Texts

yo vai saptadaśam prajāpatiṃ yajñam anvāyattaṃ veda prati yajñena tiṣṭhati na yajñād bhraṃśate // (1) Par.?

āśrāvayeti caturakṣaram // (2) Par.?

astu śrauṣaḍ iti caturakṣaram // (3) Par.?

yajeti dvyakṣaram // (4) Par.?

ye yajāmaha iti pañcākṣaram // (5) Par.?

dvyakṣaro vaṣaṭkāraḥ // (6) Par.?

eṣa vai saptadaśaḥ prajāpatir yajñam anvāyattaḥ // (7) Par.?

ya evaṃ veda prati yajñena tiṣṭhati na yajñād bhraṃśate // (8) Par.?

yo vai yajñasya prāyaṇam pratiṣṭhām udayanaṃ veda pratiṣṭhitenāriṣṭena yajñena saṃsthāṃ gacchati // (9) Par.?

āśrāvayāstu śrauṣaḍ yaja ye yajāmahe vaṣaṭkāraḥ // (10) Par.?

etad vai yajñasya prāyaṇam // (11) Par.?

eṣā pratiṣṭhā // (12) Par.?

etad udayanam // (13) Par.?

ya evaṃ veda pratiṣṭhitenāriṣṭena yajñena saṃsthāṃ gacchati // (14) Par.?

yo vai sūnṛtāyai dohaṃ veda duha evainām // (15) Par.?

yajño vai sūnṛtā // (16) Par.?

āśrāvayety aivainām ahvat // (17) Par.?

astu śrauṣaḍ iti // (18) Par.?

yajety udanaiṣīt // (19) Par.?

ye yajāmaha ity upāsadat // (20) Par.?

vaṣaṭkāreṇa dogdhi // (21) Par.?

eṣa vai sūnṛtāyai dohaḥ // (22) Par.?

ya evaṃ veda duha evainām // (23) Par.?

devā vai sattram āsata // (24) Par.?

teṣāṃ diśo 'dasyan // (25) Par.?

ta etām ārdrām paṅktim apaśyan // (26) Par.?

āśrāvayeti purovātam ajanayan // (27) Par.?

astu śrauṣaḍ ity abhraṃ samaplāvayan // (28) Par.?

yajeti vidyutam ajanayan // (29) Par.?

ye yajāmaha iti prāvarṣayan // (30) Par.?

abhyastanayan vaṣaṭkāreṇa // (31) Par.?

tato vai tebhyo diśaḥ prāpyāyanta // (32) Par.?

ya evaṃ veda prāsmai diśaḥ pyāyante // (33) Par.?

prajāpatiṃ tvo veda prajāpatis tvaṃ veda // (34) Par.?

yam prajāpatir veda sa puṇyo bhavati // (35) Par.?

eṣa vai chandasyaḥ prajāpatir āśrāvayāstu śrauṣaḍ yaja ye yajāmahe vaṣaṭkāraḥ // (36) Par.?

ya evaṃ veda puṇyo bhavati // (37) Par.?

vasantam ṛtūnām prīṇāmīty āha // (38) Par.?

ṛtavo vai prayājāḥ // (39) Par.?

ṛtūn eva prīṇāti // (40) Par.?

te 'smai prītā yathāpūrvaṃ kalpante // (41) Par.?

kalpante 'smā ṛtavo ya evaṃ veda // (42) Par.?

agnīṣomayor ahaṃ devayajyayā cakṣuṣmān bhūyāsam ity āha // (43) Par.?

agnīṣomābhyāṃ vai yajñaś cakṣuṣmān // (44) Par.?

tābhyām eva cakṣur ātman dhatte // (45) Par.?

agner ahaṃ devayajyayānnādo bhūyāsam ity āha // (46) Par.?

agnir vai devānām annādaḥ // (47) Par.?

tenaivānnādyam ātman dhatte // (48) Par.?

dabdhir asi // (49) Par.?

adabdho bhūyāsam amuṃ dabheyam ity āha // (50) Par.?

etayā vai dabdhyā devā asurān adabhnuvan // (51) Par.?

tayaiva bhrātṛvyaṃ dabhnoti // (52) Par.?

agnīṣomayor ahaṃ devayajyayā vṛtrahā bhūyāsam ity āha // (53) Par.?

agnīṣomābhyāṃ vā indro vṛtram ahan // (54) Par.?

tābhyām eva bhrātṛvyaṃ stṛṇute // (55) Par.?

indrāgniyor ahaṃ devayajyayendriyāvy annādo bhūyāsam ity āha // (56) Par.?

indriyāvy evānnādo bhavati // (57) Par.?

indrasyāhaṃ devayajyayendriyāvī bhūyāsam ity āha // (58) Par.?

indriyāvy eva bhavati // (59) Par.?

mahendrasyāhaṃ devayajyayā jemānam mahimānaṃ gameyam ity āha // (60) Par.?

jemānam eva mahimānaṃ gacchati // (61) Par.?

agneḥ sviṣṭakṛto 'haṃ devayajyayāyuṣmān yajñena pratiṣṭhāṃ gameyam ity āha // (62) Par.?

āyur evātman dhatte // (63) Par.?

prati yajñena tiṣṭhati // (64) Par.?