Texts

śrīmārkaṇḍeya uvāca / (1.1) Par.?

tato gaccheddharādhīśa tīrthaṃ paramaśobhanam / (1.2) Par.?

jamadagniriti khyātaṃ yatra siddho janārdanaḥ // (1.3) Par.?

yudhiṣṭhira uvāca / (2.1) Par.?

kathaṃ siddho dvijaśreṣṭha vāsudevo jagadguruḥ / (2.2) Par.?

mānuṣaṃ rūpamāsthāya lokānāṃ hitakāmyayā // (2.3) Par.?

etatsarvaṃ yathānyāyaṃ devadevasya cakriṇaḥ / (3.1) Par.?

caritaṃ śrotum icchāmi kathyamānaṃ tvayānagha // (3.2) Par.?

śrīmārkaṇḍeya uvāca / (4.1) Par.?

āsītpūrvaṃ mahārāja haihayādhipatirmahān / (4.2) Par.?

kārtavīrya iti khyāto rājā bāhusahasravān // (4.3) Par.?

hastyaśvarathasampannaḥ sarvaśastrabhṛtāṃ varaḥ / (5.1) Par.?

vedavidyāvratasnātaḥ sarvabhūtābhayapradaḥ // (5.2) Par.?

māhiṣmatyāḥ patiḥ śrīmānrājā hyakṣauhiṇīpatiḥ / (6.1) Par.?

sa kadācinmṛgānhantuṃ nirjagāma mahābalaḥ // (6.2) Par.?

bahubhir divasaiḥ prāpto bhṛgukacchamanuttamam / (7.1) Par.?

jamadagnir mahātejā yatra tiṣṭhati tāpasaḥ // (7.2) Par.?

reṇukāsahitaḥ śrīmānsarvabhūtābhayapradaḥ / (8.1) Par.?

tasya putro 'bhavadrāmaḥ sākṣānnārāyaṇaḥ prabhuḥ // (8.2) Par.?

sarvakṣatraguṇairyukto brahmavidbrāhmaṇottamaḥ / (9.1) Par.?

toṣayanparayā bhaktyā pitarau paramārthavat // (9.2) Par.?

taṃ tadā cārjunaṃ dṛṣṭvā jamadagniḥ pratāpavān / (10.1) Par.?

carantaṃ mṛgayāṃ gatvā hyātithyena nyamantrayat // (10.2) Par.?

tatheti coktvā sa nṛpaḥ sabhṛtyabalavāhanaḥ / (11.1) Par.?

jagāma cāśramaṃ puṇyamṛṣestasya mahātmanaḥ // (11.2) Par.?

tatkṣaṇād eva sampannaṃ śriyā paramayā vṛtam / (12.1) Par.?

vismayaṃ paramaṃ tatra dṛṣṭvā rājā jagāma ha // (12.2) Par.?

gatamātrastu siddhena paramānnena bhojitaḥ / (13.1) Par.?

sabhṛtyabalavānrājā brāhmaṇena yadṛcchayā / (13.2) Par.?

kimetad iti papraccha kāraṇaṃ śaktimeva ca // (13.3) Par.?

kāmadhenoḥ prabhāvaṃ taṃ jñātvā prāha tato dvijam / (14.1) Par.?

dakṣiṇāṃ dehi me vipra kalmaṣāṃ dhenumuttamām // (14.2) Par.?

śataṃ śatasahasrāṇām ayutaṃ niyutaṃ param / (15.1) Par.?

bhūṣitānāṃ ca dhenūnāṃ dadāmi tava cārbudam // (15.2) Par.?

jamadagnir uvāca / (16.1) Par.?

ayutaiḥ prayutair nāhaṃ śatakoṭibhiruttamām / (16.2) Par.?

kāmadhenumimāṃ tāta na dadmi pratigamyatām // (16.3) Par.?

evamuktaḥ sa rājendras tena vipreṇa bhārata / (17.1) Par.?

krodhasaṃraktanayana idaṃ vacanamabravīt // (17.2) Par.?

yasyedṛśaḥ kāmacāro mayyapi dvijapāṃsana / (18.1) Par.?

ahaṃ te paśyatastasmānnayāmi surabhiṃ gṛhāt // (18.2) Par.?

dvija uvāca / (19.1) Par.?

