Texts

Help

Select a text:
Bibliography
Select a chapter:
 (no revisions)
Associated topic(s): ukhya, āhavanīya

Show parallels  Show headlines
Use dependency labeler
Chapter id: 13025
  • Click on a sentence to show its analysis
  • Keep the mouse pointer over a lemma to show its meanings.
189 parallel or similar passage(s) in this chapter
dṛśāno rukma urvyā vyadyaud durmarṣam āyuḥ śriye rucānaḥ / (1.1) Par.?
agnir amṛto abhavad vayobhir yad enaṃ dyaur janayat suretāḥ // (1.2) Par.?
naktoṣāsā samanasā virūpe dhāpayete śiśum ekaṃ samīcī / (2.1) Par.?
dyāvākṣāmā rukmo antar vibhāti devā agniṃ dhārayan draviṇodāḥ // (2.2) Par.?
viśvā rūpāṇi pratimuñcate kaviḥ prāsāvīd bhadraṃ dvipade catuṣpade / (3.1) Par.?
vi nākam akhyat savitā vareṇyo 'nu prayāṇam uṣaso virājati // (3.2) Par.?
suparṇo 'si garutmāṃs trivṛt te śiro gāyatraṃ cakṣur bṛhadrathantare pakṣau / (4.1) Par.?
stoma ātmā chandāṃsy aṅgāni yajūṃṣi nāma / (4.2) Par.?
sāma te tanūr vāmadevyaṃ yajñāyajñiyaṃ pucchaṃ dhiṣṇyāḥ śaphāḥ / (4.3) Par.?
suparṇo 'si garutmān divaṃ gaccha svaḥ pata // (4.4) Par.?
viṣṇoḥ kramo 'si sapatnahā gāyatraṃ chanda āroha pṛthivīm anu vikramasva / (5.1) Par.?
viṣṇoḥ kramo 'sy abhimātihā traiṣṭubhaṃ chanda ārohāntarikṣam anu vikramasva / (5.2) Par.?
viṣṇoḥ kramo 'sy arātīyato hantā jāgataṃ chanda āroha divam anu vikramasva / (5.3) Par.?
viṣṇoḥ kramo 'si śatrūyato hantānuṣṭubhaṃ chanda āroha diśo 'nu vikramasva // (5.4) Par.?
akrandad agni stanayann iva dyauḥ kṣāmā rerihad vīrudhaḥ samañjan / (6.1) Par.?
sadyo jajñāno vi hīm iddho akhyad ā rodasī bhānunā bhāty antaḥ // (6.2) Par.?
agne 'bhyāvartinn abhi mā nivartasvāyuṣā varcasā prajayā dhanena / (7.1) Par.?
sanyā medhayā rayyā poṣeṇa // (7.2) Par.?
agne aṅgiraḥ śataṃ te santv āvṛtaḥ sahasraṃ ta upāvṛtaḥ / (8.1) Par.?
adhā poṣasya poṣeṇa punar no naṣṭam ākṛdhi punar no rayim ākṛdhi // (8.2) Par.?
punar ūrjā nivartasva punar agna iṣāyuṣā / (9.1) Par.?
punar naḥ pāhy aṃhasaḥ // (9.2) Par.?
saha rayyā nivartasvāgne pinvasva dhārayā / (10.1) Par.?
viśvapsnyā viśvatas pari // (10.2) Par.?
ā tvāhārṣam antar abhūr dhruvas tiṣṭhāvicācaliḥ / (11.1) Par.?
viśas tvā sarvā vāñchantu mā tvad rāṣṭram adhibhraśat // (11.2) Par.?
ud uttamaṃ varuṇa pāśam asmad avādhamaṃ vi madhyamaṃ śrathāya / (12.1) Par.?
athā vayam āditya vrate tavānāgaso aditaye syāma // (12.2) Par.?
agre bṛhann uṣasām ūrdhvo asthān nirjaganvān tamaso jyotiṣāgāt / (13.1) Par.?
agnir bhānunā ruśatā svaṅga ājāto viśvā sadmāny aprāḥ // (13.2) Par.?
