Texts

nāgarakaḥ saha mitrajanena paricārakaiśca kṛtapuṣpopahāre saṃcāritasurabhidhūpe ratyāvāse prasādhite vāsagṛhe kṛtasnānaprasādhanāṃ yuktyā pītāṃ striyaṃ sāntvanaiḥ punaḥ pānena copakramet / (1.1) Par.?

dakṣiṇataścāsyā upaveśanam / (1.2) Par.?

keśahaste vastrānte nīvyām ityavalambanam / (1.3) Par.?

ratyarthaṃ savyena bāhunānuddhataḥ pariṣvaṅgaḥ / (1.4) Par.?

pūrvaprakaraṇasambaddhaiḥ parihāsānurāgair vacobhir anuvṛttiḥ / (1.5) Par.?

gūḍhāślīlānāṃ ca vastūnāṃ samasyayā paribhāṣaṇam / (1.6) Par.?

sanṛttam anṛttaṃ vā gītaṃ vāditram / (1.7) Par.?

kalāsu saṃkathāḥ / (1.8) Par.?

punaḥ pānenopacchandanam / (1.9) Par.?

jātānurāgāyāṃ kusumānulepanatāmbūladānena ca śeṣajanavisṛṣṭiḥ / (1.10) Par.?

vijane ca yathoktair āliṅganādibhir enām uddharṣayet / (1.11) Par.?

tato nīvīviśleṣaṇādi yathoktam upakrameta / (1.12) Par.?

ityayaṃ ratārambhaḥ // (1.13) Par.?

ratāvasānikaṃ rāgam ativāhyāsaṃstutayor iva savrīḍayoḥ parasparam apaśyatoḥ pṛthak pṛthag ācārabhūmigamanam / (2.1) Par.?

pratinivṛttya cāvrīḍāyamānayor ucitadeśopaviṣṭayostāmbūlagrahaṇam acchīkṛtaṃ candanam anyad vānulepanaṃ tasyā gātre svayam eva niveśayet / (2.2) Par.?

savyena bāhunā caināṃ parirabhya caṣakahastaḥ sāntvayan pāyayet / (2.3) Par.?

jalānupānaṃ vā khaṇḍakhādyakam anyad vā prakṛtisātmyayuktam ubhāvapyupayuñjīyātām / (2.4) Par.?

accharasakayūṣam amlayavāgūṃ bhṛṣṭamāṃsopadaṃśāni pānakāni cūtaphalāni śuṣkamāṃsaṃ mātuluṅgacukrakāṇi saśarkarāṇi ca yathādeśasātmyaṃ ca / (2.5) Par.?

tatra madhuram idaṃ mṛdu viśadam iti ca vidaśya vidaśya tat tad upāharet / (2.6) Par.?

harmyatalasthitayor vā candrikāsevanārtham āsanam / (2.7) Par.?

tadaṅkasaṃlīnāyāścandramasaṃ paśyantyā nakṣatrapaṅktivyaktīkaraṇam / (2.8) Par.?

arundhatīdhruvasaptarṣimālādarśanaṃ ca / (2.9) Par.?

iti ratāvasānikam // (2.10) Par.?

avasāne api ca prītir upacārair upaskṛtā / (3.1) Par.?

savisrambhakathāyogai ratiṃ janayate parām // (3.2) Par.?

parasparaprītikarair ātmabhāvānuvartanaiḥ / (4.1) Par.?

kṣaṇāt krodhaparāvṛttaiḥ kṣaṇāt prītivilokitaiḥ // (4.2) Par.?

hallīsakakrīḍanakair gāyanair lāṭarāsakaiḥ / (5.1) Par.?

rāgalolārdranayanaiś candramaṇḍalavīkṣaṇaiḥ // (5.2) Par.?

ādye saṃdarśane jāte pūrvaṃ ye syur manorathāḥ / (6.1) Par.?

punarviyoge duḥkhaṃ ca tasya sarvasya kīrtanaiḥ // (6.2) Par.?

kīrtanānte ca rāgeṇa pariṣvaṅgaiḥ sacumbanaiḥ / (7.1) Par.?

taistaiśca bhāvaiḥ saṃyukto yūno rāgo vivardhate // (7.2) Par.?

rāgavad āhāryarāgaṃ kṛtrimarāgaṃ vyavahitarāgaṃ poṭārataṃ khalaratam ayantritaratam iti rataviśeṣāḥ // (8.1) Par.?

saṃdarśanāt prabhṛtyubhayor api pravṛddharāgayoḥ prayatnakṛte samāgame pravāsapratyāgamane vā kalahaviyogayoge tadrāgavat // (9.1) Par.?

tatrātmābhiprāyād yāvadarthaṃ ca pravṛttiḥ // (10.1) Par.?

