Texts

tatam me apas tad u tāyate punaḥ svādiṣṭhā dhītir ucathāya śasyate / (1.1) Par.?

ayaṃ samudra iha viśvadevyaḥ svāhākṛtasya sam u tṛpṇuta ṛbhavaḥ // (1.2) Par.?

ābhogayam pra yad icchanta aitanāpākāḥ prāñco mama kecid āpayaḥ / (2.1) Par.?

saudhanvanāsaś caritasya bhūmanāgacchata savitur dāśuṣo gṛham // (2.2) Par.?

tat savitā vo 'mṛtatvam āsuvad agohyaṃ yacchravayanta aitana / (3.1) Par.?

tyaṃ cic camasam asurasya bhakṣaṇam ekaṃ santam akṛṇutā caturvayam // (3.2) Par.?

viṣṭvī śamī taraṇitvena vāghato martāsaḥ santo amṛtatvam ānaśuḥ / (4.1) Par.?

saudhanvanā ṛbhavaḥ sūracakṣasaḥ saṃvatsare sam apṛcyanta dhītibhiḥ // (4.2) Par.?

kṣetram iva vi mamus tejanenaṃ ekam pātram ṛbhavo jehamānam / (5.1) Par.?

upastutā upamaṃ nādhamānā amartyeṣu śrava icchamānāḥ // (5.2) Par.?

ā manīṣām antarikṣasya nṛbhyaḥ sruceva ghṛtaṃ juhavāma vidmanā / (6.1) Par.?

taraṇitvā ye pitur asya saścira ṛbhavo vājam aruhan divo rajaḥ // (6.2) Par.?

ṛbhur na indraḥ śavasā navīyān ṛbhur vājebhir vasubhir vasur dadiḥ / (7.1) Par.?

yuṣmākaṃ devā avasāhani priye 'bhi tiṣṭhema pṛtsutīr asunvatām // (7.2) Par.?

niś carmaṇa ṛbhavo gām apiṃśata saṃ vatsenāsṛjatā mātaram punaḥ / (8.1) Par.?

saudhanvanāsaḥ svapasyayā naro jivrī yuvānā pitarākṛṇotana // (8.2) Par.?

vājebhir no vājasātāv aviḍḍhy ṛbhumāṁ indra citram ā darṣi rādhaḥ / (9.1) Par.?

tan no mitro varuṇo māmahantām aditiḥ sindhuḥ pṛthivī uta dyauḥ // (9.2) Par.?