Texts

svādurasopeto guruguṇayuktaś ca godhūmo madhurarasopadiṣṭaṃ vātajittvaṃ yat karma tatkaroti samānapratyayārabdhatvāt // (1) Par.?

yavastu svādurasopeto guruguṇayuktaśca madhurarasopadiṣṭaṃ yadvātajittvaṃ karma tanna karoti api tu vātakṛttvameva karoti vicitrapratyayārabdhatvāt // (2) Par.?

matsyaḥ svādurasopeto guruguṇopetaśca na madhurarasopadiṣṭaḥ śītavīryaḥ kiṃ tarhi uṣṇavīryaḥ vicitrapratyayārabdhatvāt // (3) Par.?

kṣīraṃ ca svādurasopetaṃ guruguṇayuktaṃ ca madhurarasopadiṣṭaṃ śītavīryam samānapratyayārabdhatvāt // (4) Par.?

svādurasayukto guruguṇayuktaśca siṃho na yathārasaṃ madhuravipākaḥ kiṃ tarhi kaṭuko vipāke vicitrapratyayārabdhatvāt // (5) Par.?

śūkaro madhurarasayukto guruguṇopetaśca yathārasaṃ madhuravipāka eva samānapratyayārabdhatvāt // (6) Par.?

evaṃ yāni samānapratyayārabdhāni dravyāṇi teṣāṃ rasopadeśenaiva guṇā nirdiṣṭā bhavanti // (7) Par.?

tathā ca muniḥ / (8.1) Par.?

śītaṃ vīryeṇa yaddravyaṃ madhuraṃ rasapākayoḥ / (8.2) Par.?

tayoramlaṃ yaduṣṇaṃ ca yaccoktaṃ kaṭukaṃ tayoḥ // (8.3) Par.?

teṣāṃ rasopadeśena nirdiṣṭo guṇasaṃgrahaḥ / (9.1) Par.?

vīryato'viparītānāṃ pākataścopadekṣyate // (9.2) Par.?

yathā payo yathā sarpiryathā vā cavyacitrakau / (10.1) Par.?

evamādīni cānyāni nirdiśedrasato bhiṣak // (10.2) Par.?

iti // (11) Par.?

bāhulyena ca rasādisamānapratyayārabdhānyeva dravyāṇīti cetasi kṛtvācāryo 'vocat / (12.1) Par.?

yathā gurvādayo guṇā dravye pṛthivyādau rasāśraye / (12.2) Par.?

raseṣu vyapadiśyante sāhacaryopacārataḥ // (12.3) Par.?

iti // (13) Par.?

ata eva ca bahutarāṇi dravyāṇi rasādisamānapratyayārabdhāni ato rasopadeśavyāptyā tāni nirdeṣṭuṃ śakyante nānyathā // (14) Par.?

vicitrapratyayārabdhāni punaḥ katipayānyeva dravyāṇi tāni pratidravyam evopadiśyante // (15) Par.?

munināpyayam artho yuktyaivoktaḥ / (16.1) Par.?

yathā madhuraṃ kiṃcid uṣṇaṃ syātkaṣāyaṃ tiktameva ca / (16.2) Par.?

yathā mahatpañcamūlaṃ yathā cānūpamāmiṣam // (16.3) Par.?

lavaṇaṃ saindhavaṃ noṣṇamamlamāmalakaṃ yathā / (17.1) Par.?

arkāguruguḍūcīnāṃ tiktānāṃ coṣṇam ucyate // (17.2) Par.?

kiṃcid amlarasaṃ grāhi kiṃcid amlaṃ bhinatti ca / (18.1) Par.?

yathā kapitthaṃ saṃgrāhi bhedi cāmalakaṃ yathā // (18.2) Par.?

pippalīnāgaraṃ vṛṣyaṃ kaṭu cāvṛṣyamucyate / (19.1) Par.?

kaṣāyaḥ stambhanaḥ śītaḥ so 'bhayāyā mato'nyathā // (19.2) Par.?

tasmādrasopadeśena na sarvaṃ dravyamādiśet // (20) Par.?

iti // (21) Par.?

ye ca rasasaṃyogā vakṣyamāṇāste rasādisamānapratyayārabdhair madhurāmlalavaṇatiktakaṭukaṣāyarūpair mithaḥ kalpanīyāḥ na tu vicitrapratyayārabdhair madhurāmlalavaṇatiktakaṭukaṣāyarūpaiḥ // (22) Par.?

yasmātteṣāṃ na yathāśāstranirūpitā rasavīryavipākādayo vidyante vicitrapratyayārabdhatvāt // (23) Par.?

ato rasopadeśavyāptyā tair dravyaiste rasasaṃyogāḥ kalpayituṃ na yujyante // (24) Par.?

ayaṃ rasasaṃyogabheda evaṃ guṇo'yamevaṃguṇaḥ evaṃguṇatvāc cāmuṣmin viṣaye yojya etasmin viṣaye cāyamiti nirdeṣṭuṃ na śakyate anirjñātasvarūpatvāt // (25) Par.?

na hi vicitrapratyayārabdhairye rasasaṃyogāḥ kriyante teṣāṃ svarūpaṃ katham apyavadhārayituṃ śakyate // (26) Par.?

api ca samānapratyayārabdhair ye saṃyogāḥ kalpyante teṣāṃ saṃyogināṃ vīryato yo virodhaḥ śītoṣṇalakṣaṇaḥ sa na doṣāya // (27) Par.?

ye tu vicitrapratyayārabdhaiḥ saṃyogāḥ kalpyante teṣāṃ saṃyogināṃ yaḥ śītoṣṇalakṣaṇo virodhaḥ sa doṣāyeti vedyam // (28) Par.?

anyathā rasālāpānakādīnām anekadravyakṛtānām anabhyavahāra eva prāpnuyāt // (29) Par.?

tathā trayastriṃśadvargā ye vakṣyamāṇāsteṣu yadayaugikaṃ taj jahyāt yaugikaṃ tv anuktamapi yuñjyād iti yadvakṣyate tatra rasādisamānapratyayārabdham eva yojyam na vicitrapratyayārabdham // (30) Par.?

tasya rasavīryavipākānāṃ niścayasya kartumaśakyatvāt // (31) Par.?

tasmād ityādi // (32) Par.?

yata evaṃ vicitrapratyayārabdhaṃ vicitrarūpam tasmādrasopadeśena na tatsarvaṃ dravyamādiśet api tu rasādisamānapratyayārabdham eva dravyaṃ rasopadeśena nirdiśed iti // (33) Par.?

iti śrīmṛgāṅkadattaputraśrīmadaruṇadattaviracitāyām aṣṭāṅgahṛdayaṭīkāyāṃ sarvāṅgasundarākhyāyāṃ sūtrasthāne dravyādivijñānīyādhyāyo navamaḥ samāptaḥ // (34) Par.?