haṃsaḥ śuciṣad vasur antarikṣasaddhotā vediṣad atithir dūroṇasat / (14.1) Par.?
nṛṣad varasad ṛtasad vyomasad abjā gojā ṛtajā adrijā ṛtam / (14.2) Par.?
bṛhat // (14.3) Par.?
sīda tvaṃ mātur asyā upasthe viśvāny agne vayunāni vidvān / (15.1) Par.?
maināṃ tapasā mārciṣābhiśocīr antar asyāṃ śukrajyotir vibhāhi // (15.2) Par.?
antar agne rucā tvam ukhāyāḥ sadane sve / (16.1) Par.?
tasyās tvaṃ harasā tapan jātavedaḥ śivo bhava // (16.2) Par.?
śivo bhūtvā mahyam agne atho sīda śivas tvam / (17.1) Par.?
śivāḥ kṛtvā diśaḥ sarvāḥ svaṃ yonim ihāsadaḥ // (17.2) Par.?
divas pari prathamaṃ jajñe agnir asmād dvitīyaṃ pari jātavedāḥ / (18.1) Par.?
tṛtīyam apsu nṛmaṇā ajasram indhāna enaṃ jarate svādhīḥ // (18.2) Par.?
vidmā te agne tredhā trayāṇi vidmā te dhāma vibhṛtā purutrā / (19.1) Par.?
vidmā te nāma paramaṃ guhā yad vidmā tam utsaṃ yata ājagantha // (19.2) Par.?
samudre tvā nṛmaṇā apsv antar nṛcakṣā īdhe divo agna ūdhan / (20.1) Par.?
tṛtīye tvā rajasi tasthivāṃsam apām upasthe mahiṣā avardhan // (20.2) Par.?
akrandad agni stanayann iva dyauḥ kṣāmā rerihad vīrudhaḥ samañjan / (21.1) Par.?
sadyo jajñāno vi hīm iddho akhyad ā rodasī bhānunā bhāty antaḥ // (21.2) Par.?
śrīṇām udāro dharuṇo rayīṇāṃ manīṣāṇāṃ prārpaṇaḥ somagopāḥ / (22.1) Par.?
vasuḥ sūnuḥ sahaso apsu rājā vibhāty agra uṣasām idhānaḥ // (22.2) Par.?
viśvasya ketur bhuvanasya garbha ā rodasī apṛṇāj jāyamānaḥ / (23.1) Par.?
vīḍuṃ cid adrim abhinat parāyañ janā yad agnim ayajanta pañca // (23.2) Par.?
uśik pāvako aratiḥ sumedhā martyeṣvagnir amṛto nidhāyi / (24.1) Par.?
iyarti dhūmam aruṣaṃ bharibhrad ucchukreṇa śociṣā dyām inakṣan // (24.2) Par.?
dṛśāno rukma urvyā vyadyaud durmarṣam āyuḥ śriye rucānaḥ / (25.1) Par.?
agnir amṛto abhavad vayobhir yad enaṃ dyaur janayat suretāḥ // (25.2) Par.?
yas te adya kṛṇavad bhadraśoce 'pūpaṃ deva ghṛtavantam agne / (26.1) Par.?
pra taṃ naya prataraṃ vasyo acchābhi sumnaṃ devabhaktaṃ yaviṣṭha // (26.2) Par.?
ā taṃ bhaja sauśravaseṣv agna uktha uktha ābhaja śasyamāne / (27.1) Par.?
priyaḥ sūrye priyo agnā bhavāty uj jātena bhinadad uj janitvaiḥ // (27.2) Par.?
tvām agne yajamānā anu dyūn viśvā vasu dadhire vāryāṇi / (28.1) Par.?
tvayā saha draviṇam icchamānā vrajaṃ gomantam uśijo vivavruḥ // (28.2) Par.?
astāvy agnir narāṃ suśevo vaiśvānara ṛṣibhiḥ somagopāḥ / (29.1) Par.?
adveṣe dyāvāpṛthivī huvema devā dhatta rayim asme suvīram // (29.2) Par.?
vanīvāhana
samidhāgniṃ duvasyata ghṛtair bodhayatātithim / (30.1) Par.?
