Texts

pra ṛbhubhyo dūtam iva vācam iṣya upastire śvaitarīṃ dhenum īﾱe / (1.1) Par.?

ye vātajūtās taraṇibhir evaiḥ pari dyāṃ sadyo apaso babhūvuḥ // (1.2) Par.?

yadāram akrann ṛbhavaḥ pitṛbhyām pariviṣṭī veṣaṇā daṃsanābhiḥ / (2.1) Par.?

ād id devānām upa sakhyam āyan dhīrāsaḥ puṣṭim avahan manāyai // (2.2) Par.?

punar ye cakruḥ pitarā yuvānā sanā yūpeva jaraṇā śayānā / (3.1) Par.?

te vājo vibhvāṁ ṛbhur indravanto madhupsaraso no 'vantu yajñam // (3.2) Par.?

yat saṃvatsam ṛbhavo gām arakṣan yat saṃvatsam ṛbhavo mā apiṃśan / (4.1) Par.?

yat saṃvatsam abharan bhāso asyās tābhiḥ śamībhir amṛtatvam āśuḥ // (4.2) Par.?

jyeṣṭha āha camasā dvā kareti kanīyān trīn kṛṇavāmety āha / (5.1) Par.?

kaniṣṭha āha caturas kareti tvaṣṭa ṛbhavas tat panayad vaco vaḥ // (5.2) Par.?

satyam ūcur nara evā hi cakrur anu svadhām ṛbhavo jagmur etām / (6.1) Par.?

vibhrājamānāṃś camasāṁ ahevāvenat tvaṣṭā caturo dadṛśvān // (6.2) Par.?

dvādaśa dyūn yad agohyasyātithye raṇann ṛbhavaḥ sasantaḥ / (7.1) Par.?

sukṣetrākṛṇvann anayanta sindhūn dhanvātiṣṭhann oṣadhīr nimnam āpaḥ // (7.2) Par.?

rathaṃ ye cakruḥ suvṛtaṃ nareṣṭhāṃ ye dhenuṃ viśvajuvaṃ viśvarūpām / (8.1) Par.?

ta ā takṣantv ṛbhavo rayiṃ naḥ svavasaḥ svapasaḥ suhastāḥ // (8.2) Par.?

apo hy eṣām ajuṣanta devā abhi kratvā manasā dīdhyānāḥ / (9.1) Par.?

vājo devānām abhavat sukarmendrasya ṛbhukṣā varuṇasya vibhvā // (9.2) Par.?

ye harī medhayokthā madanta indrāya cakruḥ suyujā ye aśvā / (10.1) Par.?

te rāyas poṣaṃ draviṇāny asme dhatta ṛbhavaḥ kṣemayanto na mitram // (10.2) Par.?

idāhnaḥ pītim uta vo madaṃ dhur na ṛte śrāntasya sakhyāya devāḥ / (11.1) Par.?

te nūnam asme ṛbhavo vasūni tṛtīye asmin savane dadhāta // (11.2) Par.?