Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 4760

Click on a sentence to show its analysis
Keep the mouse pointer over a lemma to show its meanings.

mārkaṇḍeya uvāca / (1.1) Par.?

tasyaivānantaraṃ tāta devatīrthamanuttamam / (1.2) Par.?

dṛṣṭvā tu śrīpatiṃ pāpair mucyate mānavo bhuvi // (1.3) Par.?

maharṣes tasya jāmātā bhṛgordevo janārdanaḥ // (2.1) Par.?

yudhiṣṭhira uvāca / (3.1) Par.?

ko 'yaṃ śriyaḥ patirdevo devānāmadhipo vibhuḥ / (3.2) Par.?

kathaṃ janmābhavat tasya deveṣu triṣu vā mune // (3.3) Par.?

sambandhī ca kathaṃ jāto bhṛguṇā saha keśavaḥ / (4.1) Par.?

etadvistarato brahman vaktum arhasi bhārgava // (4.2) Par.?

mārkaṇḍeya uvāca / (5.1) Par.?

saṃkṣepāt kathayiṣyāmi sādhyasya caritaṃ mahat / (5.2) Par.?

na hi vistarato vaktuṃ śaktāḥ sarve maharṣayaḥ // (5.3) Par.?

nārāyaṇasya nābhyabjājjāto devaścaturmukhaḥ / (6.1) Par.?

tasya dakṣo 'ṅgajo rājan dakṣiṇāṅguṣṭhasambhavaḥ // (6.2) Par.?

dharmaḥ stanāntātsaṃjātas tasya putro 'bhavatkila / (7.1) Par.?

nārāyaṇasahāyo 'sāvajo 'pi bharatarṣabha // (7.2) Par.?

marutvatī vasurjñānā lambā bhānumatī satī / (8.1) Par.?

saṃkalpā ca muhūrtā ca sādhyā viśvāvatī kakup // (8.2) Par.?

dharmapatnyo daśaivaitā dākṣāyaṇyo mahāprabhāḥ / (9.1) Par.?

tāsāṃ sādhyā mahābhāgā putrānajanayan nṛpa // (9.2) Par.?

naro nārāyaṇaścaiva hariḥ kṛṣṇastathaiva ca / (10.1) Par.?

viṣṇoraṃśāṃśakā hyete catvāro dharmasūnavaḥ // (10.2) Par.?

tathā nārāyaṇanarau gandhamādanaparvate / (11.1) Par.?

ātmanyātmānamādhāya tepatuḥ paramaṃ tapaḥ // (11.2) Par.?

dhyāyamānāvanaupamyaṃ svaṃ kāraṇamakāraṇam / (12.1) Par.?

vāsudevamanirdeśyamapratarkyamanantaram // (12.2) Par.?

yogayuktau mahātmānāvāsthitāvurutāpasau / (13.1) Par.?

tayostapaḥprabhāveṇa na tatāpa divākaraḥ // (13.2) Par.?

vavāha śaṅkito vāyuḥ sukhasparśo hyaśaṅkitaḥ / (14.1) Par.?

śiśiro 'bhavad atyarthaṃ jvalannapi vibhāvasuḥ // (14.2) Par.?

siṃhavyāghrādayaḥ saumyāśceruḥ saha mṛgairgirau / (15.1) Par.?

tayor gaur iva bhārārtā pṛthivī pṛthivīpate // (15.2) Par.?

ceruśca bhūdharāścaiva cukṣubhe ca mahodadhiḥ / (16.1) Par.?

devāśca sveṣu dhiṣṇyeṣu niṣprabheṣu hataprabhāḥ / (16.2) Par.?

babhūvuravanīpāla paramaṃ kṣobhamāgatāḥ // (16.3) Par.?

devarājastathā śakraḥ saṃtaptastapasā tayoḥ / (17.1) Par.?

yuyojāpsarasastatra tayorvighnacikīrṣayā // (17.2) Par.?

indra uvāca / (18.1) Par.?

rambhe tilottame kubje ghṛtāci lalite śubhe / (18.2) Par.?

pramloce subhru sumloce saurabheyi mahoddhate // (18.3) Par.?

