Texts

ayam panthā anuvittaḥ purāṇo yato devā udajāyanta viśve / (1.1) Par.?

ataś cid ā janiṣīṣṭa pravṛddho mā mātaram amuyā pattave kaḥ // (1.2) Par.?

nāham ato nir ayā durgahaitat tiraścatā pārśvān nir gamāṇi / (2.1) Par.?

bahūni me akṛtā kartvāni yudhyai tvena saṃ tvena pṛcchai // (2.2) Par.?

parāyatīm mātaram anv acaṣṭa na nānu gāny anu nū gamāni / (3.1) Par.?

tvaṣṭur gṛhe apibat somam indraḥ śatadhanyaṃ camvoḥ sutasya // (3.2) Par.?

kiṃ sa ṛdhak kṛṇavad yaṃ sahasram māso jabhāra śaradaś ca pūrvīḥ / (4.1) Par.?

nahī nv asya pratimānam asty antar jāteṣūta ye janitvāḥ // (4.2) Par.?

avadyam iva manyamānā guhākar indram mātā vīryeṇā nyṛṣṭam / (5.1) Par.?

athod asthāt svayam atkaṃ vasāna ā rodasī apṛṇāj jāyamānaḥ // (5.2) Par.?

etā arṣanty alalābhavantīr ṛtāvarīr iva saṃkrośamānāḥ / (6.1) Par.?

etā vi pṛccha kim idam bhananti kam āpo adrim paridhiṃ rujanti // (6.2) Par.?

kim u ṣvid asmai nivido bhanantendrasyāvadyaṃ didhiṣanta āpaḥ / (7.1) Par.?

mamaitān putro mahatā vadhena vṛtraṃ jaghanvāṁ asṛjad vi sindhūn // (7.2) Par.?

mamac cana tvā yuvatiḥ parāsa mamac cana tvā kuṣavā jagāra / (8.1) Par.?

mamac cid āpaḥ śiśave mamṛḍyur mamac cid indraḥ sahasod atiṣṭhat // (8.2) Par.?

mamac cana te maghavan vyaṃso nivividhvāṁ apa hanū jaghāna / (9.1) Par.?

adhā nividdha uttaro babhūvāñchiro dāsasya sam piṇag vadhena // (9.2) Par.?

gṛṣṭiḥ sasūva sthaviraṃ tavāgām anādhṛṣyaṃ vṛṣabhaṃ tumram indram / (10.1) Par.?

arīﾱhaṃ vatsaṃ carathāya mātā svayaṃ gātuṃ tanva icchamānam // (10.2) Par.?

uta mātā mahiṣam anv avenad amī tvā jahati putra devāḥ / (11.1) Par.?

athābravīd vṛtram indro haniṣyan sakhe viṣṇo vitaraṃ vi kramasva // (11.2) Par.?

kas te mātaraṃ vidhavām acakracchayuṃ kas tvām ajighāṃsac carantam / (12.1) Par.?

kas te devo adhi mārḍīka āsīd yat prākṣiṇāḥ pitaram pādagṛhya // (12.2) Par.?

avartyā śuna āntrāṇi pece na deveṣu vivide marḍitāram / (13.1) Par.?

apaśyaṃ jāyām amahīyamānām adhā me śyeno madhv ā jabhāra // (13.2) Par.?