Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 5321

Click on a sentence to show its analysis
Keep the mouse pointer over a lemma to show its meanings.

Śataśṛṅga Berg und Koṭitīrtha Geschichte

sūta uvāca / (1.1) Par.?

śṛṇu rājan pravakṣyāmi śataśṛṅgagireḥ kathām / (1.2) Par.?

koṭitīrthasya cotpattiṃ māhātmyam api puṇyadam // (1.3) Par.?

āsan himavataḥ pṛṣṭhe trīṇi sthānāni pārthiva / (2.1) Par.?

pūrvasyām indranīlādrir viṣṇoḥ sthānam anuttamam // (2.2) Par.?

paścime śaṅkarasthānaṃ kailāsādrir abhūn nṛpa / (3.1) Par.?

brahmaṇo vasatir madhye śataśṛṅgagirir mahān // (3.2) Par.?

campakādyair vṛto vṛkṣaiḥ sarvartukusumānvitaiḥ / (4.1) Par.?

devagandharvasiddhādyaiḥ puṇyais tīrthaiḥ samanvitaḥ // (4.2) Par.?

athaikadā tu garuḍaḥ sarpaṃ durmukhanāmakam / (5.1) Par.?

gṛhītvā khe caraṃs tasya śataśṛṅgasya mūrdhani // (5.2) Par.?

sarpaṃ tam attukāmaḥ sann adho vṛkṣān vyalokayat / (6.1) Par.?

tāvat tasya mukhād bhraṣṭo durmukho bilam āviśat // (6.2) Par.?

tam anviṣyan na labdhvaiva krodhād utpāṭya taṃ girim / (7.1) Par.?

gṛhītvākāśamārgeṇa yayau khagapatir balī // (7.2) Par.?

anekair ṛṣibhiḥ sārdhaṃ brahmā tatrāvasad girau / (8.1) Par.?

āsan dvikoṭitīrthāni śṛṅge himavataḥ śubhe // (8.2) Par.?

athedaṃ gāruḍaṃ karma buddhvā brahmā cukopa ha / (9.1) Par.?

trailokyabhāraṃ bhagavān ātmany ādhāya satvaram // (9.2) Par.?

dadhānaṃ śataśṛṅgaṃ taṃ pīḍayāmāsa vai dvijam / (10.1) Par.?

tasmin kāle sa garuḍo gokarṇasyopari sthitaḥ // (10.2) Par.?

bhāreṇa duḥkhito'tyantaṃ dṛṣṭvādhastāt tapovane / (11.1) Par.?

agastyaṃ śaraṇaṃ yāce kṛpālo rakṣa mām iti // (11.2) Par.?

agastyas tadvacaḥ śrutvā mā bhaiṣīr iti ca bruvan / (12.1) Par.?

majjantam abdhau sagiriṃ garuḍaṃ vīkṣya suvrataḥ // (12.2) Par.?

avatārya giriṃ tatra rudrayonyās tu dakṣiṇe / (13.1) Par.?

nidhāyāmbhonidhau tārkṣyaṃ mocayāmāsa līlayā // (13.2) Par.?

tato dhyānena vijñāya brahmā tatrāgamat prabhuḥ / (14.1) Par.?

agastyaṃ ślāghayitvātha garuḍaṃ cedam abravīt // (14.2) Par.?

bho vatsa śaṅkarasyaiva manasā cintitaṃ tv idam / (15.1) Par.?

nimittamātraṃ tvam asi tatprīto 'smi varaṃ vṛṇu // (15.2) Par.?

garuḍa uvāca / (16.1) Par.?

trailokyabhāraṃ bhagavan voḍhum icchāmy ayatnataḥ / (16.2) Par.?

na matto 'nyo 'dhiko loke bhavitavyaḥ parākrame // (16.3) Par.?

brahmovāca / (17.1) Par.?

trailokyabhāravahane śaktis te syād ayatnataḥ / (17.2) Par.?

tattrilokaguruṃ viṣṇuṃ sarvadā vaha suvrata // (17.3) Par.?

nākramiṣyanty āyudhāni tvāṃ sarvebhyo 'dhiko 'py asi / (18.1) Par.?

iti tasmai varaṃ datvā rudram ārādhya tadgirau // (18.2) Par.?

kamaṇḍaluṃ ca saṃsthāpya sarvatīrtham ayaṃ svakam / (19.1) Par.?

brahmā brahmarṣibhiḥ sārdhaṃ satyalokaṃ jagāma ha // (19.2) Par.?

garuḍo'pi varaṃ labdhvā tapasārādhya śaṃkaram / (20.1) Par.?

svanāmnā tīrtham utpādya sthāpayitvā svavigraham // (20.2) Par.?

agastyam abhivādyātha yato viṣṇus tato gataḥ / (21.1) Par.?

tad etadbhuvi vikhyātaṃ gāruḍaṃ tīrtham uttamam // (21.2) Par.?