alambuṣe miśrakeśi puṇḍarīke varūthini / (19.1) Par.?

vilokanīyaṃ bibhrāṇā vapurmanmathabodhanam // (19.2) Par.?

gandhamādanamāsādya kurudhvaṃ vacanaṃ mama / (20.1) Par.?

naranārāyaṇau tatra tapodīkṣānvitau dvijau // (20.2) Par.?

tepāte dharmatanayau tapaḥ paramaduścaram / (21.1) Par.?

tāvasmākaṃ varārohāḥ kurvāṇau paramaṃ tapaḥ // (21.2) Par.?

karmātiśayaduḥkhārtipradāvāyatināśanau / (22.1) Par.?

tadgacchata na bhīḥ kāryā bhavatībhir idaṃ vacaḥ // (22.2) Par.?

smaraḥ sahāyo bhavitā vasantaśca varāṅganāḥ / (23.1) Par.?

rūpaṃ vayaḥ samālokya madanoddīpanaṃ param / (23.2) Par.?

kandarpavaśamabhyeti vivaśaḥ ko na mānavaḥ // (23.3) Par.?

mārkaṇḍeya uvāca / (24.1) Par.?

ityuktvā devarājena madanena samaṃ tadā / (24.2) Par.?

jagmurapsarasaḥ sarvā vasantaśca mahīpate // (24.3) Par.?

gandhamādanamāsādya puṃskokilakulākulam / (25.1) Par.?

cacāra mādhavo ramyaṃ protphullavanapādapam // (25.2) Par.?

pravavau dakṣiṇāśāyāṃ malayānugato 'nilaḥ / (26.1) Par.?

bhṛṅgamālārutaravai ramaṇīyamabhūdvanam // (26.2) Par.?

gandhaśca surabhiḥ sadyo vanarājisamudbhavaḥ / (27.1) Par.?

kinnaroragayakṣāṇāṃ babhūva ghrāṇatarpaṇaḥ // (27.2) Par.?

varāṅganāśca tāḥ sarvā naranārāyaṇāvṛṣī / (28.1) Par.?

vilobhayitum ārabdhā vāgaṅgalalitasmitaiḥ // (28.2) Par.?

jagau manoharaṃ kācinnanarta tatra cāpsarāḥ / (29.1) Par.?

avādayat tathaivānyā manoharataraṃ nṛpa // (29.2) Par.?

hāvairbhāvaiḥ sṛtairhāsyais tathānyā valgubhāṣitaiḥ / (30.1) Par.?

tayoḥ kṣobhāya tanvaṅgyaścakrurudyamamaṅganāḥ // (30.2) Par.?

tathāpi na tayoḥ kaścinmanasaḥ pṛthivīpate / (31.1) Par.?

vikāro 'bhavadadhyātmapārasamprāptacetasoḥ // (31.2) Par.?

nivātasthau yathā dīpāvakampau nṛpa tiṣṭhataḥ / (32.1) Par.?

vāsudevārpaṇasvasthe tathaiva manasī tayoḥ // (32.2) Par.?

pūryamāṇo 'pi cāmbhobhirbhuvamanyāṃ mahodadhiḥ / (33.1) Par.?

yathā na yāti saṃkṣobhaṃ tathā tanmānasaṃ kvacit // (33.2) Par.?

sarvabhūtahitaṃ brahma vāsudevamayaṃ param / (34.1) Par.?

manyamānau na rāgasya dveṣasya ca vaśaṃgatau // (34.2) Par.?

smaro 'pi na śaśākātha praveṣṭuṃ hṛdayaṃ tayoḥ / (35.1) Par.?

vidyāmayaṃ dīpayutamandhakāra ivālayam // (35.2) Par.?

puṣpojjvalāṃs taruvarān vasantaṃ dakṣiṇānilam / (36.1) Par.?

tāścaivāpsarasaḥ sarvāḥ kandarpaṃ ca mahāmunī // (36.2) Par.?

yaccārabdhaṃ tapastābhyāmātmānaṃ gandhamādanam / (37.1) Par.?

dadarśāte 'khilaṃ rūpaṃ brahmaṇaḥ puruṣarṣabha // (37.2) Par.?

