Texts

edam aganma devayajanaṃ pṛthivyā yatra devāso ajuṣanta viśve / (1.1) Par.?

ṛksāmābhyāṃ saṃtaranto yajurbhī rāyaspoṣeṇa sam iṣā madema / (1.2) Par.?

imā āpaḥ śam u me santu devīḥ / (1.3) Par.?

oṣadhe trāyasva / (1.4) Par.?

svadhite mainaṃ hiṃsīḥ // (1.5) Par.?

āpo asmān mātaraḥ śundhayantu ghṛtena no ghṛtapvaḥ punantu / (2.1) Par.?

viśvaṃ hi ripraṃ pravahanti devīḥ / (2.2) Par.?

ud idābhyaḥ śucir āpūta emi / (2.3) Par.?

dīkṣātapasos tanūr asi tāṃ tvā śivāṃ śagmāṃ paridadhe bhadraṃ varṇaṃ puṣyan // (2.4) Par.?

mahīnāṃ payo 'si varcodā asi varco me dehi / (3.1) Par.?

vṛtrasyāsi kanīnakaś cakṣurdā asi cakṣur me dehi // (3.2) Par.?

citpatir mā punātu / (4.1) Par.?

vākpatir mā punātu / (4.2) Par.?

devo mā savitā punātv acchidreṇa pavitreṇa sūryasya raśmibhiḥ / (4.3) Par.?

tasya te pavitrapate pavitrapūtasya yatkāmaḥ pune tac chakeyam // (4.4) Par.?

ā vo devāsa īmahe vāmaṃ prayaty adhvare / (5.1) Par.?

ā vo devāsa āśiṣo yajñiyāso havāmahe // (5.2) Par.?

svāhā yajñaṃ manasaḥ / (6.1) Par.?

svāhoror antarikṣāt / (6.2) Par.?

svāhā dyāvāpṛthivībhyām / (6.3) Par.?

svāhā vātād ārabhe svāhā // (6.4) Par.?

ākūtyai prayuje 'gnaye svāhā / (7.1) Par.?

medhāyai manase 'gnaye svāhā / (7.2) Par.?

dīkṣāyai tapase 'gnaye svāhā / (7.3) Par.?

sarasvatyai pūṣṇe 'gnaye svāhā / (7.4) Par.?

āpo devīr bṛhatīr viśvaśambhuvo dyāvāpṛthivī uro antarikṣa / (7.5) Par.?

bṛhaspataye haviṣā vidhema svāhā // (7.6) Par.?

viśvo devasya netur marto vurīta sakhyam / (8.1) Par.?

viśvo rāya iṣudhyati dyumnaṃ vṛṇīta puṣyase svāhā // (8.2) Par.?

ṛksāmayoḥ śilpe sthas te vām ārabhe te mā pātamāsya yajñasyodṛcaḥ / (9.1) Par.?

śarmāsi śarma me yaccha namas te astu mā mā hiṃsīḥ // (9.2) Par.?

ūrg asy āṅgirasy ūrṇamradā ūrjaṃ mayi dhehi / (10.1) