Texts

tasya prākaraṇikasvabhāvasya yopalabdhiḥ anavacchinnaḥ prakāśaḥ sā kathitayuktyavaṣṭambhāt suṣṭhu prabuddhasyāprabuddhatāsaṃskāreṇāpi śūnyasya satataṃ triṣvapi jāgarasvapnasauṣuptapadeṣu nityamiti ādau madhye'nte cāvyabhicāriṇī anapāyinī syādbhavatyeva sadāsau śaṃkarātmakasvasvabhāvatayā sphuratīty arthaḥ // (1) Par.?

parasyāprabuddhasya punastāsāṃ daśānāṃ svocitasaṃvidrūpāṇāṃ pratyekam ādāv udbubhūṣāyām ante ca viśrāntyātmakāntarmukhatve na tu svocitārthāvabhāsāvasthitirūpe madhyapade // (2) Par.?

yaduktaṃ śrīśivadṛṣṭau / (3.1) Par.?

yāvat samagrajñānāgrajñātṛsparśadaśāsv api / (3.2) Par.?

sthitaiva lakṣyate sā tu tadviśrāntyāthavā phale // (3.3) Par.?

bhaṭṭalollaṭenāpi tadādyanta ityevameva vyākhyāyi svavṛttau // (4) Par.?

bhaṭṭaśrīkallaṭavṛttyakṣarāṇyapekṣya vayamapi tadvṛttyakṣarānurodhena sautram artham ativimalamapi kliṣṭakalpanayā vyākartumaśikṣitāḥ yata evāsuprabuddhasya tadādyante 'sti tadupalabdhiḥ ata evāyam ihādhikārī spandopadeśaiḥ suprabuddhīkriyate // (5) Par.?

yadvakṣyati / (6.1) Par.?

ataḥ satatam udyuktaḥ spandatattvaviviktaye / (6.2) Par.?

jāgrat / (6.3) Par.?

ityādi / (6.4) Par.?

sauṣuptapadavanmūḍhaḥ prabuddhaḥ syādanāvṛtaḥ / (6.5) Par.?

iti / (6.6) Par.?

tathā svapne'pi / (6.7) Par.?

ityādi / (6.8) Par.?

prabuddhaḥ sarvadā tiṣṭhet // (6.9) Par.?

ityādi ca // (7) Par.?

atra hi jāgarāditriṣu padeṣu ādyantakoṭivan madhyamapy arthāvasāyātmakaṃ padaṃ turyābhogamayaṃ kartuṃ prabuddhasya suprabuddhatāpādanāyopadeśaḥ pravṛttaḥ etac ca nirṇeṣyāmaḥ // (8) Par.?

tathā ca śivasūtram / (9.1) Par.?

jāgratsvapnasuṣuptabhede turyābhogasambhavaḥ // (9.2) Par.?

tathā / (10.1) Par.?

triṣu caturthaṃ tailavad āsecyam / (10.2) Par.?

iti / (10.3) Par.?

tritayabhoktā vīreśaḥ / (10.4) Par.?

iti // (10.5) Par.?

suprabuddhasya triṣu padeṣu yādṛśy upalabdhis tāṃ vibhāgena darśayati // (11) Par.?