Texts

akṣapaṭalam adhyakṣaḥ prāṅmukham udaṅmukhaṃ vā vibhaktopasthānaṃ nibandhapustakasthānaṃ kārayet // (1.1) Par.?

tatrādhikaraṇānāṃ saṃkhyāpracārasaṃjātāgram karmāntānāṃ dravyaprayogavṛddhikṣayavyayaprayāmavyājīyogasthānavetanaviṣṭipramāṇam ratnasāraphalgukupyānām arghaprativarṇakamānapratimānonmānāvamānabhāṇḍam deśagrāmajātikulasaṃghānāṃ dharmavyavahāracaritrasaṃsthānam rājopajīvināṃ pragrahapradeśabhogaparihārabhaktavetanalābham rājñaśca patnīputrāṇāṃ ratnabhūmilābhaṃ nirdeśotpātikapratīkāralābham mitrāmitrāṇāṃ ca saṃdhivigrahapradānādānaṃ nibandhapustakasthaṃ kārayet // (2.1) Par.?

tataḥ sarvādhikaraṇānāṃ karaṇīyaṃ siddhaṃ śeṣam āyavyayau nīvīm upasthānaṃ pracāraṃ caritraṃ saṃsthānaṃ ca nibandhena prayacchet // (3.1) Par.?

uttamamadhyamāvareṣu ca karmasu tajjātikam adhyakṣaṃ kuryāt sāmudayikeṣvavakﾱptikam vyayam upahatya rājā nānutapyeta // (4.1) Par.?

sahagrāhiṇaḥ pratibhuvaḥ karmopajīvinaḥ putrā bhrātaro bhāryā duhitaro bhṛtyāścāsya karmacchedaṃ vaheyuḥ // (5.1) Par.?

triśataṃ catuḥpañcāśaccāhorātrāṇāṃ karmasaṃvatsaraḥ // (6.1) Par.?

tam āṣāḍhīparyavasānam ūnaṃ pūrṇaṃ vā dadyāt // (7.1) Par.?

karaṇādhiṣṭhitam adhimāsakaṃ kuryāt // (8.1) Par.?

apasarpādhiṣṭhitaṃca pracāram // (9.1) Par.?

pracāracaritrasaṃsthānānyanupalabhamāno hi prakṛtaḥ samudayam ajñānena parihāpayati utthānakleśāsahatvād ālasyena śabdādiṣvindriyārtheṣu prasaktaḥ pramādena saṃkrośādharmānarthabhīrubhayena kāryārthiṣvanugrahabuddhiḥ kāmena hiṃsābuddhiḥ kopena vidyādravyavallabhāpāśrayād darpeṇa tulāmānatarkagaṇitāntaropadhānāl lobhena // (10.1) Par.?

teṣām ānupūrvyā yāvān arthopaghātastāvān ekottaro daṇḍaḥ iti mānavāḥ // (11.1) Par.?

sarvatrāṣṭaguṇaḥ iti pārāśarāḥ // (12.1) Par.?

daśaguṇaḥ iti bārhaspatyāḥ // (13.1) Par.?

viṃśatiguṇaḥ ityauśanasāḥ // (14.1) Par.?

yathāparādham iti kauṭilyaḥ // (15.1) Par.?

gāṇanikyāni āṣāḍhīm āgaccheyuḥ // (16.1) Par.?

āgatānāṃ samudrapustakabhāṇḍanīvīkānām ekatrāsambhāṣāvarodhaṃ kārayet // (17.1) Par.?

āyavyayanīvīnām agrāṇi śrutvā nīvīm avahārayet // (18.1) Par.?

yaccāgrād āyasyāntaraparṇe nīvyāṃ vardheta vyayasya vā yat parihāpayet tad aṣṭaguṇam adhyakṣaṃ dāpayet // (19.1) Par.?

viparyaye tam eva prati syāt // (20.1) Par.?

yathākālam anāgatānām apustakabhāṇḍanīvīkānāṃ vā deyadaśabandho daṇḍaḥ // (21.1) Par.?

kārmike copasthite kāraṇikasyāpratibadhnataḥ pūrvaḥ sāhasadaṇḍaḥ // (22.1) Par.?

viparyaye kārmikasya dviguṇaḥ // (23.1) Par.?

pracārasamaṃ mahāmātrāḥ samagrāḥ śrāvayeyur aviṣamamantrāḥ // (24.1) Par.?

pṛthagbhūto mithyāvādī caiṣām uttamaṃ daṇḍaṃ dadyāt // (25.1) Par.?

akṛtāhorūpaharaṃ māsam ākāṅkṣeta // (26.1) Par.?

māsād ūrdhvaṃ māsadviśatottaraṃ daṇḍaṃ dadyāt // (27.1) Par.?

alpaśeṣalekhyanīvīkaṃ pañcarātram ākāṅkṣeta // (28.1) Par.?

tataḥ paraṃ kośapūrvam ahorūpaharaṃ dharmavyavahāracaritrasaṃsthānasaṃkalananirvartanānumānacāraprayogair avekṣeta // (29.1) Par.?

divasapañcarātrapakṣamāsacāturmāsyasaṃvatsaraiśca pratisamānayet // (30.1) Par.?

vyuṣṭadeśakālamukhotpattyanuvṛttipramāṇadāyakadāpakanibandhakapratigrāhakaiś cāyaṃ samānayet // (31.1) Par.?

vyuṣṭadeśakālamukhalābhakāraṇadeyayogapramāṇājñāpakoddhārakavidhātṛkapratigrāhakaiś ca vyayaṃ samānayet // (32.1) Par.?

vyuṣṭadeśakālamukhānuvartanarūpalakṣaṇapramāṇanikṣepabhājanagopāyakaiś ca nīvīṃ samānayet // (33.1) Par.?

rājārthe kāraṇikasyāpratibadhnataḥ pratiṣedhayato vājñāṃ nibandhād āyavyayam anyathā nīvīm avalikhato dviguṇaḥ // (34.1) Par.?

kramāvahīnam utkramam avijñātaṃ punaruktaṃ vā vastukam avalikhato dvādaśapaṇo daṇḍaḥ // (35.1) Par.?

nīvīm avalikhato dviguṇaḥ // (36.1) Par.?

bhakṣayato 'ṣṭaguṇaḥ // (37.1) Par.?

nāśayataḥ pañcabandhaḥ pratidānaṃ ca // (38.1) Par.?

mithyāvāde steyadaṇḍaḥ // (39.1) Par.?

paścātpratijñāte dviguṇaḥ prasmṛtotpanne ca // (40.1) Par.?

aparādhaṃ sahetālpaṃ tuṣyed alpe 'pi codaye / (41.1) Par.?

mahopakāraṃ cādhyakṣaṃ pragraheṇābhipūjayet // (41.2) Par.?