Texts

śrīmārkaṇḍeya uvāca / (1.1) Par.?

tataḥ krośāntare gacched alikātīrthamuttamam / (1.2) Par.?

alikā nāma gāndharvī kuśīlā kuṭilāśayā // (1.3) Par.?

citrasenasya dauhitrī vidyānandamṛṣiṃ gatā / (2.1) Par.?

vavre te svīkṛtā tena daśavarṣāṇi taṃ śritā // (2.2) Par.?

patiṃ jaghāna taṃ suptaṃ kasmiṃścit kāraṇāntare / (3.1) Par.?

gatvā nivedayāmāsa pitaraṃ ratnavallabham // (3.2) Par.?

pitrā mātrā ca saṃtyaktā bahubhirbhartsitā nṛpa / (4.1) Par.?

garbhaghnī tvaṃ patighnī tvamiti darśaya mā mukham // (4.2) Par.?

brahmaghnī yāhi pāpiṣṭhe parityaktā gṛhādvraja // (5.1) Par.?

mārkaṇḍeya uvāca / (6.1) Par.?

iti duḥkhānvitā mūḍhā tābhyāṃ nirbhartsitā satī / (6.2) Par.?

tanuṃ tyaktuṃ manaścakre prāpya tīrthāntaraṃ kvacit // (6.3) Par.?

saṃpṛcchyamānā tīrthāni brāhmaṇebhyo yudhiṣṭhira / (7.1) Par.?

śrutvā pāpaharaṃ tīrthaṃ revāsāgarasaṅgame // (7.2) Par.?

tatra pārtha tapaścakre nirāhārā jitavratā / (8.1) Par.?

kṛcchrātikṛcchrapārākamahāsāṃtapanādibhiḥ // (8.2) Par.?

cāndrāyaṇairbrahmakūrcaiḥ karśayāmāsa vai tanum / (9.1) Par.?

evaṃ varṣaśataṃ sārddhaṃ vyatītaṃ tapasā nṛpa // (9.2) Par.?

tasyā viśuddhim icchantyāḥ śivadhyānārcanādibhiḥ / (10.1) Par.?

tataḥ katipayāhobhis tasyā jñātvā haṭhaṃ param / (10.2) Par.?

parituṣṭaḥ śivaḥ prāha pārvatyā paricoditaḥ // (10.3) Par.?

īśvara uvāca / (11.1) Par.?

putri mā sāhasaṃ kārṣīḥ śuddhadehāsi sāmpratam / (11.2) Par.?

tuṣṭo 'haṃ tapasā te 'dya varaṃ varaya vāñchitam // (11.3) Par.?

alikovāca / (12.1) Par.?

yadi tuṣṭo 'si deveśa varārhā yadyahaṃ matā / (12.2) Par.?

nānāpāpāgnitaptāyā dehi śuddhiṃ parāṃ mama // (12.3) Par.?

tvaṃ me nātho hyanāthāyāstvameva jagatāṃ guruḥ / (13.1) Par.?

dīnānāthasamuddhartā śaraṇyaḥ sarvadehinām // (13.2) Par.?

īśvara uvāca / (14.1) Par.?

tvaṃ bhadre śuddhadehāsi mā kiṃcid anuśocithāḥ / (14.2) Par.?

svanāmnā sthāpayitveha māṃ tataḥ svargameṣyasi // (14.3) Par.?

ityuktvā devadeveśastatraivāntaradhīyata / (15.1) Par.?

alikāpi tato bhaktyā snātvā saṃsthāpya śaṅkaram // (15.2) Par.?

dattvā dānaṃ ca viprebhyo lokamāpa mahotkaṭam / (16.1) Par.?

pitaraṃ ca samāsādya mātaraṃ ca yudhiṣṭhira // (16.2) Par.?

taiśca saṃmānitā prītyā bandhubhiḥ sālikā tataḥ / (17.1) Par.?

vimānavaramārūḍhā divyamālānvitā nṛpa // (17.2) Par.?

gaurīlokamanuprāptasakhitve 'dyāpi modate / (18.1) Par.?

tataḥ prabhṛti tatpārtha vikhyātam alikeśvaram // (18.2) Par.?

tatra tīrthe tu yā nārī puruṣo vā yudhiṣṭhira / (19.1) Par.?

snātvā sampūjayedbhaktyā mahādevamumāyutam // (19.2) Par.?

sa pāpairvividhairmukto lokamāpnoti śāṃkaram / (20.1) Par.?

mānasaṃ vācikaṃ pāpaṃ kāyikaṃ yatpurā kṛtam // (20.2) Par.?

sarvaṃ tadvilayaṃ yāti bhojayitvā dvijānsadā / (21.1) Par.?

dīpaṃ dattvā ca devāgre na rogaiḥ paribhūyate // (21.2) Par.?

dhūpapātraṃ vimānaṃ ca ghaṇṭāṃ kalaśameva ca / (22.1) Par.?

dattvā devāya rājendra śākraṃ lokamavāpnuyāt // (22.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe revāsāgarasaṅgame 'likeśvaratīrthamāhātmyavarṇanaṃ nāma pañcaviṃśatyadhikadviśatatamo 'dhyāyaḥ // (23.1) Par.?