Texts

indra piba pratikāmaṃ sutasya prātaḥsāvas tava hi pūrvapītiḥ / (1.1) Par.?

harṣasva hantave śūra śatrūn ukthebhiṣ ṭe vīryā pra bravāma // (1.2) Par.?

yas te ratho manaso javīyān endra tena somapeyāya yāhi / (2.1) Par.?

tūyam ā te harayaḥ pra dravantu yebhir yāsi vṛṣabhir mandamānaḥ // (2.2) Par.?

haritvatā varcasā sūryasya śreṣṭhai rūpais tanvaṃ sparśayasva / (3.1) Par.?

asmābhir indra sakhibhir huvānaḥ sadhrīcīno mādayasvā niṣadya // (3.2) Par.?

yasya tyat te mahimānam madeṣv ime mahī rodasī nāviviktām / (4.1) Par.?

tad oka ā haribhir indra yuktaiḥ priyebhir yāhi priyam annam accha // (4.2) Par.?

yasya śaśvat papivāṃ indra śatrūn anānukṛtyā raṇyā cakartha / (5.1) Par.?

sa te purandhiṃ taviṣīm iyarti sa te madāya suta indra somaḥ // (5.2) Par.?

idaṃ te pātraṃ sanavittam indra pibā somam enā śatakrato / (6.1) Par.?

pūrṇa āhāvo madirasya madhvo yaṃ viśva id abhiharyanti devāḥ // (6.2) Par.?

vi hi tvām indra purudhā janāso hitaprayaso vṛṣabha hvayante / (7.1) Par.?

asmākaṃ te madhumattamānīmā bhuvan savanā teṣu harya // (7.2) Par.?

pra ta indra pūrvyāṇi pra nūnaṃ vīryā vocam prathamā kṛtāni / (8.1) Par.?

satīnamanyur aśrathāyo adriṃ suvedanām akṛṇor brahmaṇe gām // (8.2) Par.?

ni ṣu sīda gaṇapate gaṇeṣu tvām āhur vipratamaṃ kavīnām / (9.1) Par.?

na ṛte tvat kriyate kiṃ canāre mahām arkam maghavañ citram arca // (9.2) Par.?

abhikhyā no maghavan nādhamānān sakhe bodhi vasupate sakhīnām / (10.1) Par.?

raṇaṃ kṛdhi raṇakṛt satyaśuṣmābhakte cid ā bhajā rāye asmān // (10.2) Par.?