dāhāya nāmalo vahnernāpaḥ kledāya cāmbhasaḥ / (38.1) Par.?

taddravyameva taddravyavikārāya na vai yataḥ // (38.2) Par.?

tato vijñāya vijñāya paraṃ brahma svarūpataḥ / (39.1) Par.?

madhukandarpayoṣitsu vikāro nābhavattayoḥ // (39.2) Par.?

tato gurutaraṃ yatnaṃ vasantamadanau nṛpa / (40.1) Par.?

cakrāte tāśca tanvaṅgyastatkṣobhāya punaḥpunaḥ // (40.2) Par.?

atha nārāyaṇo dhairyaṃ saṃdhāyodīrṇamānasaḥ / (41.1) Par.?

ūrorutpādayāmāsa varāṅgīmabalāṃ tadā // (41.2) Par.?

trailokyasundarīratnam aśeṣam avanīpate / (42.1) Par.?

guṇairlāghavamabhyeti yasyāḥ saṃdarśanādanu // (42.2) Par.?

tāṃ vilokya mahīpāla cakampe manasānilaḥ / (43.1) Par.?

vasanto vismayaṃ yātaḥ smaraḥ sasmāra kiṃcana // (43.2) Par.?

rambhātilottamādyāśca vailakṣyaṃ devayoṣitaḥ / (44.1) Par.?

na rejuravanīpāla tallakṣyahṛdayekṣaṇāḥ // (44.2) Par.?

tataḥ kāmo vasantaśca pārthivāpsarasaśca tāḥ / (45.1) Par.?

praṇamya bhagavantau tau tuṣṭuvur munisattamau // (45.2) Par.?

vasantakāmāpsarasa ūcuḥ / (46.1) Par.?

prasīdatu jagaddhātā yasya devasya māyayā / (46.2) Par.?

mohitāḥ sma vijānīmo nāntaraṃ vidyate dvayoḥ // (46.3) Par.?

prasīdatu sa vāṃ devo yasya rūpamidaṃ dvidhā / (47.1) Par.?

dhāmabhūtasya lokānām anāder apratiṣṭhataḥ // (47.2) Par.?

naranārāyaṇau devau śaṅkhacakrāyudhāvubhau / (48.1) Par.?

āstāṃ prasādasumukhāvasmākamaparādhinām // (48.2) Par.?

nidhānaṃ sarvavidyānāṃ sarvapāpavanānalaḥ / (49.1) Par.?

nārāyaṇo 'to bhagavān sarvapāpaṃ vyapohatu // (49.2) Par.?

śārṅgacihnāyudhaḥ śrīmānātmajñānamayo 'naghaḥ / (50.1) Par.?

naraḥ samastapāpāni hatātmā sarvadehinām // (50.2) Par.?

jaṭākalāpabaddho 'yamanayor naḥ kṣamāvatoḥ / (51.1) Par.?

saumyāsyadṛṣṭiḥ pāpāni hantuṃ janmārjitāni vai // (51.2) Par.?

tathātmavidyādoṣeṇa yo 'parādhaḥ kṛto mahān / (52.1) Par.?

trailokyavandyau yau nāthau vilobhayitum āgatāḥ // (52.2) Par.?

prasīda deva vijñānadhana mūḍhadṛśāmiva / (53.1) Par.?

bhavanti santaḥ satataṃ svadharmaparipālakāḥ // (53.2) Par.?

dṛṣṭvaitannaḥ samutpannaṃ yathā strīratnamuttamam / (54.1) Par.?

tvayi nārāyaṇotpannā śreṣṭhā pāravatī matiḥ // (54.2) Par.?

tena satyena satyātmanparamātmansanātana / (55.1) Par.?

nārāyaṇa prasīdeśa sarvalokaparāyaṇa // (55.2) Par.?

prasannabuddhe śāntātmanprasannavadanekṣaṇa / (56.1) Par.?

prasīda yogināmīśa nara sarvagatācyuta // (56.2) Par.?

namasyāmo naraṃ devaṃ tathā nārāyaṇaṃ harim / (57.1) Par.?

namo narāya namyāya namo nārāyaṇāya ca // (57.2) Par.?

prasannānāmanāthānāṃ tathā nāthavatāṃ prabho / (58.1) Par.?