āśramo 'pi ca tasyaiva nāmnā garuḍamaṇḍapam / (22.1) Par.?

agastyatīrthād vāyavyāṃ vartate nṛpa tatra yaḥ // (22.2) Par.?

snātvā garuḍagāyatrīṃ caturlakṣaṃ japen naraḥ / (23.1) Par.?

so 'ṇimādimahāsiddhiṃ labhate nātra saṃśayaḥ // (23.2) Par.?

agastyo'pi mahātejāḥ svanāmnā tīrtham uttamam / (24.1) Par.?

vidhāya liṅgaṃ saṃsthāpya varadeśvaranāmakam // (24.2) Par.?

bahukālaṃ tapaḥ kṛtvā siddhiṃ prāpya maheśvarāt / (25.1) Par.?

yathākāmaṃ sa gokarṇe sthitavān munisattamaḥ // (25.2) Par.?

śataśṛṅgaṃ girivaraṃ nākapṛṣṭhaṃ vidur budhāḥ / (26.1) Par.?

brahmaloka iti prokto brahmāvāsaṃ ca taṃ viduḥ // (26.2) Par.?

rudrājñayā sārabhūtaṃ sarvaṃ tatrāgataṃ hy abhūt / (27.1) Par.?

sūta uvāca / (27.2) Par.?

garuḍenānīyamāne girau tasya bhayād iva // (27.3) Par.?

tatratyakoṭitīrthāni ekībhūtāni vai nṛpa / (28.1) Par.?

koṭitīrtham iti khyātaṃ sarvapāpapraṇāśanam // (28.2) Par.?

tad adya dṛśyate rājañchataśṛṅgottare taṭe / (29.1) Par.?

tasmin snātaḥ sarvatīrthe snāto bhavati mānavaḥ // (29.2) Par.?

daśāśvamedhāvabhṛthena sāmyaṃ vadanty āptāḥ koṭitīrthe dvijāgryāḥ / (30.1) Par.?

mahat puṇyaṃ puṇyakṛtāṃ variṣṭhaṃ snātās tasmin nākapṛṣṭhaṃ vrajanti // (30.2) Par.?

anyāni koṭitīrthāni paryastāny atha sāgare / (31.1) Par.?

śataśṛṅgagires tasya taṭe dakṣiṇapaścime // (31.2) Par.?

api pāpaśataṃ kṛtvā brahmahatyādi mānavaḥ / (32.1) Par.?

koṭitīrthe snānamātrān mucyate sarvapātakaiḥ // (32.2) Par.?

K￶nig Viṣṇuvarmā und der Ruhm Koṭitīrthas

atraivodāharantīmam itihāsaṃ purātanam / (33.1) Par.?

avantiviṣaye rājā viṣṇuvarmeti cābhavat // (33.2) Par.?

purā kṛtayuge so 'pi svarājyaṃ pratipālayan / (34.1) Par.?

dāsīrajasvalādyāś ca kāmayāmāsa durmatiḥ // (34.2) Par.?

brahmahatyādipāpāni bahūni kṛtavān asau / (35.1) Par.?

tena cākṛtapāpāni na santi dharaṇītale // (35.2) Par.?

atīva pāpasaṃdohād rājayakṣmābhavat tataḥ / (36.1) Par.?

na bhiṣak na ca vā bandhus trātā ko 'pi na vidyate // (36.2) Par.?

na mitraṃ na ca vā rājyaṃ na śaktās tan nivāritum / (37.1) Par.?

tasminn evaṃvidhe rājñi daivayogāt kurūdvaha // (37.2) Par.?

sanako nāma yogīndras tasya geham upāgamat / (38.1) Par.?

nṛpabhāryā puṇyaśīlā natvā yoginam āgatam // (38.2) Par.?

uvāca ślakṣṇayā vācā pāhi māṃ patidānataḥ / (39.1) Par.?

tam āgatam abhipretya viṣṇuvarmā mahāmatiḥ // (39.2) Par.?

pūjayāmāsa vidhivad uvāca vacanaṃ tadā / (40.1) Par.?

kṛtārtho 'smi mahābhāga bhavaddarśanamātrataḥ // (40.2) Par.?

anāthaṃ pāpakarmāṇaṃ vimukhaṃ puṇyakarmaṇi / (41.1) Par.?

durācārarataṃ kāmalolupaṃ pāhi māṃ mune // (41.2) Par.?

janmāntarārjitāt puṇyād bhavato darśanaṃ hy abhūt / (42.1) Par.?

ity uktvā virarāmātha sanakaḥ pratyuvāca tam // (42.2) Par.?

bho rājañchṛṇu vakṣyāmi tvayā yat pūrvasaṃcitam / (43.1) Par.?

bhujyate vivaśeneha trātā nānyo 'sti kaścana // (43.2) Par.?

yatra vṛndāvanaṃ nāsti śālagrāmādipūjanam / (44.1) Par.?

vedaśāstrādivādo vā nāsti sajjanasaṅgamaḥ // (44.2) Par.?

svācārasya parityāgaḥ paradharmaparigrahaḥ / (45.1) Par.?

sadā pāparatir yatra tatra syuḥ sakalā rujaḥ // (45.2) Par.?

pūrvajanmani vā pāpam iha janmani vā kṛtam / (46.1) Par.?