kaḥ krīḍati saroṣeṇa nirbhayo hi mahāhinā / (19.2) Par.?

mṛtyudṛṣṭotareṇāpi mama dhenuṃ nayeta yaḥ // (19.3) Par.?

evamuktvā mahādaṇḍaṃ brahmadaṇḍamivāparam / (20.1) Par.?

gṛhītvā paramakruddho jamadagniruvāca ha // (20.2) Par.?

yasyāsti śaktistejo vā kṣatriyasya kulādhamaḥ / (21.1) Par.?

dhenuṃ nayatu me sadyaḥ kṣīṇāyuḥ saparicchadaḥ // (21.2) Par.?

etacchrutvā vacaḥ krūraṃ haihayaḥ śataśo vṛtaḥ / (22.1) Par.?

dhāvamānaḥ kṣititale brahmadaṇḍahato 'patat // (22.2) Par.?

huṃkṛtena tato dhenvāḥ khaḍgapāśāsipāṇayaḥ / (23.1) Par.?

nirgacchantaḥ pradṛśyante kalmaṣāyāḥ sahasraśaḥ // (23.2) Par.?

nāsāpuṭāgrādromāgrātkirātā māgadhā gudāt / (24.1) Par.?

randhrāntareṣu cotpannāḥ śataśo 'tha sahasraśaḥ // (24.2) Par.?

evamanyo 'nyamāhatya haihayaṣṭaṅkaṇāndahan / (25.1) Par.?

vināśaṃ saha vipreṇa gatā hyarjunatejasā // (25.2) Par.?

kārtavīryo jayaṃ labdhvā saṃkhye hatvā dvijottamam / (26.1) Par.?

jagāma svāṃ purīṃ hṛṣṭaḥ kṛtāntavaśamohitaḥ // (26.2) Par.?

tatastvarānvitaḥ prāptaḥ paścādrāmo gate ripau / (27.1) Par.?

ākrandamānāṃ jananīṃ dadarśa piturantike // (27.2) Par.?

rāma uvāca / (28.1) Par.?

kenedamātmanāśāya hyajñānāt sāhasaṃ kṛtam / (28.2) Par.?

mama tātaṃ jighāṃsuryo draṣṭuṃ mṛtyumihecchati // (28.3) Par.?

tataḥ sā rāmavākyena gatasattveva vihvalā / (29.1) Par.?

udaraṃ karayugmena tāḍayantī hyuvāca tam // (29.2) Par.?

arjunena nṛśaṃsena kṣatriyair aparaiḥ saha / (30.1) Par.?

ihāgatya pitā tena nihato bāhuśālinā // (30.2) Par.?

taṃ paśya nihataṃ tātaṃ gatāsuṃ gatacetasam / (31.1) Par.?

saṃskṛtya vidhivatputra tarpayasva yathātatham // (31.2) Par.?

etacchrutvā sa vacanaṃ jananīm abhivādya tām / (32.1) Par.?

pratijñām akarod yāṃ tāṃ śṛṇuṣva ca narādhipa // (32.2) Par.?

triḥsaptakṛtvaḥ pṛthivīṃ niḥkṣatriyakulānvayām / (33.1) Par.?

snātvā ca teṣām asṛjā tarpayiṣyāmi te patim // (33.2) Par.?

tasyāpi paraśunā bāhūn kārtavīryasya durmateḥ / (34.1) Par.?

chittvā pāsyāmi rudhiramiti satyaṃ śṛṇuṣva me // (34.2) Par.?

evaṃ pratijñāṃ kṛtvāsau jāmadagnyaḥ pratāpavān / (35.1) Par.?

krodhena mahatāviṣṭaḥ saṃskṛtya pitaraṃ tataḥ // (35.2) Par.?

māhiṣmatīṃ purīṃ rāmo jagāma krodhamūrchitaḥ / (36.1) Par.?

chittvā bāhuvanaṃ tasya hatvā taṃ kṣatriyādhamam // (36.2) Par.?

jagāma kṣatriyāntāya pṛthivīm avalokayan / (37.1) Par.?

saptadvīpārṇavayutāṃ saśailavanakānanām // (37.2) Par.?

pūrvataḥ paścimāmāśāṃ dakṣiṇottarataḥ kurūn / (38.1) Par.?

samantapañcake pañca cakāra rudhirahradān // (38.2) Par.?

