Texts

anupalabdhir iti vakṣyamāṇaṃ siṃhāvalokitenānuṣañjanīyam / (1.1) Par.?

yathotpatan viyati patatrī atidūratayā sann api pratyakṣeṇa anupalabhyate / (1.2) Par.?

sāmīpyād ityatrāpy atir anuvartanīyaḥ yathā locanastham añjanam atisāmīpyānna dṛśyate / (1.3) Par.?

indriyaghāto 'ndhabadhiratvādi / (1.4) Par.?

mano'navasthānād yathā kāmādyupaplutamanāḥ sphītālokamadhyavartinam indriyasaṃnikṛṣṭam apyartham apaśyati / (1.5) Par.?

saukṣmyād yathendriyasaṃnikṛṣṭaṃ paramāṇvādi praṇihitamanā api na paśyati / (1.6) Par.?

vyavadhānād yathā kuḍyādivyavahitaṃ rājadārādi na paśyati / (1.7) Par.?

abhibhavād yathāhani saurībhir bhābhir abhibhūtaṃ grahanakṣatramaṇḍalaṃ na paśyati / (1.8) Par.?

samānābhihārād yathā toyadavimuktān udabindūn jalāśaye na paśyati / (1.9) Par.?

cakāro 'nuktasamuccayārthaḥ / (1.10) Par.?

tenānudbhavo 'pi saṃgṛhītaḥ / (1.11) Par.?

tad yathā kṣīrādyavasthāyāṃ dadhyādyanudbhavān na dṛśyate / (1.12) Par.?

etad uktaṃ bhavati / (1.13) Par.?

na pratyakṣanivṛttimātrād vastvabhāvo bhavatyatiprasaṅgāt / (1.14) Par.?

tathā hi gṛhād vinirgato gṛhajanam apaśyaṃstadabhāvaṃ niścinuyāt / (1.15) Par.?

api tu yogyapratyakṣanivṛtter ayam abhāvaṃ niścinoti / (1.16) Par.?

na ca pradhānapuruṣādiṣvasti pratyakṣayogyateti tannivṛttimātrāt tadabhāvaniścayo 'yuktaḥ prāmāṇikānām iti / (1.17) Par.?

katamat punar eteṣu kāraṇaṃ pradhānādīnām anupalabdhāviti / (1.18) Par.?

ata āha saukṣmyāt tadanupalabdhiḥ / (1.19) Par.?

athābhāvād eva saptamarasavad eteṣām anupalabdhiḥ kasmānna bhavatīti / (1.20) Par.?

ata āha nābhāvāt / (1.21) Par.?

kutaḥ / (1.22) Par.?

kāryatas tadupalabdheḥ / (1.23) Par.?

tad iti pradhānaṃ parāmṛśati / (1.24) Par.?

puruṣopalabdhau tu pramāṇaṃ vakṣyati saṃghātaparārthatvād iti / (1.25) Par.?

dṛḍhatarapramāṇāvadhārite hi pratyakṣam apravartamānam ayogyatvānna pravartata iti kalpate / (1.26) Par.?

saptamas tu raso na pramāṇenāvadhārita iti na tatra pratyakṣasyāyogyatā śakyādhyavasātum ityabhiprāyaḥ / (1.27) Par.?

kiṃ punastat kāryaṃ yataḥ pradhānānumānam iti / (1.28) Par.?

ata āha / (1.29) Par.?

mahadādi tacca kāryam / (1.30) Par.?

etacca yathā gamakaṃ tathopariṣṭād upapādayiṣyate / (1.31) Par.?

tasya ca kāryasya vivekajñānopayoginī sārūpyavairūpye āha prakṛtisarūpaṃ virūpaṃ ca / (1.32) Par.?

ete copariṣṭād vibhajanīye iti / (1.33) Par.?

kāryāt kāraṇamātraṃ gamyate / (1.34) Par.?

santi cātra vādināṃ vipratipattayaḥ / (1.35) Par.?

kecid āhur asataḥ sajjāyata iti / (1.36) Par.?

ekasya sato vivartaḥ kāryajātaṃ na vastu sad ityapare / (1.37) Par.?

anye tu sato 'sajjāyata iti / (1.38) Par.?

sataḥ sajjāyata iti vṛddhāḥ / (1.39) Par.?

tatra pūrvasmin pakṣatraye pradhānaṃ na sidhyati / (1.40) Par.?

sukhaduḥkhamohabhedavacchabdādyātmakaṃ hi jagat kāraṇaṃ pradhānaṃ sattvarajastamaḥsvabhāvam / (1.41) Par.?

yadi punar asataḥ sajjāyata 'san nirupākhyaṃ kāraṇaṃ sukhādirūpaśabdādyātmakaṃ kathaṃ syāt / (1.42) Par.?

sadasatostādātmyānupapatteḥ / (1.43) Par.?

atha sato vivartaḥ śabdādiprapañcas tathāpi sataḥ sajjāyata iti na syāt / (1.44) Par.?

nāsyādvayasya prapañcātmakatvam api tvaprapañcasya prapañcātmatayā bhāsanaṃ bhrāntir eva / (1.45) Par.?

yeṣām api kaṇabhakṣākṣacaraṇādīnāṃ sata eva kāraṇād asato janma teṣām api sadasator ekatvānupapatter akāryātmakaṃ pradhānaṃ sidhyati / (1.46) Par.?

ataḥ pradhānasiddhyarthaṃ prathamaṃ tāvat satkāryaṃ pratijānīte // (1.47) Par.?