Texts

indrasya vajro 'si vārtraghnas tanūpā naḥ pratispaśaḥ / (1.1) Par.?

yo naḥ purastād dakṣiṇataḥ paścād uttarato 'ghāyur abhidāsaty etaṃ so 'śmānam ṛcchatu / (1.2) Par.?

devāsurāḥ saṃyattā āsan / (1.3) Par.?

te 'surā digbhya ābādhanta / (1.4) Par.?

tān devā iṣvā ca vajreṇa cāpānudanta / (1.5) Par.?

yad vajriṇīr upadadhātīṣvā caiva tad vajreṇa ca yajamāno bhrātṛvyān apanudate / (1.6) Par.?

dikṣūpa // (1.7) Par.?

dadhāti / (2.1) Par.?

devapurā evaitās tanūpānīḥ paryūhate / (2.2) Par.?

agnāviṣṇū sajoṣasemā vardhantu vāṃ giraḥ / (2.3) Par.?

dyumnair vājebhir āgatam / (2.4) Par.?

brahmavādino vadanti / (2.5) Par.?

yan na devatāyai juhvaty atha kiṃdevatyā vasor dhāreti / (2.6) Par.?

agnir vasus tasyaiṣā dhārā / (2.7) Par.?

viṣṇur vasus tasyaiṣā dhārā / (2.8) Par.?

āgnāvaiṣṇavyarcā vasor dhārāṃ juhoti / (2.9) Par.?

bhāgadheyenaivainau samardhayati / (2.10) Par.?

atho etām // (2.11) Par.?

evāhutim āyatanavatīṃ karoti / (3.1) Par.?

yatkāma enāṃ juhoti tad evāvarunddhe / (3.2) Par.?

rudro vā eṣa yad agniḥ / (3.3) Par.?

tasyaite tanuvau ghorānyā śivānyā / (3.4) Par.?

yacchatarudrīyaṃ juhoti yaivāsya ghorā tanūs tāṃ tena śamayati / (3.5) Par.?

yad vasor dhārāṃ juhoti yaivāsya śivā tanūs tāṃ tena prīṇāti / (3.6) Par.?

yo vai vasor dhārāyai // (3.7) Par.?

pratiṣṭhāṃ veda praty eva tiṣṭhati / (4.1) Par.?

yad ājyam ucchiṣyeta tasmin brahmaudanam pacet / (4.2) Par.?

tam brāhmaṇāś catvāraḥ prāśnīyuḥ / (4.3) Par.?

eṣa vā agnir vaiśvānaro yad brāhmaṇaḥ / (4.4) Par.?

eṣā khalu vā agneḥ priyā tanūr yad vaiśvānaraḥ / (4.5) Par.?

priyāyām evaināṃ tanuvām pratiṣṭhāpayati / (4.6) Par.?

catasro dhenūr dadyāt / (4.7) Par.?

tābhir eva yajamāno 'muṣmiṃlloke 'gniṃ duhe // (4.8) Par.?