Texts

samid diśām āśayānaḥ svarvin madhu reto mādhavaḥ pātv asmān / (1.1) Par.?

agnir devo duṣṭarītur adabdha idaṃ kṣatraṃ rakṣatu pātv asmān // (1.2) Par.?

rathantaraṃ sāmabhiḥ pātv asmān gāyatrī chandasāṃ viśvarūpā / (2.1) Par.?

trivṛn no viṣṭhayā stomo ahnā samudro vāta idam ojaḥ pipartu // (2.2) Par.?

ugrā diśām abhibhūtir vayodhāḥ śuciḥ śukre ahann ojasīne / (3.1) Par.?

indrādhipatyaiḥ pipṛtād ato no mahi kṣatraṃ viśvato dhārayedam // (3.2) Par.?

bṛhat sāma kṣatrabhṛd vṛddhavṛṣṇaṃ triṣṭubhaujaḥ śubhitam ugravīram / (4.1) Par.?

indraḥ stomena pañcadaśena madhyam idaṃ vātena sagareṇa rakṣatu // (4.2) Par.?

prācī diśāṃ sahayaśā yaśasvatī viśve devāḥ prāvṛṣāhnāṃ svarvatī / (5.1) Par.?

vairūpe sāmann adhi tañ śakeyaṃ jagatyainaṃ vikṣv āveśayāmi // (5.2) Par.?

idaṃ kṣatraṃ duṣṭaram astv ojo 'nādhṛṣṭaṃ sahasyaṃ sahasvat / (6.1) Par.?

viśve devāḥ saptadaśena varca idaṃ kṣatraṃ salilavātam ugram // (6.2) Par.?

dhartrī diśāṃ kṣatram idaṃ dādhāropasthāśānāṃ mitravad astv ojaḥ / (7.1) Par.?

mitrāvaruṇā śaradāhnā cikittam asme rāṣṭrāya mahi śarma yacchatam // (7.2) Par.?

vairāje sāmann adhi me manīṣānuṣṭubhā saṃbhṛtaṃ vīryaṃ sahaḥ / (8.1) Par.?

idaṃ kṣatraṃ mitravad ārdradānu mitrāvaruṇā rakṣatam ādhipatyaiḥ // (8.2) Par.?

samrāḍ diśāṃ sahasāmnī sahasvaty ṛtur hemanto viṣṭhayā naḥ pipartu / (9.1) Par.?

avasyuvātā bṛhatī na śakvarī diśāṃ devy avatu no ghṛtācī // (9.2) Par.?

svarvatī sudughā naḥ payasvatīmaṃ yajñam avatu yā ghṛtācī / (10.1) Par.?

tvaṃ gopāḥ puraetota paścād bṛhaspate yāmyāṃ yuṅgdhi vācam // (10.2) Par.?

ūrdhvā diśāṃ rantir āśauṣadhīnāṃ saṃvatsareṇa savitā no ahnā / (11.1) Par.?

revat sāmāticchandā u chando 'jātaśatruḥ syonā no astu // (11.2) Par.?

stomas trayastriṃśe bhuvanasya patnī vivasvadvāte abhi no gṛṇīhi / (12.1) Par.?

ghṛtavatī savitur ādhipatye payasvatī rātir āśā no astu // (12.2) Par.?

anv adya no anumatir yajñaṃ deveṣu manyatām / (13.1) Par.?

agniś ca havyavāhano bhavataṃ dāśuṣe mayaḥ // (13.2) Par.?

anv id anumate tvaṃ manyāsai śaṃ ca nas kṛdhi / (14.1) Par.?

kratve dakṣāya no hinu pra nā āyūṃṣi tāriṣat // (14.2) Par.?

vaiśvānaro na ūtyā prayātu parāvataḥ / (15.1) Par.?

agnir ukthena vāhasā // (15.2) Par.?

pṛṣṭo divi / (16.1) Par.?

dhruvā diśāṃ viṣṇupatny aghorāsyeśānā sahaso yā manotā / (16.2) Par.?

bṛhaspatir mātariśvota vāyuḥ saṃdhvānā vātā abhi no gṛṇantu // (16.3) Par.?

viṣṭambho divo dharuṇā pṛthivyā asyeśānā jagato viṣṇupatnī / (17.1) Par.?

vyacasvatīṣayantī subhūtiḥ śivā no astv aditer upasthe // (17.2) Par.?

kayā naḥ / (18.1) Par.?

ko adya yuṅkte dhuri gā ṛtasya śimīvato bhāmino durhṛṇāyūn / (18.2) Par.?

āsanniṣūn hṛtsvaso mayobhūn ya eṣāṃ bhṛtyām ṛṇadhat sa jīvāt // (18.3) Par.?