madhyastharāgayor ārabdhaṃ yad anurajyate tad āhāryarāgam // (11.1) Par.?

tatra cātuḥṣaṣṭikair yogaiḥ sātmyānuviddhaiḥ saṃdhukṣya saṃdhukṣya rāgaṃ pravarteta / (12.1) Par.?

tatkāryahetor anyatra saktayor vā kṛtrimarāgam // (12.2) Par.?

tatra samuccayena yogāñ śāstrataḥ paśyet // (13.1) Par.?

puruṣastu hṛdayapriyām anyāṃ manasi nidhāya vyavaharet / (14.1) Par.?

saṃprayogāt prabhṛti ratiṃ yāvat / (14.2) Par.?

atastadvyavahitarāgam // (14.3) Par.?

nyūnāyāṃ kumbhadāsyāṃ paricārikāyāṃ vā yāvadarthaṃ saṃprayogastatpoṭāratam // (15.1) Par.?

tatropacārān nādriyeta // (16.1) Par.?

tathā veśyāyā grāmīṇena saha yāvadarthaṃ khalaratam // (17.1) Par.?

grāmavrajapratyantayoṣidbhiś ca nāgarakasya // (18.1) Par.?

utpannavisrambhayośca parasparānukūlyād ayantritaratam / (19.1) Par.?

iti ratāni // (19.2) Par.?

vardhamānapraṇayā tu nāyikā sapatnīnām agrahaṇaṃ tadāśrayam ālāpaṃ vā gotraskhalitaṃ vā na marṣayet / (20.1) Par.?

nāyakavyalīkaṃ ca // (20.2) Par.?

tatra subhṛśaḥ kalaho ruditam āyāsaḥ śiroruhāṇām avakṣodanaṃ prahaṇanam āsanācchayanād vā mahyāṃ patanaṃ mālyabhūṣaṇāvamokṣo bhūmau śayyā ca // (21.1) Par.?

tatra yuktarūpeṇa sāmnā pādapatanena vā prasannamanāstām anunayann upakramya śayanam ārohayet // (22.1) Par.?

tasya ca vacanam uttareṇa yojayantī vivṛddhakrodhā sakacagraham asyāsyam unnamayya pādena bāhau śirasi vakṣasi pṛṣṭhe vā sakṛd dvistrir avahanyāt / (23.1) Par.?

dvāradeśaṃ gacchet / (23.2) Par.?

tatropaviśyāśrukaraṇam iti / (23.3) Par.?

atikruddhāpi tu na dvāradeśād bhūyo gacchet / (23.4) Par.?

doṣavattvāt / (23.5) Par.?

iti dattakaḥ / (23.6) Par.?

tatra yuktito 'nunīyamānā prasādam ākāṅkṣet / (23.7) Par.?

prasannāpi tu sakaṣāyair eva vākyair enaṃ tudatīva prasannaratikāṅkṣiṇī nāyakena parirabhyeta // (23.8) Par.?

svabhavanasthā tu nimittāt kalahitā tathāvidhaceṣṭaiva nāyakam abhigacchet / (24.1) Par.?

tatra pīṭhamardaviṭavidūṣakair nāyakaprayuktair upaśamitaroṣā tair evānunītā taiḥ sahaiva tadbhavanam adhigacchet / (24.2) Par.?

tatra ca vaset / (24.3) Par.?

iti praṇayakalahaḥ // (24.4) Par.?

bhavanti cātra ślokāḥ / (25.1) Par.?

evam etāṃ catuḥṣaṣṭiṃ bābhravyeṇa prakīrtitām / (25.2) Par.?

prayuñjāno varastrīṣu siddhiṃ gacchati nāyakaḥ // (25.3) Par.?

bruvann apyanyaśāstrāṇi catuḥṣaṣṭivivarjitaḥ / (26.1) Par.?

vidvatsaṃsadi nātyarthaṃ kathāsu paripūjyate // (26.2) Par.?

varjito 'pyanyavijñānair etayā yastvalaṃkṛtaḥ / (27.1) Par.?

sa goṣṭhyāṃ naranārīṇāṃ kathāsvagraṃ vigāhate // (27.2) Par.?

vidvadbhiḥ pūjitām enāṃ khalair api supūjitām / (28.1) Par.?

pūjitāṃ gaṇikāsaṃghair nandinīṃ ko na pūjayet // (28.2) Par.?

nandinī subhagā siddhā subhagaṃkaraṇīti ca / (29.1) Par.?

nārīpriyeti cācāryaiḥ śāstreṣv eṣā nirucyate // (29.2) Par.?

kanyābhiḥ parayoṣidbhir gaṇikābhiśca bhāvataḥ / (30.1) Par.?

vīkṣyate bahumānena catuḥṣaṣṭivicakṣaṇaḥ // (30.2) Par.?