Texts

ūrdhva ū ṣu ṇo adhvarasya hotar agne tiṣṭha devatātā yajīyān / (1.1) Par.?

tvaṃ hi viśvam abhy asi manma pra vedhasaś cit tirasi manīṣām // (1.2) Par.?

amūro hotā ny asādi vikṣv agnir mandro vidatheṣu pracetāḥ / (2.1) Par.?

ūrdhvam bhānuṃ savitevāśren meteva dhūmaṃ stabhāyad upa dyām // (2.2) Par.?

yatā sujūrṇī rātinī ghṛtācī pradakṣiṇid devatātim urāṇaḥ / (3.1) Par.?

ud u svarur navajā nākraḥ paśvo anakti sudhitaḥ sumekaḥ // (3.2) Par.?

stīrṇe barhiṣi samidhāne agnā ūrdhvo adhvaryur jujuṣāṇo asthāt / (4.1) Par.?

pary agniḥ paśupā na hotā triviṣṭy eti pradiva urāṇaḥ // (4.2) Par.?

pari tmanā mitadrur eti hotāgnir mandro madhuvacā ṛtāvā / (5.1) Par.?

dravanty asya vājino na śokā bhayante viśvā bhuvanā yad abhrāṭ // (5.2) Par.?

bhadrā te agne svanīka saṃdṛg ghorasya sato viṣuṇasya cāruḥ / (6.1) Par.?

na yat te śocis tamasā varanta na dhvasmānas tanvī repa ā dhuḥ // (6.2) Par.?

na yasya sātur janitor avāri na mātarāpitarā nū cid iṣṭau / (7.1) Par.?

adhā mitro na sudhitaḥ pāvako 'gnir dīdāya mānuṣīṣu vikṣu // (7.2) Par.?

dvir yam pañca jījanan saṃvasānāḥ svasāro agnim mānuṣīṣu vikṣu / (8.1) Par.?

uṣarbudham atharyo na dantaṃ śukraṃ svāsam paraśuṃ na tigmam // (8.2) Par.?

tava tye agne harito ghṛtasnā rohitāsa ṛjvañcaḥ svañcaḥ / (9.1) Par.?

aruṣāso vṛṣaṇa ṛjumuṣkā ā devatātim ahvanta dasmāḥ // (9.2) Par.?

ye ha tye te sahamānā ayāsas tveṣāso agne arcayaś caranti / (10.1) Par.?

śyenāso na duvasanāso arthaṃ tuviṣvaṇaso mārutaṃ na śardhaḥ // (10.2) Par.?

akāri brahma samidhāna tubhyaṃ śaṃsāty ukthaṃ yajate vy ū dhāḥ / (11.1) Par.?

hotāram agnim manuṣo ni ṣedur namasyanta uśijaḥ śaṃsam āyoḥ // (11.2) Par.?