Texts

imāṃ te dhiyam pra bhare maho mahīm asya stotre dhiṣaṇā yat ta ānaje / (1.1) Par.?

tam utsave ca prasave ca sāsahim indraṃ devāsaḥ śavasāmadann anu // (1.2) Par.?

asya śravo nadyaḥ sapta bibhrati dyāvākṣāmā pṛthivī darśataṃ vapuḥ / (2.1) Par.?

asme sūryācandramasābhicakṣe śraddhe kam indra carato vitarturam // (2.2) Par.?

taṃ smā ratham maghavan prāva sātaye jaitraṃ yaṃ te anumadāma saṃgame / (3.1) Par.?

ājā na indra manasā puruṣṭuta tvāyadbhyo maghavañcharma yaccha naḥ // (3.2) Par.?

vayaṃ jayema tvayā yujā vṛtam asmākam aṃśam ud avā bhare bhare / (4.1) Par.?

asmabhyam indra varivaḥ sugaṃ kṛdhi pra śatrūṇām maghavan vṛṣṇyā ruja // (4.2) Par.?

nānā hi tvā havamānā janā ime dhanānāṃ dhartar avasā vipanyavaḥ / (5.1) Par.?

asmākaṃ smā ratham ā tiṣṭha sātaye jaitraṃ hīndra nibhṛtam manas tava // (5.2) Par.?

gojitā bāhū amitakratuḥ simaḥ karman karmañchatamūtiḥ khajaṅkaraḥ / (6.1) Par.?

akalpa indraḥ pratimānam ojasāthā janā vi hvayante siṣāsavaḥ // (6.2) Par.?

ut te śatān maghavann uc ca bhūyasa ut sahasrād ririce kṛṣṭiṣu śravaḥ / (7.1) Par.?

amātraṃ tvā dhiṣaṇā titviṣe mahy adhā vṛtrāṇi jighnase purandara // (7.2) Par.?

triviṣṭidhātu pratimānam ojasas tisro bhūmīr nṛpate trīṇi rocanā / (8.1) Par.?

atīdaṃ viśvam bhuvanaṃ vavakṣithāśatrur indra januṣā sanād asi // (8.2) Par.?

tvāṃ deveṣu prathamaṃ havāmahe tvam babhūtha pṛtanāsu sāsahiḥ / (9.1) Par.?

semaṃ naḥ kārum upamanyum udbhidam indraḥ kṛṇotu prasave ratham puraḥ // (9.2) Par.?

tvaṃ jigetha na dhanā rurodhithārbheṣv ājā maghavan mahatsu ca / (10.1) Par.?

tvām ugram avase saṃ śiśīmasy athā na indra havaneṣu codaya // (10.2) Par.?

viśvāhendro adhivaktā no astv aparihvṛtāḥ sanuyāma vājam / (11.1) Par.?

tan no mitro varuṇo māmahantām aditiḥ sindhuḥ pṛthivī uta dyauḥ // (11.2) Par.?