Texts

śrīmārkaṇḍeya uvāca / (1.1) Par.?

tato gacchenmahīpāla somatīrthamanuttamam / (1.2) Par.?

candrahāseti vikhyātaṃ sarvadaivatapūjitam // (1.3) Par.?

yatra siddhiṃ parāṃ prāptaḥ somo rājā surottamaḥ // (2.1) Par.?

yudhiṣṭhira uvāca / (3.1) Par.?

kathaṃ siddhimanuprāptaḥ somo rājā jagatpatiḥ / (3.2) Par.?

tatsarvaṃ śrotumicchāmi kathayasva mamānagha // (3.3) Par.?

mārkaṇḍeya uvāca / (4.1) Par.?

purā śapto munīndreṇa dakṣeṇa kila bhārata / (4.2) Par.?

asevanāddhi dārāṇāṃ kṣayarogī bhaviṣyasi // (4.3) Par.?

udvāhitānāṃ patnīnāṃ ye na kurvanti sevanam / (5.1) Par.?

yā niṣṭhā jāyate teṣāṃ tāṃ śṛṇuṣva narottama // (5.2) Par.?

ṛtukāle tu nārīṇāṃ sevanājjāyate sutaḥ / (6.1) Par.?

sutātsvargaśca mokṣaśca hītyevaṃ śrutinodanā // (6.2) Par.?

tatkālocitadharmeṇa ye na sevanti tāṃ narāḥ / (7.1) Par.?

teṣāṃ brahmaghnajaṃ pāpaṃ jāyate nātra saṃśayaḥ // (7.2) Par.?

tena pāpena ghoreṇa veṣṭato raurave patet / (8.1) Par.?

tasya tadrudhiraṃ pāpāḥ pibante kālamīpsitam // (8.2) Par.?

tato 'vatīrṇakālena yāṃ yāṃ yoniṃ prayāsyati / (9.1) Par.?

tasyāṃ tasyāṃ sa duṣṭātmā durbhago jāyate sadā // (9.2) Par.?

nārīṇāṃ tu sadā kāmo hyadhikaḥ parivartate / (10.1) Par.?

viśeṣeṇa ṛtoḥ kāle bhidyate kāmasāyakaiḥ // (10.2) Par.?

paribhūtā hi sā bhartrā dhyāyate 'nyaṃ patiṃ tataḥ / (11.1) Par.?

tasyāḥ putraḥ samutpanno hyaṭate kulamuttamam // (11.2) Par.?

svargasthāstena pitaraḥ pūrvaṃ jātā mahīpate / (12.1) Par.?

patanti jātamātreṇa kulaṭas tena cocyate // (12.2) Par.?

tena karmavipākena kṣayarogī śaśī hyabhūt / (13.1) Par.?

tyaktvā lokaṃ surendrāṇāṃ martyalokam upāgataḥ // (13.2) Par.?

tatra tīrthānyanekāni puṇyānyāyatanāni ca / (14.1) Par.?

bhramitvā narmadāṃ prāptaḥ sarvapāpapraṇāśinīm // (14.2) Par.?

upavāsastu dānāni vratāni niyamāśca ye / (15.1) Par.?

cacāra dvādaśābdāni tato muktaḥ sa kilbiṣaiḥ // (15.2) Par.?

sthāpayitvā mahādevaṃ sarvapātakanāśanam / (16.1) Par.?

jagāma prabhayā pūrṇaḥ somalokamanuttamam // (16.2) Par.?

yenaiva sthāpito devaḥ pūjyate varṣasaṃkhyayā / (17.1) Par.?

tāvad yugasahasrāṇi tasya lokaṃ samaśnute // (17.2) Par.?

tena devān vidhānoktān sthāpayanti narā bhuvi / (18.1) Par.?

akṣayaṃ cāvyayaṃ yasmātphalaṃ bhavati nānyathā // (18.2) Par.?

somatīrthe tu yaḥ snātvā pūjayed devamīśvaram / (19.1) Par.?

jāyate sa naro bhūtvā somavitpriyadarśanaḥ // (19.2) Par.?

candraprabhāse yo gatvā snānaṃ vidhivad ācaret / (20.1) Par.?

vyādhinā nābhibhūtaḥ syāt kṣayarogeṇa vā yutaḥ // (20.2) Par.?

candrahāsye naraḥ snātvā dvādaśyāṃ tu nareśvara / (21.1) Par.?

caturdaśyām upoṣyaiva kṣīrasya juhuyāccarum // (21.2) Par.?

mantraiḥ pañcabhir īśānaṃ puruṣastryambakaṃ yajet / (22.1) Par.?

haviḥśeṣaṃ svayaṃ prāśya candrahāsyeśamīkṣayet // (22.2) Par.?

anena vidhinā rājaṃstuṣṭo devo maheśvaraḥ / (23.1) Par.?

vidhinā tīrthayogena kṣayarogād vimucyate // (23.2) Par.?

saptabhiḥ somavārair yaḥ snānaṃ tatra samācaret / (24.1) Par.?

sa vai karṇakṛtādrogānmucyate pūjayañchivam // (24.2) Par.?

akṣirogas tathā rājaṃścandrahāsye vinaśyati / (25.1) Par.?

candrahāsye tu yo gatvā grahaṇe candrasūryayoḥ / (25.2) Par.?

snānaṃ samācared bhaktyā mucyate sarvapātakaiḥ // (25.3) Par.?

tatra snānaṃ ca dānaṃ ca candrahāsye śubhaśubham / (26.1) Par.?

kṛtaṃ nṛpavaraśreṣṭha sarvaṃ bhavati cākṣayam // (26.2) Par.?

te dhanyāste mahātmānas teṣāṃ janma sujīvitam / (27.1) Par.?

candrahāsye tu ye snātvā paśyanti grahaṇaṃ narāḥ // (27.2) Par.?

vācikaṃ mānasaṃ pāpaṃ karmajaṃ yatpurā kṛtam / (28.1) Par.?

snānamātrāt tu rājendra tatra tīrthe praṇaśyati // (28.2) Par.?

bahavastanna jānanti mahāmohasamanvitāḥ / (29.1) Par.?

dehastha iva sarveṣāṃ paramātmeva saṃsthitam // (29.2) Par.?

paścime sāgare gatvā somatīrthe tu yatphalam / (30.1) Par.?

tatsamagramavāpnoti candrahāsye na saṃśayaḥ // (30.2) Par.?

saṃkrāntau ca vyatīpāte viṣuve cāyane tathā / (31.1) Par.?

candrahāsye naraḥ snātvā sarvapāpaiḥ pramucyate // (31.2) Par.?

te mūḍhāste durācārās teṣāṃ janma nirarthakam / (32.1) Par.?

candrahāsyaṃ na jānanti narmadāyāṃ vyavasthitam // (32.2) Par.?

candrahāsye tu yaḥ kaścit saṃnyāsaṃ kurute nṛpa / (33.1) Par.?

anivartikā gatistasya somalokātkadācana // (33.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe candrahāsyatīrthamahātmyavarṇanaṃ nāma navatyuttaraśatatamo 'dhyāyaḥ // (34.1) Par.?