āsmin havyā juhotana // (30.2) Par.?
ud u tvā viśve devā agne bharantu cittibhiḥ / (31.1) Par.?
sa no bhava śivas tvaṃ supratīko vibhāvasuḥ // (31.2) Par.?
pred agne jyotiṣmān yāhi śivebhir arcibhiṣṭvam / (32.1) Par.?
bṛhadbhir bhānubhir bhāsan mā hiṃsīs tanvā prajāḥ // (32.2) Par.?
akrandad agni stanayann iva dyauḥ kṣāmā rerihad vīrudhaḥ samañjan / (33.1) Par.?
sadyo jajñāno vi hīm iddho akhyad ā rodasī bhānunā bhāty antaḥ // (33.2) Par.?
pra prāyam agnir bharatasya śṛṇve vi yat sūryo na rocate bṛhad bhāḥ / (34.1) Par.?
abhi yaḥ pūruṃ pṛtanāsu tasthau dīdāya daivyo atithiḥ śivo naḥ // (34.2) Par.?
āpo devīḥ pratigṛbhṇīta bhasmaitat syone kṛṇudhvaṃ surabhā loke / (35.1) Par.?
tasmai namantāṃ janayaḥ supatnīr māteva putraṃ bibhṛtāpsv enat // (35.2) Par.?
apsv agne sadhiṣṭava sauṣadhīr anurudhyase / (36.1) Par.?
garbhe san jāyase punaḥ // (36.2) Par.?
garbhe sañ jāyase punaḥ // (ṚV, 8, 43, 9, 2) [0]
garbho asy oṣadhīnāṃ garbho vanaspatīnām / (37.1) Par.?
garbho viśvasya bhūtasyāgne garbho apām asi // (37.2) Par.?
prasadya bhasmanā yonim apaś ca pṛthivīm agne / (38.1) Par.?
saṃsṛjya mātṛbhiṣṭvaṃ jyotiṣmān punar āsadaḥ // (38.2) Par.?
punar āsadya sadanam apaś ca pṛthivīm agne / (39.1) Par.?
śeṣe mātur yathopasthe 'ntar asyāṃ śivatamaḥ // (39.2) Par.?
punar ūrjā nivartasva punar agna iṣāyuṣā / (40.1) Par.?
punar naḥ pāhyaṃhasaḥ // (40.2) Par.?
saha rayyā nivartasvāgne pinvasva dhārayā / (41.1) Par.?
viśvapsnyā viśvatas pari // (41.2) Par.?
viśvapsnyā viśvatas pari // (MS, 1, 7, 1, 11, 2) [0]
bodhā me asya vacaso yaviṣṭha maṃhiṣṭhasya prabhṛtasya svadhāvaḥ / (42.1) Par.?
pīyati tvo anu tvo gṛṇāti vandāruṣ ṭe tanvaṃ vande agne // (42.2) Par.?
sa bodhi sūrir maghavā vasupate vasudāvan / (43.1) Par.?
yuyodhy asmad dveṣāṃsi / (43.2) Par.?
viśvakarmaṇe svāhā // (43.3) Par.?
punas tvādityā rudrā vasavaḥ samindhatāṃ punar brahmāṇo vasunītha yajñaiḥ / (44.1) Par.?
ghṛtena tvaṃ tanvaṃ vardhayasva satyāḥ santu yajamānasya kāmāḥ // (44.2) Par.?
apeta vīta vi ca sarpatāto ye 'tra stha purāṇā ye ca nūtanāḥ / (45.1) Par.?
adād yamo 'vasānaṃ pṛthivyā akrann imaṃ pitaro lokam asmai // (45.2) Par.?
saṃjñānam asi / (46.1) Par.?
kāmadharaṇam / (46.2) Par.?
mayi te kāmadharaṇaṃ bhūyāt / (46.3) Par.?
agner bhasmāsy agneḥ purīṣam asi / (46.4) Par.?
cita stha paricita ūrdhvacitaḥ śnayadhvam // (46.5) Par.?
