Texts

ṛṣaya ūcuḥ / (1.1) Par.?

niṣkalo nirmalo nityo niṣkriyaḥ parameśvaraḥ / (1.2) Par.?

tanno vada mahādeva viśvarūpaḥ kathaṃ bhavān // (1.3) Par.?

īśvara uvāca / (2.1) Par.?

nāhaṃ viśvo na viśvaṃ ca māmṛte vidyate dvijāḥ / (2.2) Par.?

māyānimittamatrāsti sā cātmānamapāśritā // (2.3) Par.?

anādinidhanā śaktirmāyāvyaktasamāśrayā / (3.1) Par.?

tannimittaḥ prapañco 'yamavyaktādabhavat khalu // (3.2) Par.?

avyaktaṃ kāraṇaṃ prāhurānandaṃ jyotirakṣaram / (4.1) Par.?

ahameva paraṃ brahma matto hyanyanna vidyate // (4.2) Par.?

tasmānme viśvarūpatvaṃ niścitaṃ brahmavādibhiḥ / (5.1) Par.?

ekatve ca pṛthaktve ca proktametannidarśanam // (5.2) Par.?

ahaṃ tat paramaṃ brahma paramātmā sanātanaḥ / (6.1) Par.?

akāraṇaṃ dvijāḥ prokto na doṣo hyātmanastathā // (6.2) Par.?

anantāḥ śaktayo 'vyakte māyādyāḥ saṃsthitā dhruvāḥ / (7.1) Par.?

tasmin divi sthitaṃ nityamavyaktaṃ bhāti kevalam // (7.2) Par.?

yābhistallakṣyate bhinnam abhinnaṃ tu svabhāvataḥ / (8.1) Par.?

ekayā mama sāyujyamanādinidhanaṃ dhruvam // (8.2) Par.?

puṃso 'bhūdanyayā bhūtiranyayā tattirohitam / (9.1) Par.?

anādimadhyaṃ tiṣṭhantaṃ yujyate 'vidyayā kila // (9.2) Par.?

tadetat paramaṃ vyaktaṃ prabhāmaṇḍalamaṇḍitam / (10.1) Par.?

tadakṣaraṃ paraṃ jyotistad viṣṇoḥ paramaṃ padam // (10.2) Par.?

tatra sarvamidaṃ protam otaṃ caivākhilaṃ jagat / (11.1) Par.?

tadeva ca jagat kṛtsnaṃ tad vijñāya vimucyate // (11.2) Par.?

yato vāco nivartante aprāpya manasā saha / (12.1) Par.?

ānandaṃ brahmaṇo vidvān bibheti na kutaścana // (12.2) Par.?

vedāhametaṃ puruṣaṃ mahāntamādityavarṇaṃ tamasaḥ parastāt / (13.1) Par.?

tad vijñāya parimucyeta vidvān nityānandī bhavati brahmabhūtaḥ // (13.2) Par.?

yasmāt paraṃ nāparamasti kiṃcit yajjyotiṣāṃ jyotirekaṃ divistham / (14.1) Par.?

tadevātmānaṃ manyamāno 'tha vidvānātmanandī bhavati brahmabhūtaḥ // (14.2) Par.?

tadavyayaṃ kalilaṃ gūḍhadehaṃ brahmānandamamṛtaṃ viśvadhāma / (15.1) Par.?

vadantyevaṃ brāhmaṇā brahmaniṣṭhā yatra gatvā na nivarteta bhūyaḥ // (15.2) Par.?

hiraṇmaye paramākāśatattve yadarciṣi pravibhātīva tejaḥ / (16.1) Par.?

tadvijñāne paripaśyanti dhīrā vibhrājamānaṃ vimalaṃ vyoma dhāma // (16.2) Par.?

tataḥ paraṃ paripaśyanti dhīrā ātmanyātmānamanubhūyānubhūya / (17.1) Par.?

svayaṃprabhaḥ parameṣṭhī mahīyān brahmānandī bhagavānīśa eṣaḥ // (17.2) Par.?

eko devaḥ sarvabhūteṣu gūḍhaḥ sarvavyāpī sarvabhūtāntarātmā / (18.1) Par.?

tamevaikaṃ ye 'nupaśyanti dhīrāsteṣāṃ śāntiḥ śāśvatī netareṣām // (18.2) Par.?

sarvānanaśirogrīvaḥ sarvabhūtaguhāśayaḥ / (19.1) Par.?

sarvavyāpī ca bhagavān na tasmādanyadiṣyate // (19.2) Par.?

ityetadaiśvaraṃ jñānamuktaṃ vo munipuṅgavāḥ / (20.1) Par.?

gopanīyaṃ viśeṣeṇa yogināmapi durlabham // (20.2) Par.?

iti śrīkūrmapurāṇe ṣaṭsāhasryāṃ saṃhitāyāmuparivibhāge īśvaragītāsu navamo 'dhyāyaḥ // (21.1) Par.?