Texts

śrīmārkaṇḍeya uvāca / (1.1) Par.?

tato gacchenmahārāja sāṃvauraṃ tīrthamuttamam / (1.2) Par.?

yatra saṃnihito bhānuḥ pūjyamānaḥ surāsuraiḥ // (1.3) Par.?

tatra ye paṅgutāṃ prāptāḥ śīrṇaghrāṇanakhā narāḥ / (2.1) Par.?

dadrumaṇḍalabhinnāṅgā makṣikākṛmisaṃkulāḥ // (2.2) Par.?

mātāpitṛbhyāṃ rahitā bhrātṛbhāryāvivarjitāḥ / (3.1) Par.?

anāthā vikalā vyaṅgā magnā ye duḥkhasāgare // (3.2) Par.?

teṣāṃ nātho jagadyonirnarmadātaṭamāśritaḥ / (4.1) Par.?

sāṃvauranātho lokānāmārtihā duḥkhanāśanaḥ // (4.2) Par.?

tatra tīrthe tu yaḥ snātvā māsamekaṃ nirantaram / (5.1) Par.?

pūjayed bhāskaraṃ devaṃ tasya puṇyaphalaṃ śṛṇu // (5.2) Par.?

yatphalaṃ cottare pārtha tathā vai pūrvasāgare / (6.1) Par.?

dakṣiṇe paścime snātvā tatra tīrthe tu tat phalam // (6.2) Par.?

kaumāre yauvane pāpaṃ vārddhake yacca saṃcitam / (7.1) Par.?

tat praṇaśyati sāṃvaure snānamātrānna saṃśayaḥ // (7.2) Par.?

na vyādhirnaiva dāridryaṃ na caiveṣṭaviyojanam / (8.1) Par.?

saptajanmāni rājendra sāṃvauraparisevanāt // (8.2) Par.?

saptamyāmupavāsena taddine cāpyupoṣite / (9.1) Par.?

sa tatphalamavāpnoti tatra snātvā na saṃśayaḥ // (9.2) Par.?

raktacandanamiśreṇa yadarghyeṇa phalaṃ smṛtam / (10.1) Par.?

tatra tīrthe nṛpaśreṣṭha snātvā tatphalamāpnuyāt // (10.2) Par.?

narmadāsalilaṃ ramyaṃ sarvapātakanāśanam / (11.1) Par.?

nirīkṣitaṃ viśeṣeṇa sāṃvaureṇa mahātmanā // (11.2) Par.?

te dhanyāste mahātmānas teṣāṃ janma sujīvitam / (12.1) Par.?

snātvā paśyanti deveśaṃ sāṃvaureśvaramuttamam // (12.2) Par.?

sūryaloke vaset tāvad yāvad ābhūtasamplavam // (13.1) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe sāṃvaureśvaratīrthamāhātmyavarṇanaṃ nāma catuḥṣaṣṭyuttaraśatatamo 'dhyāyaḥ // (14.1) Par.?