Texts

trayaḥ prācīnā rājamārgāstraya udīcīnā iti vāstuvibhāgaḥ // (1.1) Par.?

sa dvādaśadvāro yuktodakabhramacchannapathaḥ // (2.1) Par.?

caturdaṇḍāntarā rathyāḥ // (3.1) Par.?

rājamārgadroṇamukhasthānīyarāṣṭravivītapathāḥ samyānīyavyūhaśmaśānagrāmapathāś cāṣṭadaṇḍāḥ // (4.1) Par.?

caturdaṇḍaḥ setuvanapathaḥ dvidaṇḍo hastikṣetrapathaḥ pañcāratnayo rathapathaḥ catvāraḥ paśupathaḥ dvau kṣudrapaśumanuṣyapathaḥ // (5.1) Par.?

pravīre vāstuni rājaniveśaś cāturvarṇyasamājīve // (6.1) Par.?

vāstuhṛdayād uttare navabhāge yathoktavidhānam antaḥpuraṃ prāṅmukham udaṅmukhaṃ vā kārayet // (7.1) Par.?

tasya pūrvottaraṃ bhāgam ācāryapurohitejyātoyasthānaṃ mantriṇaścāvaseyuḥ pūrvadakṣiṇaṃ bhāgam mahānasaṃ hastiśālā koṣṭhāgāraṃ ca // (8.1) Par.?

tataḥ paraṃ gandhamālyarasapaṇyāḥ prasādhanakāravaḥ kṣatriyāśca pūrvāṃ diśam adhivaseyuḥ // (9.1) Par.?

dakṣiṇapūrvaṃ bhāgaṃ bhāṇḍāgāram akṣapaṭalaṃ karmaniṣadyāśca dakṣiṇapaścimaṃ bhāgaṃ kupyagṛham āyudhāgāraṃ ca // (10.1) Par.?

tataḥ paraṃ nagaradhānyavyāvahārikakārmāntikabalādhyakṣāḥ pakvānnasurāmāṃsapaṇyā rūpājīvāstālāvacarā vaiśyāśca dakṣiṇāṃ diśam adhivaseyuḥ // (11.1) Par.?

paścimadakṣiṇaṃ bhāgaṃ kharoṣṭraguptisthānaṃ karmagṛhaṃ ca paścimottaraṃ bhāgaṃ yānarathaśālāḥ // (12.1) Par.?

tataḥ param ūrṇāsūtraveṇucarmavarmaśastrāvaraṇakāravaḥ śūdrāśca paścimāṃ diśam adhivaseyuḥ // (13.1) Par.?

uttarapaścimaṃ bhāgaṃ paṇyabhaiṣajyagṛham uttarapūrvaṃ bhāgaṃ kośo gavāśvaṃ ca // (14.1) Par.?

tataḥ paraṃ nagararājadevatālohamaṇikāravo brāhmaṇāścottarāṃ diśam adhivaseyuḥ // (15.1) Par.?

vāstucchidrānuśāleṣu śreṇīprapaṇinikāyā āvaseyuḥ // (16.1) Par.?

aparājitāpratihatajayantavaijayantakoṣṭhān śivavaiśravaṇāśviśrīmadirāgṛhāṇi ca puramadhye kārayet // (17.1) Par.?

yathoddeśaṃ vāstudevatāḥ sthāpayet // (18.1) Par.?

brāhmaindrayāmyasaināpatyāni dvārāṇi // (19.1) Par.?

bahiḥ parikhāyā dhanuḥśatāpakṛṣṭāś caityapuṇyasthānavanasetubandhāḥ kāryāḥ yathādiśaṃ ca digdevatāḥ // (20.1) Par.?

uttaraḥ pūrvo vā śmaśānabhāgo varṇottamānām dakṣiṇena śmaśānaṃ varṇāvarāṇām // (21.1) Par.?

tasyātikrame pūrvaḥ sāhasadaṇḍaḥ // (22.1) Par.?

pāṣaṇḍacaṇḍālānāṃ śmaśānānte vāsaḥ // (23.1) Par.?

karmāntakṣetravaśena kuṭumbināṃ sīmānaṃ sthāpayet // (24.1) Par.?

teṣu puṣpaphalavāṭān dhānyapaṇyanicayāṃścānujñātāḥ kuryuḥ // (25.1) Par.?

daśakulīvāṭaṃ kūpasthānam // (26.1) Par.?

sarvasnehadhānyakṣāralavaṇagandhabhaiṣajyaśuṣkaśākayavasavallūratṛṇakāṣṭhalohacarmāṅgārasnāyuviṣaviṣāṇaveṇuvalkalasāradārupraharaṇāvaraṇāśmanicayān anekavarṣopabhogasahān kārayet // (27.1) Par.?

navenānavaṃ śodhayet // (28.1) Par.?

hastyaśvarathapādātam anekamukhyam avasthāpayet // (29.1) Par.?

anekamukhyaṃ hi parasparabhayāt paropajāpaṃ nopaiti // (30.1) Par.?

etenāntapāladurgasaṃskārā vyākhyātāḥ // (31.1) Par.?

na ca bāhirikān kuryāt pure rāṣṭropaghātakān / (32.1) Par.?

kṣipejjanapade caitān sarvān vā dāpayet karān // (32.2) Par.?