Texts

Select a text:
Bibliography

Select a chapter:
(no revisions)

Associated topic(s): Indra, Varuṇa

Show parallels Show headlines
Use dependency labeler

Chapter id: 10662

mama dvitā rāṣṭraṃ kṣatriyasya viśvāyor viśve amṛtā yathā naḥ / (1.1) Par.?

kratuṃ sacante varuṇasya devā rājāmi kṛṣṭer upamasya vavreḥ // (1.2) Par.?

ahaṃ rājā varuṇo mahyaṃ tāny asuryāṇi prathamā dhārayanta / (2.1) Par.?

kratuṃ sacante varuṇasya devā rājāmi kṛṣṭer upamasya vavreḥ // (2.2) Par.?

aham indro varuṇas te mahitvorvī gabhīre rajasī sumeke / (3.1) Par.?

tvaṣṭeva viśvā bhuvanāni vidvān sam airayaṃ rodasī dhārayaṃ ca // (3.2) Par.?

aham apo apinvam ukṣamāṇā dhārayaṃ divaṃ sadana ṛtasya / (4.1) Par.?

ṛtena putro aditer ṛtāvota tridhātu prathayad vi bhūma // (4.2) Par.?

māṃ naraḥ svaśvā vājayanto māṃ vṛtāḥ samaraṇe havante / (5.1) Par.?

kṛṇomy ājim maghavāham indra iyarmi reṇum abhibhūtyojāḥ // (5.2) Par.?

ahaṃ tā viśvā cakaraṃ nakir mā daivyaṃ saho varate apratītam / (6.1) Par.?

yan mā somāso mamadan yad ukthobhe bhayete rajasī apāre // (6.2) Par.?

viduṣ ṭe viśvā bhuvanāni tasya tā pra bravīṣi varuṇāya vedhaḥ / (7.1) Par.?

tvaṃ vṛtrāṇi śṛṇviṣe jaghanvān tvaṃ vṛtāṁ ariṇā indra sindhūn // (7.2) Par.?

asmākam atra pitaras ta āsan sapta ṛṣayo daurgahe badhyamāne / (8.1) Par.?

ta āyajanta trasadasyum asyā indraṃ na vṛtraturam ardhadevam // (8.2) Par.?

purukutsānī hi vām adāśaddhavyebhir indrāvaruṇā namobhiḥ / (9.1) Par.?

athā rājānaṃ trasadasyum asyā vṛtrahaṇaṃ dadathur ardhadevam // (9.2) Par.?

rāyā vayaṃ sasavāṃso madema havyena devā yavasena gāvaḥ / (10.1) Par.?

tāṃ dhenum indrāvaruṇā yuvaṃ no viśvāhā dhattam anapasphurantīm // (10.2) Par.?

Duration=0.14521288871765 secs.