Texts

Help

Select a text:
Bibliography
Select a chapter:
 (no revisions)
Associated topic(s): Atharvaveda, Vedic hymns, śastras

Show parallels  Show headlines
Use dependency labeler
Chapter id: 12088
  • Click on a sentence to show its analysis
  • Keep the mouse pointer over a lemma to show its meanings.
4 parallel or similar passage(s) in this chapter
aitaśapralāpaṃ śaṃsati // (1.0) Par.?
aitaśo ha vai munir agner āyur dadarśa yajñasyāyātayāmam iti haika āhuḥ so 'bravīt putrān putrakā agner āyur adarśaṃ tad abhilapiṣyāmi yat kiṃca vadāmi tan me mā parigāteti sa pratyapadyataitā aśvā āplavante pratīpam prātisatvanam iti // (2.0) Par.?
tasyābhyagnir aitaśāyana etyākāle 'bhihāya mukham apyagṛhṇād adṛpan naḥ piteti // (3.0) Par.?
taṃ hovācāpehy alaso 'bhūr yo me vācam avadhīḥ śatāyuṃ gām akariṣyaṃ sahasrāyum puruṣam pāpiṣṭhāṃ te prajāṃ karomi yo mettham asakthā iti // (4.0) Par.?
tasmād āhur abhyagnaya aitaśāyanā aurvāṇām pāpiṣṭhā iti // (5.0) Par.?
taṃ haike bhūyāṃsaṃ śaṃsanti // (6.0) Par.?
sa na niṣedhed yāvatkāmaṃ śaṃsety eva brūyād āyur vā aitaśapralāpaḥ // (7.0) Par.?
āyur eva tad yajamānasya pratārayati ya evaṃ veda // (8.0) Par.?
yad evaitaśapralāpāḥ // (9.0) Par.?
chandasāṃ haiṣa raso yad aitaśapralāpaś chandassv eva tad rasaṃ dadhāti // (10.0) Par.?
sarasair hāsya chandobhir iṣṭam bhavati sarasaiś chandobhir yajñaṃ tanute ya evaṃ veda // (11.0) Par.?
yad v evaitaśapralāpāḥ // (12.0) Par.?
ayātayāmā vā akṣitir aitaśapralāpo 'yātayāmā me yajñe 'sad akṣitir me yajñe 'saditi // (13.0) Par.?
taṃ vā etam aitaśapralāpaṃ śaṃsati padāvagrāhaṃ yathā nividam // (14.0) Par.?
tasyottamena padena praṇauti yathā nividaḥ // (15.0) Par.?
pravalhikāḥ śaṃsati pravalhikābhir vai devā asurān pravalhyāthainān atyāyaṃs tathaivaitad yajamānāḥ pravalhikābhir evāpriyam bhrātṛvyam pravalhyāthainam atiyanti // (16.0) Par.?
tā ardharcaśaḥ śaṃsati pratiṣṭhāyā eva // (17.0) Par.?
ājijñāsenyāḥ śaṃsaty ājijñāsenyābhir vai devā asurān ājñāyāthainān atyāyaṃs tathaivaitad yajamānā ājijñāsenyābhir evāpriyam bhrātṛvyam ājñāyāthainam atiyanti tā ardharcaśaḥ śaṃsati pratiṣṭhāyā eva // (18.0) Par.?
pratirādhaṃ śaṃsati pratirādhena vai devā asurān pratirādhyāthainān atyāyaṃs tathaivaitad yajamānāḥ pratirādhenaivāpriyam bhrātṛvyam pratirādhyāthainam atiyanti // (19.0) Par.?
ativādaṃ śaṃsaty ativādena vai devā asurān atyudyāthainān atyāyaṃs tathaivaitad yajamānā ativādenaivāpriyam bhrātṛvyam atyudyāthainam atiyanti tam ardharcaśaḥ śaṃsati pratiṣṭhāyā eva // (20.0) Par.?
Duration=0.052327871322632 secs.