Texts

Select a text:
Bibliography

Select a chapter:
(no revisions)

Associated topic(s): Agni

Show parallels Show headlines
Use dependency labeler

Chapter id: 9897

vasuṃ na citramahasaṃ gṛṇīṣe vāmaṃ śevam atithim adviṣeṇyam / (1.1) Par.?

sa rāsate śurudho viśvadhāyaso 'gnir hotā gṛhapatiḥ suvīryam // (1.2) Par.?

juṣāṇo agne prati harya me vaco viśvāni vidvān vayunāni sukrato / (2.1) Par.?

ghṛtanirṇig brahmaṇe gātum eraya tava devā ajanayann anu vratam // (2.2) Par.?

sapta dhāmāni pariyann amartyo dāśad dāśuṣe sukṛte māmahasva / (3.1) Par.?

suvīreṇa rayiṇāgne svābhuvā yas ta ānaṭ samidhā taṃ juṣasva // (3.2) Par.?

yajñasya ketum prathamam purohitaṃ haviṣmanta īḍate sapta vājinam / (4.1) Par.?

śṛṇvantam agniṃ ghṛtapṛṣṭham ukṣaṇam pṛṇantaṃ devam pṛṇate suvīryam // (4.2) Par.?

tvaṃ dūtaḥ prathamo vareṇyaḥ sa hūyamāno amṛtāya matsva / (5.1) Par.?

tvām marjayan maruto dāśuṣo gṛhe tvāṃ stomebhir bhṛgavo vi rurucuḥ // (5.2) Par.?

iṣaṃ duhan sudughāṃ viśvadhāyasaṃ yajñapriye yajamānāya sukrato / (6.1) Par.?

agne ghṛtasnus trir ṛtāni dīdyad vartir yajñam pariyan sukratūyase // (6.2) Par.?

tvām id asyā uṣaso vyuṣṭiṣu dūtaṃ kṛṇvānā ayajanta mānuṣāḥ / (7.1) Par.?

tvāṃ devā mahayāyyāya vāvṛdhur ājyam agne nimṛjanto adhvare // (7.2) Par.?

ni tvā vasiṣṭhā ahvanta vājinaṃ gṛṇanto agne vidatheṣu vedhasaḥ / (8.1) Par.?

rāyaspoṣaṃ yajamāneṣu dhāraya yūyam pāta svastibhiḥ sadā naḥ // (8.2) Par.?

Duration=0.035869121551514 secs.