Texts

mahi mahe tavase dīdhye nṝn indrāyetthā tavase atavyān / (1.1) Par.?

yo asmai sumatiṃ vājasātau stuto jane samaryaś ciketa // (1.2) Par.?

sa tvaṃ na indra dhiyasāno arkair harīṇāṃ vṛṣan yoktram aśreḥ / (2.1) Par.?

yā itthā maghavann anu joṣaṃ vakṣo abhi prāryaḥ sakṣi janān // (2.2) Par.?

na te ta indrābhy asmad ṛṣvāyuktāso abrahmatā yad asan / (3.1) Par.?

tiṣṭhā ratham adhi taṃ vajrahastā raśmiṃ deva yamase svaśvaḥ // (3.2) Par.?

purū yat ta indra santy ukthā gave cakarthorvarāsu yudhyan / (4.1) Par.?

tatakṣe sūryāya cid okasi sve vṛṣā samatsu dāsasya nāma cit // (4.2) Par.?

vayaṃ te ta indra ye ca naraḥ śardho jajñānā yātāś ca rathāḥ / (5.1) Par.?

āsmāñ jagamyād ahiśuṣma satvā bhago na havyaḥ prabhṛtheṣu cāruḥ // (5.2) Par.?

papṛkṣeṇyam indra tve hy ojo nṛmṇāni ca nṛtamāno amartaḥ / (6.1) Par.?

sa na enīṃ vasavāno rayiṃ dāḥ prārya stuṣe tuvimaghasya dānam // (6.2) Par.?

evā na indrotibhir ava pāhi gṛṇataḥ śūra kārūn / (7.1) Par.?

uta tvacaṃ dadato vājasātau piprīhi madhvaḥ suṣutasya cāroḥ // (7.2) Par.?

uta tye mā paurukutsyasya sūres trasadasyor hiraṇino rarāṇāḥ / (8.1) Par.?

vahantu mā daśa śyetāso asya gairikṣitasya kratubhir nu saśce // (8.2) Par.?

uta tye mā mārutāśvasya śoṇāḥ kratvāmaghāso vidathasya rātau / (9.1) Par.?

sahasrā me cyavatāno dadāna ānūkam aryo vapuṣe nārcat // (9.2) Par.?

uta tye mā dhvanyasya juṣṭā lakṣmaṇyasya suruco yatānāḥ / (10.1) Par.?

mahnā rāyaḥ saṃvaraṇasya ṛṣer vrajaṃ na gāvaḥ prayatā api gman // (10.2) Par.?