhyarthaṃ nānyaḥ śakto jagattraye // (14.3) Par.?

agniruvāca / (15.1) Par.?

tejasastava me deva kā śaktirdhāraṇe vibho / (15.2) Par.?

karoti bhasmasātsarvaṃ trailokyaṃ sacarācaram // (15.3) Par.?

īśvara uvāca / (16.1) Par.?

udarasthena bījena yadi te jāyate rujā / (16.2) Par.?

tadā kṣipasva tattejo gaṅgātoye hutāśana // (16.3) Par.?

evamuktvā mahādevo 'moghaṃ bījamuttamam / (17.1) Par.?

havyavāhamukhe sarvaṃ prakṣipyāntaradhīyata // (17.2) Par.?

gate cādarśanaṃ deve dahyamāno hutāśanaḥ / (18.1) Par.?

gaṅgātoye vinikṣipya jagāma svaṃniveśanam // (18.2) Par.?

asahantī tu tattejo gaṅgāpi saritāṃ varā / (19.1) Par.?

śarastambe vinikṣipya jagāmāśu yathāgatam // (19.2) Par.?

tatra jātaṃ tu taddṛṣṭvā sarve devāḥ savāsavāḥ / (20.1) Par.?

kṛttikāṃ preṣayāmāsuḥ stanyaṃ pāyayituṃ tadā // (20.2) Par.?

dṛṣṭvā tā āgatāḥ sarvā gaṅgāgarbhe mahāmateḥ / (21.1) Par.?

ṣaṇmukhaiḥ ṣaṇmukho bhūtvā pipāsurapibatstanam // (21.2) Par.?

jātakarmādisaṃskārānvedoktānpadmasambhavaḥ / (22.1) Par.?

cakāra sarvāndājendra vidhidṛṣṭena karmaṇā // (22.2) Par.?

ṣaṇmukhātṣaṇmukho nāma kārttikeyastu kṛttikāt / (23.1) Par.?

kumāraśca kumāratvād gaṅgāgarbho 'gnijo 'paraḥ // (23.2) Par.?

evaṃ kumāraḥ sambhūto hy anadhītya sa vedavit / (24.1) Par.?

śāstrāṇyanekāni veda cacāra vipulaṃ tapaḥ // (24.2) Par.?

devāraṇyeṣu sarveṣu nadīṣu ca nadeṣu ca / (25.1) Par.?

pṛthivyāṃ yāni tīrthāni samudrād yāni bhārata // (25.2) Par.?

tataḥ paryāyayogena narmadātaṭamāśritaḥ / (26.1) Par.?

narmadādakṣiṇe kūle cacāra vipulaṃ tapaḥ // (26.2) Par.?

ṛgyajuḥsāmavihitaṃ japañjāpyamaharniśam / (27.1) Par.?

dhyāyamāno mahādevaṃ śucirdhamanisaṃtataḥ // (27.2) Par.?

tato varṣasahasrānte pūrṇe devo maheśvaraḥ / (28.1) Par.?

umayā sahitaḥ kāle tadā vacanam abravīt // (28.2) Par.?

īśvara uvāca / (29.1) Par.?

ahaṃ te varadastāta gaurī mātā pitā hyaham / (29.2) Par.?

varaṃ vṛṇīṣva yacceṣṭaṃ triṣu lokeṣu durlabham // (29.3) Par.?

ṣaṇmukha uvāca / (30.1) Par.?

yadi tuṣṭo mahādeva umayā saha śaṅkara / (30.2) Par.?

vṛṇomi mātāpitarau nānyā gatirmatirmama // (30.3) Par.?

etacchrutvā śubhaṃ vākyaṃ putrasya vadanāccyutam / (31.1) Par.?

tathetyuktvā tu snehena premṇā taṃ pariṣasvaje // (31.2) Par.?

tatastaṃ mūrdhnyupāghrāya hyumayovāca śaṅkaraḥ // (32.1) Par.?

īśvara uvāca / (33.1) Par.?

akṣayaścāvyayaścaiva senānīs tvaṃ bhaviṣyasi // (33.2) Par.?

śikhī ca te vāhanaṃ divyarūpo datto mayā śaktidharasya saṃkhye / (34.1) Par.?

surāsurādīṃśca jayeti coktvā jagāma kailāsavaraṃ mahātmā // (34.2) Par.?

gate cādarśanaṃ deve tadā sa śikhivāhanaḥ / (35.1) Par.?

sthāpayitvā mahādevaṃ jagāma surasannidhau // (35.2) Par.?

tadāprabhṛti tattīrthaṃ skandatīrthamiti śrutam / (36.1) Par.?

sarvapāpaharaṃ puṇyaṃ martyānāṃ bhuvi durlabham // (36.2) Par.?

tatra tīrthe tu yo rājanbhaktyā snātvārcayecchivam / (37.1) Par.?

gandhamālyābhiṣekaiśca yājñikaṃ sa labhet phalam // (37.2) Par.?

skandatīrthe tu yaḥ snātvā pūjayet pitṛdevatāḥ / (38.1) Par.?

tilamiśreṇa toyena tasya puṇyaphalaṃ śṛṇu // (38.2) Par.?

piṇḍadānena caikena vidhiyuktena bhārata / (39.1) Par.?

dvādaśābdāni tuṣyanti pitaro nātra saṃśayaḥ // (39.2) Par.?

tatra tīrthe tu rājendra śubhaṃ vā yādi vāśubham / (40.1) Par.?

iha loke pare caiva tatsarvaṃ jāyate 'kṣayam // (40.2) Par.?

tatra tīrthe tu yaḥ kaścit prāṇatyāgaṃ kariṣyati / (41.1) Par.?

śāstrayuktena vidhinā sa gacchecchivamandiram // (41.2) Par.?

kalpamekaṃ vasitvā tu devagandharvapūjitaḥ / (42.1) Par.?

atra bhāratavarṣe tu jāyate vimale kule // (42.2) Par.?

vedavedāṅgatattvajñaḥ sarvavyādhivivarjitaḥ / (43.1) Par.?

jīvedvarṣaśataṃ sāgraṃ putrapautrasamanvitaḥ // (43.2) Par.?

idaṃ te kathitaṃ rājanskandatīrthasya sambhavam / (44.1) Par.?

dhanyaṃ yaśasyamāyuṣyaṃ sarvaduḥkhaghnamuttamam / (44.2) Par.?

sarvapāpaharaṃ puṇyaṃ devadevena bhāṣitam // (44.3) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe skandatīrthamāhātmyavarṇanaṃ nāmaikādaśottaraśatatamo 'dhyāyaḥ // (45.1) Par.?