śaṃ karotu naro 'smākaṃ śaṃ nārāyaṇa dehi naḥ // (58.2) Par.?

mārkaṇḍeya uvāca / (59.1) Par.?

evamabhyarcitaḥ stutyā rāgadveṣādivarjitaḥ / (59.2) Par.?

prāheśaḥ sarvabhūtānāṃ madhye nārāyaṇo nṛpa // (59.3) Par.?

nārāyaṇa uvāca / (60.1) Par.?

svāgataṃ mādhave kāme bhavatvapsarasāmapi / (60.2) Par.?

yatkāryam āgatānāṃ ca ihāsmābhistaducyatām // (60.3) Par.?

yūyaṃ saṃsiddhaye nūnamasmākaṃ balaśatruṇā / (61.1) Par.?

saṃpreṣitāstato 'smākaṃ nṛtyayogādidarśanam // (61.2) Par.?

na vayaṃ gītanṛtyena nāṅgaceṣṭādibhāṣitaiḥ / (62.1) Par.?

lubdhā vai viṣayair manye viṣayā dāruṇātmakāḥ // (62.2) Par.?

śabdādisaṅgaduṣṭāni yadā nākṣāṇi naḥ śubhāḥ / (63.1) Par.?

tadā nṛtyādayo bhāvāḥ kathaṃ lobhapradāyinaḥ // (63.2) Par.?

te siddhāḥ sma na vai sādhyā bhavatīnāṃ smarasya ca / (64.1) Par.?

mādhavasya ca śākro 'pi svāsthyaṃ yātvaviśaṅkitāḥ // (64.2) Par.?

yo 'sau paraśca paramaḥ puruṣaḥ parameśvaraḥ / (65.1) Par.?

paramātmā samastasya sthāvarasya carasya ca // (65.2) Par.?

utpattiheturete ca yasminsarvaṃ pralīyate / (66.1) Par.?

sarvāvāsīti devatvād vāsudevety udāhṛtaḥ // (66.2) Par.?

vayamaṃśāṃśakāstasya caturvyūhasya māninaḥ / (67.1) Par.?

tadādeśitavārtmānau jagadbodhāya dehinām // (67.2) Par.?

tatsarvabhūtaṃ sarveśaṃ sarvatra samadarśinam / (68.1) Par.?

kutaḥ paśyantau rāgādīnkariṣyāmo vibhedinaḥ // (68.2) Par.?

vasante mayi cendre ca bhavatīṣu tathā smare / (69.1) Par.?

yadā sa eva bhūtātmā tadā dveṣādayaḥ katham // (69.2) Par.?

tanmayānyavibhaktāni yadā sarveṣu jantuṣu / (70.1) Par.?

sarveśvareśvaro viṣṇuḥ kuto rāgādayastataḥ // (70.2) Par.?

brahmāṇam indram īśānam ādityamaruto 'khilān / (71.1) Par.?

viśvedevān ṛṣīn sādhyānvasūnpitṛgaṇāṃs tathā // (71.2) Par.?

yakṣarākṣasabhūtādīnnāgānsarpānsarīsṛpān / (72.1) Par.?

manuṣyapakṣigorūpagajasiṃhajalecarān // (72.2) Par.?

makṣikāmaśakāndaṃśāñchalabhāñjalajān kṛmīn / (73.1) Par.?

gulmavṛkṣalatāvallītvaksāratṛṇajātiṣu // (73.2) Par.?

yacca kiṃcidadṛśyaṃ vā dṛśyaṃ vā tridaśāṅganāḥ / (74.1) Par.?

manyadhvaṃ jātamekasya tatsarvaṃ paramātmanaḥ // (74.2) Par.?

jāyamānaḥ kathaṃ viṣṇumātmānaṃ paramaṃ ca yat / (75.1) Par.?

rāgadveṣau tathā lobhaṃ kaḥ kuryād amarāṅganāḥ // (75.2) Par.?

sarvabhūtamaye viṣṇau sarvage sarvadhātari / (76.1) Par.?

nipātya taṃ pṛthagbhūte kuto rāgādiko guṇaḥ // (76.2) Par.?