avaśyam eva bhoktavyaṃ rājan karma śubhāśubham // (46.2) Par.?

tvaṃ tu janmāntare jāto veśyāyāṃ śūdrapūruṣāt / (47.1) Par.?

dharmadhvaja iti khyāto lubdhakaḥ prāṇihiṃsakaḥ // (47.2) Par.?

pāpakarmarato nityaṃ devabrahmasvahārakaḥ / (48.1) Par.?

tvam ekadā māghamāse gaṅgātīram upāgataḥ // (48.2) Par.?

tatra svabhartrā snānārtham āgatāṃ dvijavallabhām / (49.1) Par.?

dṛṣṭvaiva kāmasan taptas tām evālakṣayan tataḥ // (49.2) Par.?

vyājena yāpayan kālam avatīrṇaḥ svayaṃ jale / (50.1) Par.?

snānadānādikaṃ karma cakre vipras tayā saha // (50.2) Par.?

tat sarvaṃ dṛṣṭavāṃs tvaṃ tu madavihvalito bhṛśam / (51.1) Par.?

tataḥ svabhavanaṃ yāte dvije tasmin svabhāryayā // (51.2) Par.?

tvam apy anugato rātrau chidraṃ kṛtvā tu tadgṛhe / (52.1) Par.?

praviśyāntar nidritāyās tasyā aṅgaṃ parāmṛśaḥ // (52.2) Par.?

hā cora iti cukrośa sā prabuddhā satī tadā / (53.1) Par.?

militās tatra baddhvā tvāṃ ninyū rājāntikaṃ carāḥ // (53.2) Par.?

rājāpi hastapādaṃ te chedayitvā purād bahiḥ / (54.1) Par.?

niryāpayāmāsa girer mūrdhni nirjanabhīkare // (54.2) Par.?

tena duḥkhena mahatā mṛtas tvaṃ parvatopari / (55.1) Par.?

tadvāsanābalenehāpy asi pāparataḥ sadā // (55.2) Par.?

māghasnānamahimnādya pārthiva tvam avāptavān / (56.1) Par.?

maddarśanam amoghaṃ ca viprasnānādidarśanāt // (56.2) Par.?

pūrvajanmārjitāt pāpād bhuṅkṣe rogādikaṃ tv iha / (57.1) Par.?

pāpaṃ nirayabhogāya puṇyaṃ svargasukhāya hi // (57.2) Par.?

rājovāca / (58.1) Par.?

bhagavan tapyate antar me śrutvā pūrvakathām imām / (58.2) Par.?

smṛtvā ca pāpacaritam iha janmani yat kṛtam // (58.3) Par.?

dhig jīvitaṃ mamaitasya dhruvaṃ narakagāminaḥ / (59.1) Par.?

brahmann evaṃvidhasyāpi niṣkṛtiś ced vada prabho // (59.2) Par.?

sanaka uvāca / (60.1) Par.?

niṣkṛtiṃ sampravakṣyāmi tīvrataptasya te adhunā / (60.2) Par.?

sarvapāpaviśuddhaḥ san yena tvaṃ nīrujo bhaveḥ // (60.3) Par.?

paścimāmbudhitīrasthe gokarṇe kṣetrasattame / (61.1) Par.?

koṭitīrtham iti khyātaṃ vidyate vimalaṃ saraḥ // (61.2) Par.?

snānena tatra pāpāni naśyanty eva na saṃśayaḥ / (62.1) Par.?

bho rājan tava pāpasya yadi niṣkṛtim icchasi // (62.2) Par.?

gokarṇakṣetram āsādya māghamāse 'ruṇodaye / (63.1) Par.?

koṭitīrthe vidhānena snātvārcaya mahābalam // (63.2) Par.?

tadā pāpaviśuddhaḥ san modase suciraṃ nṛpa / (64.1) Par.?

purā tu vighaso nāma brāhmaṇo bhṛguvākyataḥ // (64.2) Par.?

tatra gatvā koṭitīrthe snātvā devaṃ mahābalam / (65.1) Par.?

abhyarcya mahataḥ pāpāt pūtaḥ śivam avāptavān // (65.2) Par.?

ity uktvā sanako yogī yathākāmaṃ jagāma ha / (66.1) Par.?

tataḥ sa rājā gokarṇaṃ māghādau samapadyata // (66.2) Par.?

prātaḥ snātvā koṭitīrthe pūjayitvā mahābalam / (67.1) Par.?

kṛtvā dānāni bahuśaḥ kiṃcit kālaṃ nṛpottama // (67.2) Par.?

sthitvā tatrasthatīrtheṣu nimajya ca yathāvidhi / (68.1) Par.?

tataḥ svarājyam āsādya bhuktvā bhogān yathepsitān // (68.2) Par.?

putrapautraiḥ parivṛtaḥ kṛtvā yajñādikāḥ kriyāḥ / (69.1) Par.?

ante vimānam āruhya patnyā saha divaṃ yayau // (69.2) Par.?

iti śrī tṛtīyo 'dhyāyaḥ // (70.1) Par.?

Duration=0.34562087059021 secs.