sa teṣu rudhirāmbhastu hradeṣu krodhamūrchitaḥ / (39.1) Par.?

pitṝn saṃtarpayāmāsa rudhireṇeti naḥ śrutam // (39.2) Par.?

atharcīkādaya upetya pitaro brāhmaṇarṣabham / (40.1) Par.?

taṃ kṣamasveti jagadus tataḥ sa virarāma ha // (40.2) Par.?

teṣāṃ samīpe yo deśo hradānāṃ rudhirāmbhasām / (41.1) Par.?

samaṃ tapaṃ cakram iti puṇyaṃ tatparikīrtitam // (41.2) Par.?

nivartya karmaṇastasmāt pitṝn provāca pāṇḍava / (42.1) Par.?

rāmaḥ paramadharmātmā yadidaṃ rudhiraṃ mayā // (42.2) Par.?

kṣiptaṃ pañcasu tīrtheṣu tadbhūyāt tīrthamuttamam / (43.1) Par.?

tathetyuktvā tu te sarve pitaro 'dṛśyatāṃ gatāḥ // (43.2) Par.?

evaṃ rāmasya saṃsargo devamārge yudhiṣṭhira / (44.1) Par.?

sarvapāpakṣayakaro darśanātsparśanān nṛṇām // (44.2) Par.?

reṇukāpratyayārthāya adyāpi pitṛdevatāḥ / (45.1) Par.?

dṛśyante devamārgasthāḥ sarvapāpakṣayaṃkarāḥ // (45.2) Par.?

tatra tīrthe tu rājendra narmadodadhisaṅgame / (46.1) Par.?

sthānaṃ kṛtvā vidhānena mucyante pātakairnarāḥ // (46.2) Par.?

kuśāgreṇāpi kaunteya na spṛṣṭavyo mahodadhiḥ / (47.1) Par.?

anena tatra mantreṇa snātavyaṃ nṛpasattama // (47.2) Par.?

namaste viṣṇurūpāya namastubhyam apāṃ pate / (48.1) Par.?

sānnidhyaṃ kuru deveśa sāgare lavaṇāmbhasi / (48.2) Par.?

iti sparśanamantraḥ // (48.3) Par.?

agniśca tejo mṛḍayā ca dehe reto 'tha viṣṇuramṛtasya nābhiḥ / (49.1) Par.?

etad bruvan pāṇḍava satyavākyaṃ tato 'vagāheta patiṃ nadīnām // (49.2) Par.?

pañcaratnasamāyuktaṃ phalapuṣpākṣatairyutam / (50.1) Par.?

mantreṇānena rājendra dadyādarghaṃ mahodadheḥ // (50.2) Par.?

sarvaratnanidhānastvaṃ sarvaratnākarākaraḥ / (51.1) Par.?

sarvāmarapradhāneśa gṛhāṇārghaṃ namo 'stu te / (51.2) Par.?

ityarghamantraḥ // (51.3) Par.?

ā janmajanitāt pāpānmāmuddhara mahodadhe / (52.1) Par.?

yāhyarcito ratnanidhe parvatān pārvaṇottama / (52.2) Par.?

iti visarjanamantraḥ // (52.3) Par.?

ko 'paraḥ sāgarāddevātsvargadvāravipāṭana / (53.1) Par.?

tatra sāgaraparyantaṃ mahātīrthamanuttamam // (53.2) Par.?

jāmadagnyena rāmeṇa tatra devaḥ pratiṣṭhitaḥ / (54.1) Par.?

yatra devāḥ sagandharvā munayaḥ siddhacāraṇāḥ // (54.2) Par.?

upāsate virūpākṣaṃ jamadagnim anuttamam / (55.1) Par.?

reṇukāṃ caiva ye devīṃ paśyanti bhuvi mānavāḥ // (55.2) Par.?

priyavāse śive loke vasanti kālamīpsitam / (56.1) Par.?

tatra snātvā naro rājaṃstarpayanpitṛdevatāḥ // (56.2) Par.?

tārayen narakādghorāt kulānāṃ śatamuttaram / (57.1) Par.?

snātvā dattvātra sahitāḥ śrutvā vai bhaktipūrvakam // (57.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe jāmadagnyatīrthamāhātmyavarṇanaṃ nāmāṣṭādaśādhikadviśatatamo 'dhyāyaḥ // (58.1) Par.?