Texts

asteva su prataraṃ lāyam asyan bhūṣann iva pra bharā stomam asmai / (1.1) Par.?

vācā viprās tarata vācam aryo ni rāmaya jaritaḥ soma indram // (1.2) Par.?

dohena gām upa śikṣā sakhāyam pra bodhaya jaritar jāram indram / (2.1) Par.?

kośaṃ na pūrṇaṃ vasunā nyṛṣṭam ā cyāvaya maghadeyāya śūram // (2.2) Par.?

kim aṅga tvā maghavan bhojam āhuḥ śiśīhi mā śiśayaṃ tvā śṛṇomi / (3.1) Par.?

apnasvatī mama dhīr astu śakra vasuvidam bhagam indrā bharā naḥ // (3.2) Par.?

tvāṃ janā mamasatyeṣv indra saṃtasthānā vi hvayante samīke / (4.1) Par.?

atrā yujaṃ kṛṇute yo haviṣmān nāsunvatā sakhyaṃ vaṣṭi śūraḥ // (4.2) Par.?

dhanaṃ na syandram bahulaṃ yo asmai tīvrān somāṁ ā sunoti prayasvān / (5.1) Par.?

tasmai śatrūn sutukān prātar ahno ni svaṣṭrān yuvati hanti vṛtram // (5.2) Par.?

yasmin vayaṃ dadhimā śaṃsam indre yaḥ śiśrāya maghavā kāmam asme / (6.1) Par.?

ārāc cit san bhayatām asya śatrur ny asmai dyumnā janyā namantām // (6.2) Par.?

ārāc chatrum apa bādhasva dūram ugro yaḥ śambaḥ puruhūta tena / (7.1) Par.?

asme dhehi yavamad gomad indra kṛdhī dhiyaṃ jaritre vājaratnām // (7.2) Par.?

pra yam antar vṛṣasavāso agman tīvrāḥ somā bahulāntāsa indram / (8.1) Par.?

nāha dāmānam maghavā ni yaṃsan ni sunvate vahati bhūri vāmam // (8.2) Par.?

uta prahām ati dīvyā jayāti kṛtaṃ yac chvaghnī vicinoti kāle / (9.1) Par.?

yo devakāmo na dhanā ruṇaddhi sam it taṃ rāyā sṛjati svadhāvān // (9.2) Par.?

gobhiṣ ṭaremāmatiṃ durevāṃ yavena kṣudham puruhūta viśvām / (10.1) Par.?

vayaṃ rājabhiḥ prathamā dhanāny asmākena vṛjanenā jayema // (10.2) Par.?

bṛhaspatir naḥ pari pātu paścād utottarasmād adharād aghāyoḥ / (11.1) Par.?

indraḥ purastād uta madhyato naḥ sakhā sakhibhyo varivaḥ kṛṇotu // (11.2) Par.?