Texts

arthān ācaryamāṇān anarthā apyanūdbhavantyanubandhāḥ saṃśayāśca // (1.1) Par.?

te buddhidaurbalyād atirāgād atyabhimānād atidambhād atyārjavād ativiśvāsād atikrodhāt pramādāt sāhasād daivayogācca syuḥ // (2.1) Par.?

teṣāṃ phalaṃ kṛtasya vyayasya niṣphalatvam anāyatirāgam iṣyato 'rthasya nivartanam āptasya niṣkramaṇaṃ pāruṣyasya prāptir gamyatā śarīrasya praghātaḥ keśānāṃ chedanaṃ pātanam aṅgavaikalyāpattiḥ / (3.1) Par.?

tasmāt tān ādita eva parijihīrṣed arthabhūyiṣṭhāṃścopekṣeta // (3.2) Par.?

artho dharmaḥ kāma ityarthatrivargaḥ / (4.1) Par.?

anartho 'dharmo dveṣa ityanarthatrivargaḥ / (4.2) Par.?

teṣv ācaryamāṇeṣvanyasyāpi niṣpattir anubandhaḥ / (4.3) Par.?

saṃdigdhāyāṃ tu phalaprāptau syād vā na veti śuddhasaṃśayaḥ / (4.4) Par.?

idaṃ vā syād idaṃ veti saṃkīrṇaḥ / (4.5) Par.?

ekasmin kriyamāṇe kārye kāryadvayasyotpattir ubhayato yogaḥ / (4.6) Par.?

samantād utpattiḥ samantatoyoga iti tān udāhariṣyāmaḥ // (4.7) Par.?

vicāritarūpo 'rthatrivargaḥ / (5.1) Par.?

tadviparīta evānarthatrivargaḥ // (5.2) Par.?

yasyottamasyābhigamane pratyakṣato 'rthalābho grahaṇīyatvam āyatir āgamaḥ prārthanīyatvaṃ cānyeṣāṃ syāt so 'rtho 'rthānubandhaḥ // (6.1) Par.?

lābhamātre kasyacid anyasya gamanaṃ so 'rtho niranubandhaḥ // (7.1) Par.?

anyārthaparigrahe saktād āyaticchedanam arthasya niṣkramaṇaṃ lokavidviṣṭasya vā nīcasya gamanam āyatighnam artho 'narthānubandhaḥ // (8.1) Par.?

svena vyayena śūrasya mahāmātrasya prabhavato vā lubdhasya gamanaṃ niṣphalam api vyasanapratīkārārthaṃ mahataścārthaghnasya nimittasya praśamanam āyatijananaṃ vā so 'nartho 'rthānubandhaḥ // (9.1) Par.?

kadaryasya subhagamāninaḥ kṛtaghnasya vātisaṃdhānaśīlasya svair api vyayaistathārādhanam ante niṣphalaṃ so 'nartho niranubandhaḥ // (10.1) Par.?

tasyaiva rājavallabhasya krauryaprabhāvādhikasya tathaivārādhanam ante niṣphalaṃ niṣkāsanaṃ ca doṣakaraṃ so 'nartho 'narthānubandhaḥ // (11.1) Par.?

evaṃ dharmakāmayor apyanubandhān yojayet // (12.1) Par.?

paraspareṇa ca yuktyā saṃkired ityanubandhāḥ // (13.1) Par.?

paritoṣito 'pi dāsyati na vetyarthasaṃśayaḥ / (14.1) Par.?

niṣpīḍitārtham aphalam utsṛjantyā artham alabhamānāyā dharmaḥ syān na veti dharmasaṃśayaḥ / (14.2) Par.?

abhipretam upalabhya paricārakam anyaṃ vā kṣudraṃ gatvā kāmaḥ syān na veti kāmasaṃśayaḥ / (14.3) Par.?

prabhāvavān kṣudro 'nabhimato 'narthaṃ kariṣyati na vetyanarthasaṃśayaḥ / (14.4) Par.?

atyantaniṣphalaḥ saktaḥ parityaktaḥ pitṛlokaṃ yāyāt tatrādharmaḥ syān na vetyadharmasaṃśayaḥ / (14.5) Par.?

rāgasyāpi vivakṣāyām abhipretam anupalabhya virāgaḥ / (14.6) Par.?

iti śuddhasaṃśayāḥ // (14.7) Par.?

atha saṃkīrṇāḥ // (15.1) Par.?

āgantor aviditaśīlasya vallabhasaṃśrayasya prabhaviṣṇor vā samupasthitasyārādhanam artho 'nartha iti saṃśayaḥ / (16.1) Par.?