ayaṃ so agnir yasmint somam indraḥ sutaṃ dadhe jaṭhare vāvaśānaḥ / (47.1) Par.?
sahasriṇaṃ vājam atyaṃ na saptiṃ sasavānt sant stūyase jātavedaḥ // (47.2) Par.?
agne yat te divi varcaḥ pṛthivyāṃ yad oṣadhīṣv apsv ā yajatra / (48.1) Par.?
yenāntarikṣam urv ātatantha tveṣaḥ sa bhānur arṇavo nṛcakṣāḥ // (48.2) Par.?
agne divo arṇam acchā jigāsy acchā devāṁ ūciṣe dhiṣṇyā ye / (49.1) Par.?
yā rocane parastāt sūryasya yāś cāvastād upatiṣṭhanta āpaḥ // (49.2) Par.?
purīṣyāso agnayaḥ prāvaṇebhiḥ sajoṣasaḥ / (50.1) Par.?
juṣantāṃ yajñam adruho 'namīvā iṣo mahīḥ // (50.2) Par.?
iḍām agne purudaṃsaṃ saniṃ goḥ śaśvattamaṃ havamānāya sādha / (51.1) Par.?
syān naḥ sūnus tanayo vijāvāgne sā te sumatir bhūtv asme // (51.2) Par.?
ayaṃ te yonir ṛtviyo yato jāto arocathāḥ / (52.1) Par.?
taṃ jānann agna ārohāthā no vardhayā rayim // (52.2) Par.?
cid asi tayā devatayāṅgirasvad dhruvā sīda / (53.1) Par.?
paricid asi tayā devatayāṅgirasvad dhruvā sīda // (53.2) Par.?
lokaṃ pṛṇa chidraṃ pṛṇātho sīda dhruvā tvam / (54.1) Par.?
indrāgnī tvā bṛhaspatir asmin yonāvasīṣadan // (54.2) Par.?
tā asya sūdadohasaḥ somaṃ śrīṇanti pṛśnayaḥ / (55.1) Par.?
janman devānāṃ viśas triṣv ā rocane divaḥ // (55.2) Par.?
indraṃ viśvā avīvṛdhant samudravyacasaṃ giraḥ / (56.1) Par.?
rathītamaṃ rathīnāṃ vājānāṃ satpatiṃ patim // (56.2) Par.?
samitaṃ saṃkalpethāṃ sampriyau rociṣṇū sumanasyamānau / (57.1) Par.?
iṣam ūrjam abhi saṃvasānau // (57.2) Par.?
saṃ vāṃ manāṃsi saṃ vratā sam u cittāny ākaram / (58.1) Par.?
agne purīṣyādhipā bhava tvaṃ na iṣam ūrjaṃ yajamānāya dhehi // (58.2) Par.?
agne tvaṃ purīṣyo rayimān puṣṭimāṁ asi / (59.1) Par.?
śivāḥ kṛtvā diśaḥ sarvāḥ yonim ihāsadaḥ // (59.2) Par.?
bhavataṃ naḥ samanasau sacetasāv arepasau / (60.1) Par.?
mā yajñaṃ hiṃsiṣṭaṃ mā yajñapatiṃ jātavedasau śivau bhavatam adya naḥ // (60.2) Par.?
māteva putraṃ pṛthivī purīṣyam agniṃ sve yonāv abhār ukhā / (61.1) Par.?
tāṃ viśvair devair ṛtubhiḥ saṃvidānaḥ prajāpatir viśvakarmā vimuñcatu // (61.2) Par.?
asunvantam ayajamānam iccha stenasyetyām anvihi taskarasya / (62.1) Par.?
anyam asmad iccha sā ta ityā namo devi nirṛte tubhyam astu // (62.2) Par.?
namaḥ su te nirṛte tigmatejo 'yasmayaṃ vicṛtā bandham etam / (63.1) Par.?
yamena tvaṃ yamyā saṃvidānottame nāke adhi rohayainam // (63.2) Par.?
yasyās te ghora āsan juhomy eṣāṃ bandhānām avasarjanāya / (64.1) Par.?
