Texts

agnihotraṃ juhoti // (1.1) Par.?

yad eva kiṃ ca yajamānasya svaṃ tasyaiva tat // (2.1) Par.?

retaḥ siñcati prajanane // (3.1) Par.?

prajananaṃ hi vā agniḥ // (4.1) Par.?

athauṣadhīr antagatā dahati // (5.1) Par.?

tās tato bhūyasīḥ prajāyante // (6.1) Par.?

yat sāyaṃ juhoti // (7.1) Par.?

reta eva tat siñcati // (8.1) Par.?

praiva prātastanena janayati tat // (9.1) Par.?

retaḥ siktaṃ na tvaṣṭrāvikṛtam prajāyate // (10.1) Par.?

yāvaccho vai retasaḥ siktasya tvaṣṭā rūpāṇi vikaroti tāvaccho vai tat prajāyate // (11.1) Par.?

eṣa vai daivyas tvaṣṭā yo yajate // (12.1) Par.?

bahvībhir upatiṣṭhate // (13.1) Par.?

retasa eva siktasya bahuśo rūpāṇi vikaroti // (14.1) Par.?

sa praiva jāyate // (15.1) Par.?

śvaḥśvo bhūyān bhavati ya evaṃ vidvān agnim upatiṣṭhate // (16.1) Par.?

ahar devānām āsīd rātrir asurāṇām // (17.1) Par.?

te 'surā yad devānāṃ vittaṃ vedyam āsīt tena saha rātrim prāviśan // (18.1) Par.?

te devā hīnā amanyanta // (19.1) Par.?

te 'paśyan // (20.1) Par.?

āgneyī rātrir āgneyāḥ paśava imam evāgniṃ stavāma sa na stutaḥ paśūn punar dāsyatīti // (21.1) Par.?

te 'gnim astuvan // (22.1) Par.?

sa ebhya stuto rātriyā adhy ahar abhi paśūn nirārjat // (23.1) Par.?

te devāḥ paśūn vittvā kāmān akurvata // (24.1) Par.?

ya evaṃ vidvān agnim upatiṣṭhate paśumān bhavati // (25.1) Par.?

ādityo vā asmāl lokād amuṃ lokam ait // (26.1) Par.?

so 'muṃ lokaṃ gatvā punar imaṃ lokam abhyadhyāyat // (27.1) Par.?

sa imaṃ lokam āgatya mṛtyor abibhet // (28.1) Par.?

mṛtyusaṃyuta iva hy ayaṃ lokaḥ // (29.1) Par.?

so 'manyata // (30.1) Par.?

imam evāgniṃ stavāni sa mā stutaḥ suvargaṃ lokaṃ gamayiṣyatīti // (31.1) Par.?

so 'gnim astaut // (32.1) Par.?

sa enaṃ stutaḥ suvargaṃ lokam agamayat // (33.1) Par.?

ya evaṃ vidvān agnim upatiṣṭhate suvargam eva lokam eti sarvam āyur eti // (34.1) Par.?

abhi vā eṣo 'gnī ā rohati ya enāv upatiṣṭhate // (35.1) Par.?

yathā khalu vai śreyān abhyārūḍhaḥ kāmayate tathā karoti // (36.1) Par.?

naktam upa tiṣṭhate na prātaḥ // (37.1) Par.?

saṃ hi naktaṃ vratāni sṛjyante // (38.1) Par.?

saha śreyāṃś ca pāpīyāṃś cāsāte // (39.1) Par.?

jyotir vā agniḥ // (40.1) Par.?

tamo rātriḥ // (41.1) Par.?

yan naktam upatiṣṭhate // (42.1) Par.?

jyotiṣaiva tamas tarati // (43.1) Par.?

upastheyo 'gnī3r iti āhuḥ // (44.1) Par.?

manuṣyāyen nvai yo 'harahar āhṛtyāthainaṃ yācati sa in nvai tam upārcchati // (45.1) Par.?

atha ko devān aharahar yāciṣyatīti // (46.1) Par.?

tasmān nopastheyaḥ // (47.1) Par.?

atho khalv āhuḥ āśiṣe vai kaṃ yajamāno yajata iti // (48.1) Par.?

eṣā khalu vā āhitāgner āśīr yad agnim upatiṣṭhate // (49.1) Par.?

tasmād upastheyaḥ // (50.1) Par.?

prajāpatiḥ paśūn asṛjata // (51.1) Par.?

te sṛṣṭā ahorātre prāviśan // (52.1) Par.?

tāñchandobhir anvavindat // (53.1) Par.?

yac chandobhir upatiṣṭhate svam eva tad anvicchati // (54.1) Par.?

na tatra jāmy astīty āhur yo 'harahar upatiṣṭhata iti // (55.1) Par.?

yo vā agnim pratyaṅṅ upatiṣṭhate praty enam oṣati // (56.1) Par.?

yaḥ parāṅ viṣvaṅ prajayā paśubhir eti // (57.1) Par.?

kavātiryaṅṅ ivopa tiṣṭheta // (58.1) Par.?

nainam pratyoṣati na viṣvaṅ prajayā paśubhir eti // (59.1) Par.?