śrotriyasya brahmacāriṇo dīkṣitasya vratino liṅgino vā māṃ dṛṣṭvā jātarāgasya mumūrṣor mitravākyād ānṛśaṃsyācca gamanaṃ dharmo 'dharma iti saṃśayaḥ / (16.2) Par.?

lokād evākṛtapratyayād aguṇo guṇavān vety anavekṣya gamanaṃ kāmo dveṣa iti saṃśayaḥ / (16.3) Par.?

saṃkirecca paraspareṇeti saṃkīrṇasaṃśayāḥ // (16.4) Par.?

yatra parasyābhigamane arthaḥ saktācca saṃgharṣataḥ sa ubhayayo 'rthaḥ / (17.1) Par.?

yatra svena vyayena niṣphalam abhigamanaṃ saktāccāmarṣitād vittapratyādānaṃ sa ubhayato 'narthaḥ / (17.2) Par.?

yatrābhigamane artho bhaviṣyati na vetyāśaṅkā sakto 'pi saṃgharṣād dāsyati na veti sa ubhayato 'rthasaṃśayaḥ / (17.3) Par.?

yatrābhigamane vyayavati pūrvo viruddhaḥ krodhād apakāraṃ kariṣyati na veti sakto vāmarṣito dattaṃ pratyādāsyati na veti sa ubhayato 'narthasaṃśayaḥ / (17.4) Par.?

ityauddālaker ubhayatoyogāḥ // (17.5) Par.?

bābhravīyāstu / (18.1) Par.?

yatrābhigamane artho 'nabhigamane ca saktād arthaḥ sa ubhayato 'rthaḥ / (18.2) Par.?

yatrābhigamane niṣphalo vyayo 'nabhigamane ca niṣpratīkāro 'narthaḥ sa ubhayato 'narthaḥ / (18.3) Par.?

yatrābhigamane nirvyayo dāsyati na veti saṃśayo 'nabhigamane sakto dāsyati na veti sa ubhayato 'rthasaṃśayaḥ / (18.4) Par.?

yatrābhigamane vyayavati pūrvo viruddhaḥ prabhāvavān prāpsyate na veti saṃśayo 'nabhigamane ca krodhād anarthaṃ kariṣyati na veti sa ubhayato 'narthasaṃśayaḥ // (18.5) Par.?

eteṣām eva vyatikare anyato 'rtho 'nyato 'nartho 'nyato 'rtho 'nyato 'rthasaṃśayo 'nyato 'rtho 'nyato 'narthasaṃśaya iti ṣaṭsaṃkīrṇayogāḥ // (19.1) Par.?

teṣu sahāyaiḥ saha vimṛśya yato 'rthabhūyiṣṭho 'rthasaṃśayo gurur anarthapraśamo vā tataḥ pravarteta // (20.1) Par.?

evaṃ dharmakāmavapyanayaiva yuktyodāharet / (21.1) Par.?

saṃkirecca paraspareṇa vyatiṣañjayec cetyubhayatoyogāḥ // (21.2) Par.?

sambhūya ca viṭāḥ parigṛhṇantyekām asau goṣṭhīparigrahaḥ / (22.1) Par.?

sā teṣām itastataḥ saṃsṛjyamānā pratyekaṃ saṃgharṣād arthaṃ nirvartayet / (22.2) Par.?

suvasantakādiṣu ca yoge yo me imam amuṃ ca saṃpādayiṣyati tasyādya gamiṣyati me duhiteti mātrā vācayet / (22.3) Par.?

teṣāṃ ca saṃgharṣaje abhigamane kāryāṇi lakṣayet / (22.4) Par.?

ekato 'rthaḥ sarvato 'rthaḥ ekato 'narthaḥ sarvato 'nartho 'rdhato 'rthaḥ sarvato 'rthaḥ ardhato 'narthaḥ sarvato 'narthaḥ / (22.5) Par.?

iti samantato yogāḥ // (22.6) Par.?

arthasaṃśayam anarthasaṃśayaṃ ca pūrvavad yojayet / (23.1) Par.?

saṃkirecca tathā dharmakāmāvapi / (23.2) Par.?

ity anubandhārthānarthasaṃśayavicārāḥ // (23.3) Par.?

kumbhadāsī paricārikā kulaṭā svairiṇī naṭī śilpakārikā prakāśavinaṣṭā rūpājīvā gaṇikā ceti veśyāviśeṣāḥ // (24.1) Par.?

sarvāsāṃ cānurūpeṇa gamyāḥ sahāyāstad uparañjanam arthāgamopāyā niṣkāsanaṃ punaḥ sadhānaṃ lābhaviśeṣānubandhā arthānarthānubandhasaṃśayavicārāśceti vaiśikam // (25.1) Par.?

bhavataścātra ślokau / (26.1) Par.?

ratyarthāḥ puruṣā yena ratyarthāścaiva yoṣitaḥ // (26.2) Par.?

śāstrasyārthapradhānatvāt tena yogo 'tra yoṣitām // (27.1) Par.?

santi rāgaparā nāryaḥ santi cārthaparā api / (28.1) Par.?

prāk tatra varṇito rāgo veśyāyogāśca vaiśike // (28.2) Par.?