Texts

Select a text:
Bibliography

Select a chapter:
(no revisions)

Associated topic(s): ājya hymns

Show parallels Show headlines
Use dependency labeler

Chapter id: 15436

teṣāṃ paccho 'sṛjyanta // (1) Par.?

teṣām agniḥ prathama udajayad atha mitrāvaruṇāv athendraḥ // (2) Par.?

athaikam anujjitam āsīt // (3) Par.?

tad indro 'ved agnir vāvedam ujjeṣyatīti // (4) Par.?

so 'bravīd agne yatara āvayor idam ujjayāt tan nau sahāsad iti // (5) Par.?

tatheti // (6) Par.?

tad agnir udajayat // (7) Par.?

tad enayoḥ sahābhavad adhyardham anyasya stotram adhyardham anyasya // (8) Par.?

aindrāgno yajñaḥ // (9) Par.?

sa ya evam etā devānām ujjitīr veda yatra kāmayata ud iha jayeyam ity ut tatra jayati // (10) Par.?

tad āhur yad ājyāni sarvāṇi samānanidhanāni kenājāmi kriyanta iti // (11) Par.?

nānādevatyānīti brūyāt tenājāmīti // (12) Par.?

atho yan nānārūpāṇīti brūyāt teno eveti // (13) Par.?

te vā ete paśava eva // (14) Par.?

yad ājyāny antaḥsadasaṃ stuvanti tasmād grāmyāḥ paśavo 'ntar grāme nyokasaḥ // (15) Par.?

parācīṣu punarabhyāvartam // (16) Par.?

tasmād grāmyāḥ paśavaḥ parāñcaḥ prātaḥ prerate te sāyaṃ samāvartante // (17) Par.?

nānārūpāsu stuvanti // (18) Par.?

tasmād grāmyāḥ paśavo nānārūpāḥ // (19) Par.?

nānādevatyāsu stuvanti // (20) Par.?

tasmād grāmyāḥ paśavo nānānaṃ yathāyathaṃ sāyaṃ gṛhān abhyupāyanti // (21) Par.?

Duration=0.15518617630005 secs.