Texts

ye cāpyasaṃbandhino 'vaśyabhartavyāste lakṣaṇam aṅgavidyāṃ jambhakavidyāṃ māyāgatam āśramadharmaṃ nimittam antaracakram ityadhīyānāḥ sattriṇaḥ saṃsargavidyāṃ ca // (1.1) Par.?

ye janapade śūrāstyaktātmāno hastinaṃ vyālaṃ vā dravyahetoḥ pratiyodhayeyuste tīkṣṇāḥ // (2.1) Par.?

ye bandhuṣu niḥsnehāḥ krūrā alasāśca te rasadāḥ // (3.1) Par.?

parivrājikā vṛttikāmā daridrā vidhavā pragalbhā brāhmaṇyantaḥpure kṛtasatkārā mahāmātrakulānyabhigacchet // (4.1) Par.?

etayā muṇḍā vṛṣalyo vyākhyātāḥ // (5.1) Par.?

tān rājā svaviṣaye mantripurohitasenāpatiyuvarājadauvārikāntarvaṃśikapraśāstṛsamāhartṛsaṃnidhātṛpradeṣṭṛnāyakapauravyāvahārikakārmāntikamantripariṣadadhyakṣadaṇḍadurgāntapālāṭavikeṣu śraddheyadeśaveṣaśilpabhāṣābhijanāpadeśān bhaktitaḥ sāmarthyayogāccāpasarpayet // (6.1) Par.?

teṣāṃ bāhyaṃ cāraṃ chattrabhṛṅgāravyajanapādukāsanayānavāhanopagrāhiṇas tīkṣṇā vidyuḥ // (7.1) Par.?

taṃ sattriṇaḥ saṃsthāsvarpayeyuḥ // (8.1) Par.?

sūdārālikasnāpakasaṃvāhakāstarakakalpakaprasādhakodakaparicārakā rasadāḥ kubjavāmanakirātamūkabadhirajaḍāndhacchadmāno naṭanartakagāyanavādakavāgjīvanakuśīlavāḥ striyaścābhyantaraṃ cāraṃ vidyuḥ // (9.1) Par.?

taṃ bhikṣukyaḥ saṃsthāsvarpayeyuḥ // (10.1) Par.?

saṃsthānām antevāsinaḥ saṃjñālipibhiścārasaṃcāraṃ kuryuḥ // (11.1) Par.?

na cānyonyaṃ saṃsthāste vā vidyuḥ // (12.1) Par.?

bhikṣukīpratiṣedhe dvāḥsthaparamparā mātāpitṛvyañjanāḥ śilpakārikāḥ kuśīlavā dāsyo vā gītapāṭhyavādyabhāṇḍagūḍhalekhyasaṃjñābhir vā cāraṃ nirhareyuḥ // (13.1) Par.?

dīrgharogonmādāgnirasavisargeṇa vā gūḍhanirgamanam // (14.1) Par.?

trayāṇām ekavākye sampratyayaḥ // (15.1) Par.?

teṣām abhīkṣṇavinipāte tūṣṇīṃdaṇḍaḥ pratiṣedhaḥ // (16.1) Par.?

kaṇṭakaśodhanoktāścāpasarpāḥ pareṣu kṛtavetanā vaseyur asaṃpātinaścārārtham // (17.1) Par.?

ta ubhayavetanāḥ // (18.1) Par.?

gṛhītaputradārāṃśca kuryād ubhayavetanān / (19.1) Par.?

tāṃścāriprahitān vidyāt teṣāṃ śaucaṃ ca tadvidhaiḥ // (19.2) Par.?

evaṃ śatrau ca mitre ca madhyame cāvapeccarān / (20.1) Par.?

udāsīne ca teṣāṃ ca tīrtheṣvaṣṭādaśasvapi // (20.2) Par.?

antargṛhacarāsteṣāṃ kubjavāmanapaṇḍakāḥ / (21.1) Par.?

śilpavatyaḥ striyo mūkāścitrāśca mlecchajātayaḥ // (21.2) Par.?

durgeṣu vaṇijaḥ saṃsthā durgānte siddhatāpasāḥ / (22.1) Par.?

karṣakodāsthitā rāṣṭre rāṣṭrānte vrajavāsinaḥ // (22.2) Par.?

vane vanacarāḥ kāryāḥ śramaṇāṭavikādayaḥ / (23.1) Par.?

parapravṛttijñānārthāḥ śīghrāścāraparamparāḥ // (23.2) Par.?

parasya caite boddhavyāstādṛśair eva tādṛśāḥ / (24.1) Par.?

cārasaṃcāriṇaḥ saṃsthā gūḍhāścāgūḍhasaṃjñitāḥ // (24.2) Par.?

akṛtyān kṛtyapakṣīyair darśitān kāryahetubhiḥ / (25.1) Par.?

parāpasarpajñānārthaṃ mukhyān anteṣu vāsayet // (25.2) Par.?