yāṃ tvā jano bhūmir iti pramandate nirṛtiṃ tvāhaṃ pariveda viśvataḥ // (64.2) Par.?
yaṃ te devī nirṛtir ābabandha pāśaṃ grīvāsv avicṛtyam / (65.1) Par.?
taṃ te viṣyāmy āyuṣo na madhyād athaitaṃ pitum addhi prasūtaḥ / (65.2) Par.?
namo bhūtyai yedaṃ cakāra // (65.3) Par.?
niveśanaḥ saṃgamano vasūnāṃ viśvā rūpābhicaṣṭe śacībhiḥ / (66.1) Par.?
deva iva savitā satyadharmendro na tasthau samare pathīnām // (66.2) Par.?
sīrā yuñjanti kavayo yugā vitanvate pṛthak / (67.1) Par.?
dhīrā deveṣu sumnayā // (67.2) Par.?
dhīrā deveṣu sumnayā // (ṚV, 10, 101, 4, 2) [0]
yunakta sīrā vi yugā tanudhvaṃ kṛte yonau vapateha bījam / (68.1) Par.?
girā ca śruṣṭiḥ sabharā asan no nedīya it sṛṇyaḥ pakvam eyāt // (68.2) Par.?
śunaṃ su phālā vikṛṣantu bhūmiṃ śunaṃ kīnāśā abhiyantu vāhaiḥ / (69.1) Par.?
śunāsīrā haviṣā tośamānā supippalā oṣadhīḥ kartanāsme // (69.2) Par.?
ghṛtena sītā madhunā samajyatāṃ viśvair devair anumatā marudbhiḥ / (70.1) Par.?
ūrjasvatī payasā pinvamānāsmānt sīte payasābhyāvavṛtsva // (70.2) Par.?
lāṅgalaṃ pavīravat suśevaṃ somapitsaru / (71.1) Par.?
tad udvapati gām aviṃ prapharvyaṃ ca pīvarīṃ prasthāvad rathavāhanam // (71.2) Par.?
kāmaṃ kāmadughe dhukṣva mitrāya varuṇāya ca / (72.1) Par.?
indrāyāśvibhyāṃ pūṣṇe prajābhya oṣadhībhyaḥ // (72.2) Par.?
vimucyadhvam aghnyā devayānā aganma tamasas pāram asya jyotir āpāma // (73.1) Par.?
sajūr abdo ayavobhiḥ sajūr uṣā aruṇībhiḥ sajoṣasāv aśvinā daṃsobhiḥ sajūḥ sūra etaśena sajūr vaiśvānara iḍayā ghṛtena svāhā // (74.1) Par.?
yā oṣadhīḥ pūrvā jātā devebhyas triyugaṃ purā / (75.1) Par.?
manai nu babhrūṇām ahaṃ śataṃ dhāmāni sapta ca // (75.2) Par.?
śataṃ vo amba dhāmāni sahasram uta vo ruhaḥ / (76.1) Par.?
adhā śatakratvo yūyam imaṃ me agadaṃ kṛta // (76.2) Par.?
oṣadhīḥ pratimodadhvaṃ puṣpavatīḥ prasūvarīḥ / (77.1) Par.?
aśvā iva sajitvarīr vīrudhaḥ pārayiṣṇvaḥ // (77.2) Par.?
oṣadhīr iti mātaras tad vo devīr upabruve / (78.1) Par.?
saneyam aśvaṃ gāṃ vāsa ātmānaṃ tava pūruṣa // (78.2) Par.?
aśvatthe vo niṣadanaṃ parṇe vo vasatiṣ kṛtā / (79.1) Par.?
gobhāja it kilāsatha yat sanavatha pūruṣam // (79.2) Par.?
yatrauṣadhīḥ samagmata rājānaḥ samitāv iva / (80.1) Par.?
vipraḥ sa ucyate bhiṣag rakṣohāmīvacātanaḥ // (80.2) Par.?
aśvāvatīṃ somāvatīm ūrjayantīm udojasam / (81.1) Par.?
