Texts

pra ya āruḥ śitipṛṣṭhasya dhāser ā mātarā viviśuḥ sapta vāṇīḥ / (1.1) Par.?

parikṣitā pitarā saṃ carete pra sarsrāte dīrgham āyuḥ prayakṣe // (1.2) Par.?

divakṣaso dhenavo vṛṣṇo aśvā devīr ā tasthau madhumad vahantīḥ / (2.1) Par.?

ṛtasya tvā sadasi kṣemayantam pary ekā carati vartaniṃ gauḥ // (2.2) Par.?

ā sīm arohat suyamā bhavantīḥ patiś cikitvān rayivid rayīṇām / (3.1) Par.?

pra nīlapṛṣṭho atasasya dhāses tā avāsayat purudhapratīkaḥ // (3.2) Par.?

mahi tvāṣṭram ūrjayantīr ajuryaṃ stabhūyamānaṃ vahato vahanti / (4.1) Par.?

vy aṅgebhir didyutānaḥ sadhastha ekām iva rodasī ā viveśa // (4.2) Par.?

jānanti vṛṣṇo aruṣasya śevam uta bradhnasya śāsane raṇanti / (5.1) Par.?

divorucaḥ suruco rocamānā iḍā yeṣāṃ gaṇyā māhinā gīḥ // (5.2) Par.?

uto pitṛbhyām pravidānu ghoṣam maho mahadbhyām anayanta śūṣam / (6.1) Par.?

ukṣā ha yatra pari dhānam aktor anu svaṃ dhāma jaritur vavakṣa // (6.2) Par.?

adhvaryubhiḥ pañcabhiḥ sapta viprāḥ priyaṃ rakṣante nihitam padaṃ veḥ / (7.1) Par.?

prāñco madanty ukṣaṇo ajuryā devā devānām anu hi vratā guḥ // (7.2) Par.?

daivyā hotārā prathamā ny ṛñje sapta pṛkṣāsaḥ svadhayā madanti / (8.1) Par.?

ṛtaṃ śaṃsanta ṛtam it ta āhur anu vrataṃ vratapā dīdhyānāḥ // (8.2) Par.?

vṛṣāyante mahe atyāya pūrvīr vṛṣṇe citrāya raśmayaḥ suyāmāḥ / (9.1) Par.?

deva hotar mandrataraś cikitvān maho devān rodasī eha vakṣi // (9.2) Par.?

pṛkṣaprayajo draviṇaḥ suvācaḥ suketava uṣaso revad ūṣuḥ / (10.1) Par.?

uto cid agne mahinā pṛthivyāḥ kṛtaṃ cid enaḥ sam mahe daśasya // (10.2) Par.?

iḍām agne purudaṃsaṃ saniṃ goḥ śaśvattamaṃ havamānāya sādha / (11.1) Par.?

syān naḥ sūnus tanayo vijāvāgne sā te sumatir bhūtv asme // (11.2) Par.?