evamasmāsu yuṣmāsu sarvabhūteṣu cābalāḥ / (77.1) Par.?

tanmathaikatvabhūteṣu rāgādyavasaraḥ kutaḥ // (77.2) Par.?

samyag dṛṣṭir iyaṃ proktā samastaikyāvalokinī / (78.1) Par.?

pṛthagvijñānamātraiva lokasaṃvyavahāravat // (78.2) Par.?

bhūtendriyāntaḥ karaṇapradhānapuruṣātmakam / (79.1) Par.?

jagadvai hyetad akhilaṃ tadā bhedaḥ kimātmakaḥ // (79.2) Par.?

bhavanti layamāyānti samudrasalilormayaḥ / (80.1) Par.?

na vāribhedato bhinnāstathaivaikyādidaṃ jagat // (80.2) Par.?

yathāgner arciṣaḥ pītāḥ piṅgalāruṇadhūsarāḥ / (81.1) Par.?

tathāpi nāgnito bhinnās tathaitad brahmaṇo jagat // (81.2) Par.?

bhavatībhiśca yat kṣobham asmākaṃ sa puraṃdaraḥ / (82.1) Par.?

kārayatyasad etac ca vivekācāracetasām // (82.2) Par.?

bhavantyaḥ sa ca devendro lokāśca sasurāsurāḥ / (83.1) Par.?

samudrādrivanopetā maddehāntaragocarāḥ // (83.2) Par.?

yatheyaṃ cārusarvāṅgī bhavatīnāṃ mayāgrataḥ / (84.1) Par.?

darśitā darśayiṣyāmi tathā caivākhilaṃ jagat // (84.2) Par.?

prayātu śakro mā garvamindratvaṃ kasya susthiram / (85.1) Par.?

yūyaṃ ca mā smayaṃ yāta santi rūpānvitāḥ striyaḥ // (85.2) Par.?

kiṃ surūpaṃ kurūpaṃ vā yadā bhedo na dṛśyate / (86.1) Par.?

tāratamyaṃ surūpatve satataṃ bhinnadarśanāt // (86.2) Par.?

bhavatīnāṃ smayaṃ matvā rūpaudāryaguṇodbhavam / (87.1) Par.?

mayeyaṃ darśitā tanvī tatastu śamameṣyatha // (87.2) Par.?

yasmān madūrorniṣpannā tviyamindīvarekṣaṇā / (88.1) Par.?

urvaśī nāma kalyāṇī bhaviṣyati varāpsarāḥ // (88.2) Par.?

tadiyaṃ devarājasya nīyatāṃ varavarṇinī / (89.1) Par.?

bhavatyastena cāsmākaṃ preṣitāḥ prītimicchatā // (89.2) Par.?

vaktavyaśca sahasrākṣo nāsmākaṃ bhogakāraṇāt / (90.1) Par.?

tapaścaryā na vāprāpyaphalaṃ prāptum abhīpsatā // (90.2) Par.?

sanmārgamasya jagato darśayiṣye karomyaham / (91.1) Par.?

tathā nareṇa sahito jagataḥ pālanodyataḥ // (91.2) Par.?

yadi kaścittavābādhāṃ karoti tridaśeśvara / (92.1) Par.?

tamahaṃ vārayiṣyāmi nivṛtto bhava vāsava // (92.2) Par.?

kartāsi cet tvam ābādhāṃ na duṣṭasyeha kasyacit / (93.1) Par.?

taṃ cāpi śāstā tadahaṃ pravartiṣyāmy asaṃśayam // (93.2) Par.?

etajjñātvā na santāpastvayā kāryo hi māṃ prati / (94.1) Par.?

upakārāya jagatām avatīrṇo 'smi vāsava // (94.2) Par.?

yā ceyamurvaśī mattaḥ samudbhūtā puraṃdara tretāgnihetubhūteyaṃ evaṃ prāpya bhaviṣyati // (95.1) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe narmadāmāhātmye śrīpatyutpattivarṇanaṃ nāma dvinavatyuttaraśatatamo 'dhyāyaḥ // (96.1) Par.?

Duration=1.394287109375 secs.