Texts

indrāya hi dyaur asuro anamnatendrāya mahī pṛthivī varīmabhir dyumnasātā varīmabhiḥ / (1.1) Par.?

indraṃ viśve sajoṣaso devāso dadhire puraḥ / (1.2) Par.?

indrāya viśvā savanāni mānuṣā rātāni santu mānuṣā // (1.3) Par.?

viśveṣu hi tvā savaneṣu tuñjate samānam ekaṃ vṛṣamaṇyavaḥ pṛthak svaḥ saniṣyavaḥ pṛthak / (2.1) Par.?

taṃ tvā nāvaṃ na parṣaṇiṃ śūṣasya dhuri dhīmahi / (2.2) Par.?

indraṃ na yajñaiś citayanta āyava stomebhir indram āyavaḥ // (2.3) Par.?

vi tvā tatasre mithunā avasyavo vrajasya sātā gavyasya niḥsṛjaḥ sakṣanta indra niḥsṛjaḥ / (3.1) Par.?

yad gavyantā dvā janā svar yantā samūhasi / (3.2) Par.?

āviṣ karikrad vṛṣaṇaṃ sacābhuvaṃ vajram indra sacābhuvam // (3.3) Par.?

viduṣ ṭe asya vīryasya pūravaḥ puro yad indra śāradīr avātiraḥ sāsahāno avātiraḥ / (4.1) Par.?

śāsas tam indra martyam ayajyuṃ śavasas pate / (4.2) Par.?

mahīm amuṣṇāḥ pṛthivīm imā apo mandasāna imā apaḥ // (4.3) Par.?

ād it te asya vīryasya carkiran madeṣu vṛṣann uśijo yad āvitha sakhīyato yad āvitha / (5.1) Par.?

cakartha kāram ebhyaḥ pṛtanāsu pravantave / (5.2) Par.?

te anyām anyāṃ nadyaṃ saniṣṇata śravasyantaḥ saniṣṇata // (5.3) Par.?

uto no asyā uṣaso juṣeta hy arkasya bodhi haviṣo havīmabhiḥ svarṣātā havīmabhiḥ / (6.1) Par.?

yad indra hantave mṛdho vṛṣā vajriñciketasi / (6.2) Par.?

ā me asya vedhaso navīyaso manma śrudhi navīyasaḥ // (6.3) Par.?

tvaṃ tam indra vāvṛdhāno asmayur amitrayantaṃ tuvijāta martyaṃ vajreṇa śūra martyam / (7.1) Par.?

jahi yo no aghāyati śṛṇuṣva suśravastamaḥ / (7.2) Par.?

riṣṭaṃ na yāmann apa bhūtu durmatir viśvāpa bhūtu durmatiḥ // (7.3) Par.?