āvitsi sarvā oṣadhīr asmā ariṣṭatātaye // (81.2) Par.?
ucchuṣmā oṣadhīnāṃ gāvo goṣṭhād iverate / (82.1) Par.?
dhanaṃ saniṣyantīnām ātmānaṃ tava pūruṣa // (82.2) Par.?
iṣkṛtir nāma vo mātātho yūyaṃ stha niṣkṛtīḥ / (83.1) Par.?
sīrāḥ patatriṇī sthana yad āmayati niṣkṛtha // (83.2) Par.?
ati viśvāḥ pariṣṭhā stena iva vrajam akramuḥ / (84.1) Par.?
oṣadhīḥ prācucyavur yat kiṃca tanvo rapaḥ // (84.2) Par.?
yad imā vājayann aham oṣadhīr hasta ādadhe / (85.1) Par.?
ātmā yakṣmasya naśyati purā jīvagṛbho yathā // (85.2) Par.?
yasyauṣadhīḥ prasarpathāṅgamaṅgaṃ paruṣparuḥ / (86.1) Par.?
tato yakṣmaṃ vibādhadhva ugro madhyamaśīr iva // (86.2) Par.?
sākaṃ yakṣma prapata cāṣeṇa kikidīvinā / (87.1) Par.?
sākaṃ vātasya dhrājyā sākaṃ naśya nihākayā // (87.2) Par.?
anyā vo anyām avatv anyānyasyā upāvata / (88.1) Par.?
tāḥ sarvāḥ saṃvidānā idaṃ me prāvatā vacaḥ // (88.2) Par.?
yāḥ phalinīr yā aphalā apuṣpā yāś ca puṣpiṇīḥ / (89.1) Par.?
bṛhaspatiprasūtās tā no muñcantv aṃhasaḥ // (89.2) Par.?
muñcantu mā śapathyād atho varuṇyād uta / (90.1) Par.?
atho yamasya paḍvīśāt sarvasmād devakilbiṣāt // (90.2) Par.?
avapatantīr avadan diva oṣadhayas pari / (91.1) Par.?
avapatantīr avadan diva oṣadhayas pari / (ṚV, 10, 97, 17, 1) [0]
yaṃ jīvam aśnavāmahai na sa riṣyāti pūruṣaḥ // (91.2) Par.?
yā oṣadhīḥ somarājñīr bahvīḥ śatavicakṣaṇāḥ / (92.1) Par.?
tāsām asi tvam uttamāraṃ kāmāya śaṃ hṛde // (92.2) Par.?
yā oṣadhīḥ somarājñīr viṣṭhitāḥ pṛthivīm anu / (93.1) Par.?
bṛhaspatiprasūtā asyai saṃdatta vīryam // (93.2) Par.?
yāś cedam upaśṛṇvanti yāś ca dūraṃ parāgatāḥ / (94.1) Par.?
sarvāḥ saṃgatya vīrudho 'syai saṃdatta vīryam // (94.2) Par.?
mā vo riṣat khanitā yasmai cāhaṃ khanāmi vaḥ / (95.1) Par.?
dvipāc catuṣpād asmākaṃ sarvam astv anāturam // (95.2) Par.?
oṣadhayaḥ samavadanta somena saha rājñā / (96.1) Par.?
yasmai kṛṇoti brāhmaṇas taṃ rājan pārayāmasi // (96.2) Par.?
nāśayitrī balāsasyārśasa upacitām asi / (97.1) Par.?
atho śatasya yakṣmāṇāṃ pākāror asi nāśanī // (97.2) Par.?
tvāṃ gandharvā akhanaṃs tvām indras tvāṃ bṛhaspatiḥ / (98.1) Par.?
tvām oṣadhe somo rājā vidvān yakṣmād amucyata // (98.2) Par.?
sahasva me arātīḥ sahasva pṛtanāyataḥ / (99.1) Par.?
sahasva sarvaṃ pāpmānaṃ sahamānāsy oṣadhe // (99.2) Par.?
dīrghāyus ta oṣadhe khanitā yasmai ca tvā khanāmyaham / (100.1) Par.?
atho tvaṃ dīrghāyur bhūtvā śatavalśā virohatāt // (100.2) Par.?
