Texts

ā no bhadrāḥ kratavo yantu viśvato 'dabdhāso aparītāsa udbhidaḥ / (1.1) Par.?

devā no yathā sadam id vṛdhe asann aprāyuvo rakṣitāro dive dive // (1.2) Par.?

devānām bhadrā sumatir ṛjūyatāṃ devānāṃ rātir abhi no ni vartatām / (2.1) Par.?

devānāṃ sakhyam upa sedimā vayaṃ devā na āyuḥ pra tirantu jīvase // (2.2) Par.?

tān pūrvayā nividā hūmahe vayam bhagam mitram aditiṃ dakṣam asridham / (3.1) Par.?

aryamaṇaṃ varuṇaṃ somam aśvinā sarasvatī naḥ subhagā mayas karat // (3.2) Par.?

tan no vāto mayobhu vātu bheṣajaṃ tan mātā pṛthivī tat pitā dyauḥ / (4.1) Par.?

tad grāvāṇaḥ somasuto mayobhuvas tad aśvinā śṛṇutaṃ dhiṣṇyā yuvam // (4.2) Par.?

tam īśānaṃ jagatas tasthuṣas patiṃ dhiyañjinvam avase hūmahe vayam / (5.1) Par.?

pūṣā no yathā vedasām asad vṛdhe rakṣitā pāyur adabdhaḥ svastaye // (5.2) Par.?

svasti na indro vṛddhaśravāḥ svasti naḥ pūṣā viśvavedāḥ / (6.1) Par.?

svasti nas tārkṣyo ariṣṭanemiḥ svasti no bṛhaspatir dadhātu // (6.2) Par.?

pṛṣadaśvā marutaḥ pṛśnimātaraḥ śubhaṃyāvāno vidatheṣu jagmayaḥ / (7.1) Par.?

agnijihvā manavaḥ sūracakṣaso viśve no devā avasā gamann iha // (7.2) Par.?

bhadraṃ karṇebhiḥ śṛṇuyāma devā bhadram paśyemākṣabhir yajatrāḥ / (8.1) Par.?

sthirair aṅgais tuṣṭuvāṃsas tanūbhir vy aśema devahitaṃ yad āyuḥ // (8.2) Par.?

śatam in nu śarado anti devā yatrā naś cakrā jarasaṃ tanūnām / (9.1) Par.?

putrāso yatra pitaro bhavanti mā no madhyā rīriṣatāyur gantoḥ // (9.2) Par.?

aditir dyaur aditir antarikṣam aditir mātā sa pitā sa putraḥ / (10.1) Par.?

viśve devā aditiḥ pañca janā aditir jātam aditir janitvam // (10.2) Par.?