Texts

Help

Select a text:
Bibliography
Select a chapter:
 (no revisions)
Associated topic(s): Agni, Indra

Show parallels  Show headlines
Use dependency labeler
Chapter id: 10237
  • Click on a sentence to show its analysis
  • Keep the mouse pointer over a lemma to show its meanings.
ya indrāgnī citratamo ratho vām abhi viśvāni bhuvanāni caṣṭe / (1.1) Par.?
tenā yātaṃ sarathaṃ tasthivāṃsāthā somasya pibataṃ sutasya // (1.2) Par.?
yāvad idam bhuvanaṃ viśvam asty uruvyacā varimatā gabhīram / (2.1) Par.?
tāvāṁ ayam pātave somo astv aram indrāgnī manase yuvabhyām // (2.2) Par.?
cakrāthe hi sadhryaṅ nāma bhadraṃ sadhrīcīnā vṛtrahaṇā uta sthaḥ / (3.1) Par.?
tāv indrāgnī sadhryañcā niṣadyā vṛṣṇaḥ somasya vṛṣaṇā vṛṣethām // (3.2) Par.?
samiddheṣv agniṣv ānajānā yatasrucā barhir u tistirāṇā / (4.1) Par.?
tīvraiḥ somaiḥ pariṣiktebhir arvāg endrāgnī saumanasāya yātam // (4.2) Par.?
yānīndrāgnī cakrathur vīryāṇi yāni rūpāṇy uta vṛṣṇyāni / (5.1) Par.?
yā vām pratnāni sakhyā śivāni tebhiḥ somasya pibataṃ sutasya // (5.2) Par.?
yad abravam prathamaṃ vāṃ vṛṇāno 'yaṃ somo asurair no vihavyaḥ / (6.1) Par.?
tāṃ satyāṃ śraddhām abhy ā hi yātam athā somasya pibataṃ sutasya // (6.2) Par.?
yad indrāgnī madathaḥ sve duroṇe yad brahmaṇi rājani vā yajatrā / (7.1) Par.?
ataḥ pari vṛṣaṇāv ā hi yātam athā somasya pibataṃ sutasya // (7.2) Par.?
yad indrāgnī yaduṣu turvaśeṣu yad druhyuṣv anuṣu pūruṣu sthaḥ / (8.1) Par.?
ataḥ pari vṛṣaṇāv ā hi yātam athā somasya pibataṃ sutasya // (8.2) Par.?
yad indrāgnī avamasyām pṛthivyām madhyamasyām paramasyām uta sthaḥ / (9.1) Par.?
ataḥ pari vṛṣaṇāv ā hi yātam athā somasya pibataṃ sutasya // (9.2) Par.?
yad indrāgnī paramasyām pṛthivyām madhyamasyām avamasyām uta sthaḥ / (10.1) Par.?
ataḥ pari vṛṣaṇāv ā hi yātam athā somasya pibataṃ sutasya // (10.2) Par.?
yad indrāgnī divi ṣṭho yat pṛthivyāṃ yat parvateṣv oṣadhīṣv apsu / (11.1) Par.?
ataḥ pari vṛṣaṇāv ā hi yātam athā somasya pibataṃ sutasya // (11.2) Par.?
yad indrāgnī uditā sūryasya madhye divaḥ svadhayā mādayethe / (12.1) Par.?
ataḥ pari vṛṣaṇāv ā hi yātam athā somasya pibataṃ sutasya // (12.2) Par.?
evendrāgnī papivāṃsā sutasya viśvāsmabhyaṃ saṃ jayataṃ dhanāni / (13.1) Par.?
tan no mitro varuṇo māmahantām aditiḥ sindhuḥ pṛthivī uta dyauḥ // (13.2) Par.?
Duration=0.11705589294434 secs.