Texts

ny ū ṣu vācam pra mahe bharāmahe gira indrāya sadane vivasvataḥ / (1.1) Par.?

nū ciddhi ratnaṃ sasatām ivāvidan na duṣṭutir draviṇodeṣu śasyate // (1.2) Par.?

duro aśvasya dura indra gor asi duro yavasya vasuna inas patiḥ / (2.1) Par.?

śikṣānaraḥ pradivo akāmakarśanaḥ sakhā sakhibhyas tam idaṃ gṛṇīmasi // (2.2) Par.?

śacīva indra purukṛd dyumattama taved idam abhitaś cekite vasu / (3.1) Par.?

ataḥ saṃgṛbhyābhibhūta ā bhara mā tvāyato jarituḥ kāmam ūnayīḥ // (3.2) Par.?

ebhir dyubhiḥ sumanā ebhir indubhir nirundhāno amatiṃ gobhir aśvinā / (4.1) Par.?

indreṇa dasyuṃ darayanta indubhir yutadveṣasaḥ sam iṣā rabhemahi // (4.2) Par.?

sam indra rāyā sam iṣā rabhemahi saṃ vājebhiḥ puruścandrair abhidyubhiḥ / (5.1) Par.?

saṃ devyā pramatyā vīraśuṣmayā goagrayāśvāvatyā rabhemahi // (5.2) Par.?

te tvā madā amadan tāni vṛṣṇyā te somāso vṛtrahatyeṣu satpate / (6.1) Par.?

yat kārave daśa vṛtrāṇy aprati barhiṣmate ni sahasrāṇi barhayaḥ // (6.2) Par.?

yudhā yudham upa ghed eṣi dhṛṣṇuyā purā puraṃ sam idaṃ haṃsy ojasā / (7.1) Par.?

namyā yad indra sakhyā parāvati nibarhayo namuciṃ nāma māyinam // (7.2) Par.?

tvaṃ karañjam uta parṇayaṃ vadhīs tejiṣṭhayātithigvasya vartanī / (8.1) Par.?

tvaṃ śatā vaṅgṛdasyābhinat puro 'nānudaḥ pariṣūtā ṛjiśvanā // (8.2) Par.?

tvam etāñ janarājño dvir daśābandhunā suśravasopajagmuṣaḥ / (9.1) Par.?

ṣaṣṭiṃ sahasrā navatiṃ nava śruto ni cakreṇa rathyā duṣpadāvṛṇak // (9.2) Par.?

tvam āvitha suśravasaṃ tavotibhis tava trāmabhir indra tūrvayāṇam / (10.1) Par.?

tvam asmai kutsam atithigvam āyum mahe rājñe yūne arandhanāyaḥ // (10.2) Par.?

ya udṛcīndra devagopāḥ sakhāyas te śivatamā asāma / (11.1) Par.?

tvāṃ stoṣāma tvayā suvīrā drāghīya āyuḥ prataraṃ dadhānāḥ // (11.2) Par.?