tvam uttamāsyoṣadhe tava vṛkṣā upastayaḥ / (101.1) Par.?
upastir astu so 'smākaṃ yo asmāṁ abhidāsati // (101.2) Par.?
mā mā hiṃsīj janitā yaḥ pṛthivyā yo vā divaṃ satyadharmā vyānaṭ / (102.1) Par.?
yaś cāpaś candrāḥ prathamo jajāna kasmai devāya haviṣā vidhema // (102.2) Par.?
abhyāvartasva pṛthivi yajñena payasā saha / (103.1) Par.?
vapāṃ te agnir iṣito arohat // (103.2) Par.?
agne yat te śukraṃ yac candraṃ yat pūtaṃ yacca yajñiyam / (104.1) Par.?
tad devebhyo bharāmasi // (104.2) Par.?
iṣam ūrjam aham ita ādam ṛtasya yoniṃ mahiṣasya dhārām / (105.1) Par.?
ā mā goṣu viśatvā tanūṣu jahāmi sedim anirām amīvām // (105.2) Par.?
agne tava śravo vayo mahi bhrājante arcayo vibhāvaso / (106.1) Par.?
bṛhadbhāno śavasā vājam ukthyaṃ dadhāsi dāśuṣe kave // (106.2) Par.?
pāvakavarcāḥ śukravarcā anūnavarcā udiyarṣi bhānunā / (107.1) Par.?
putro mātarā vicarann upāvasi pṛṇakṣi rodasī ubhe // (107.2) Par.?
ūrjo napāj jātavedaḥ suśastibhir mandasva dhītibhir hitaḥ / (108.1) Par.?
tve iṣaḥ saṃdadhur bhūrivarpasaś citrotayo vāmajātāḥ // (108.2) Par.?
irajyann agne prathayasva jantubhir asme rāyo amartya / (109.1) Par.?
sa darśatasya vapuṣo virājasi pṛṇakṣi sānasiṃ kratum // (109.2) Par.?
iṣkartāram adhvarasya pracetasaṃ kṣayantaṃ rādhaso mahaḥ / (110.1) Par.?
rātiṃ vāmasya subhagāṃ mahīm iṣaṃ dadhāsi sānasiṃ rayim // (110.2) Par.?
ṛtāvānaṃ mahiṣaṃ viśvadarśatam agniṃ sumnāya dadhire puro janāḥ / (111.1) Par.?
śrutkarṇaṃ saprathastamaṃ tvā girā daivyaṃ mānuṣā yugā // (111.2) Par.?
āpyāyasva sametu te viśvataḥ soma vṛṣṇyam / (112.1) Par.?
bhavā vājasya saṃgathe // (112.2) Par.?
bhavā vājasya saṃgathe // (ṚV, 1, 91, 16, 2) [0]
bhavā vājasya saṃgathe // (ṚV, 9, 31, 4, 2) [0]
saṃ te payāṃsi sam u yantu vājāḥ saṃ vṛṣṇyāny abhimātiṣāhaḥ / (113.1) Par.?
āpyāyamāno amṛtāya soma divi śravāṃsy uttamāni dhiṣva // (113.2) Par.?
āpyāyasva madintama soma viśvebhir aṃśubhiḥ / (114.1) Par.?
bhavā naḥ suśravastamaḥ sakhā vṛdhe // (114.2) Par.?
ā te vatso mano yamat paramāc cit sadhasthāt / (115.1) Par.?
agne tvāṃkāmayā girā // (115.2) Par.?
agne tvāṅkāmayā girā // (ṚV, 8, 11, 7, 2) [0]
tubhyaṃ tā aṅgirastama viśvāḥ sukṣitayaḥ pṛthak / (116.1) Par.?
agne kāmāya yemire // (116.2) Par.?
agne kāmāya yemire // (ṚV, 8, 43, 18, 2) [0]
agniḥ priyeṣu dhāmasu kāmo bhūtasya bhavyasya / (117.1) Par.?
samrāḍ eko virājati // (117.2) Par.?
Duration=0.49773097038269 secs.