Texts

śrīmārkaṇḍeya uvāca / (1.1) Par.?

uttare narmadākūle tīrthaṃ paramaśobhanam / (1.2) Par.?

jayavārāhamāhātmyaṃ sarvapāpapraṇāśanam // (1.3) Par.?

uddhṛtā jagatī yena sarvadevanamaskṛtā / (2.1) Par.?

lokānugrahabuddhyā ca saṃsthito narmadātaṭe // (2.2) Par.?

tatra tīrthe tu yaḥ snātvā vīkṣate madhusūdanam / (3.1) Par.?

mucyate sarvapāpebhyo daśajanmānukīrtanāt // (3.2) Par.?

matsyaḥ kūrmo varāhaśca narasiṃho 'tha vāmanaḥ / (4.1) Par.?

rāmo rāmaśca kṛṣṇaśca buddhaḥ kalkiśca te daśa // (4.2) Par.?

yudhiṣṭhira uvāca / (5.1) Par.?

matsyena kiṃ kṛtaṃ tāta kūrmeṇa munisattama / (5.2) Par.?

varāheṇa ca kiṃ karma narasiṃhena kiṃ kṛtam // (5.3) Par.?

vāmanena ca rāmeṇa rāghaveṇa ca kiṃ kṛtam / (6.1) Par.?

buddharūpeṇa kiṃ vāpi kalkinā kiṃ kṛtaṃ vada // (6.2) Par.?

evamuktastu viprendro dharmaputreṇa dhīmatā / (7.1) Par.?

uvāca madhurāṃ vāṇīṃ tadā dharmasutaṃ prati // (7.2) Par.?

śrīmārkaṇḍeya uvāca / (8.1) Par.?

mīno bhūtvā purā kalpe prītyarthaṃ brahmaṇo vibhuḥ / (8.2) Par.?

samarpayatsamuddhṛtya vandānmagnānmahārṇave // (8.3) Par.?

amṛtotpādane rājankūrmo bhūtvā jagadguruḥ / (9.1) Par.?

mandaraṃ dhārayāmāsa tathā devīṃ vasuṃdharām // (9.2) Par.?

ujjahāra dharāṃ magnāṃ pātālatalavāsinīm / (10.1) Par.?

vārāhaṃ rūpamāsthāya devadevo janārdanaḥ // (10.2) Par.?

narasyārddhatanuṃ kṛtvā siṃhasyārddhatanuṃ tathā / (11.1) Par.?

hiraṇyakaśiporvakṣo vidadāra nakhāṅkuśaiḥ // (11.2) Par.?

jaṭī vāmanarūpeṇa stūyamāno dvijottamaiḥ / (12.1) Par.?

taddivyaṃ rūpamāsthāya kramitvā medinīṃ kramaiḥ // (12.2) Par.?

kṛtavāṃśca baliṃ paścāt pātālatalavāsinam / (13.1) Par.?

sthāpayitvā surān sarvān gato viṣṇuḥ svakaṃ puram // (13.2) Par.?

jamadagnisuto rāmo bhūtvā śastrabhṛtāṃ varaḥ / (14.1) Par.?

kṣatriyān pṛthivīpālān avadhīddhaihayādikān // (14.2) Par.?

kaśyapāya mahīṃ dattvā saparvatavanākarām / (15.1) Par.?

tapastapati deveśo mahendre 'dyāpi bhārata // (15.2) Par.?

tato dāśarathī rāmo rāvaṇaṃ devakaṇṭakam / (16.1) Par.?

sagaṇaṃ samare hatvā rājyaṃ dattvā vibhīṣaṇe // (16.2) Par.?

pālayitvā nayādbhūmiṃ makhaiḥ saṃtarpya devatāḥ / (17.1) Par.?

svargaṃ gato mahātejā rāmo rājīvalocanaḥ // (17.2) Par.?

vasudevagṛhe bhūyaḥ saṃkarṣaṇasahāyavān / (18.1) Par.?

avatīrṇo jagannātho vāsudevo yudhiṣṭhira // (18.2) Par.?

so 'vadhīttava sāmarthyādvadhārthaṃ duṣṭabhūbhṛtām / (19.1) Par.?

cāṇūrakaṃsakeśīnāṃ jarāsaṃdhasya bhārata // (19.2) Par.?

tena tvaṃ susahāyena hatvā śatrūnnareśvara / (20.1) Par.?

bhokṣyase pṛthivīṃ sarvāṃ bhrātṛbhiḥ saha saṃbhṛtām // (20.2) Par.?

tathā buddhatvamaparaṃ navamaṃ prāpsyate 'cyutaḥ / (21.1) Par.?

śāntimāndevadeveśo madhuhantā madhupriyaḥ // (21.2) Par.?

tena buddhasvarūpeṇa devena parameṣṭhinā / (22.1) Par.?

bhaviṣyati jagatsarvaṃ mohitaṃ sacarācaram // (22.2) Par.?

na śroṣyanti pituḥ putrāstadāprabhṛti bhārata / (23.1) Par.?

na gurorbāndhavāḥ śiṣyā bhaviṣyatyadharottaram // (23.2) Par.?

jito dharmo hyadharmeṇa cāsatyena ṛtaṃ jitam / (24.1) Par.?

jitāścauraiśca rājānaḥ strībhiśca puruṣā jitāḥ // (24.2) Par.?

sīdanti cāgnihotrāṇi gurau pūjā praṇaśyati / (25.1) Par.?

sīdanti mānavā dharmāḥ kalau prāpte yudhiṣṭhira // (25.2) Par.?

dvādaśe daśame varṣe nārī garbhavatī bhavet / (26.1) Par.?

kanyāstatra prasūyante brāhmaṇo haripiṅgalaḥ // (26.2) Par.?

bhaviṣyati tataḥ kalkirdaśame janmani prabhuḥ // (27.1) Par.?

etat te kathitaṃ rājandevasya parameṣṭhinaḥ / (28.1) Par.?

kāraṇaṃ daśa janmanāṃ sarvapāpakṣayaṃkaram // (28.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe śvetavārāhatīrthamāhātmyavarṇanaṃ nāmaikapañcāśadadhikaśatatamo 'dhyāyaḥ // (29.1) Par.?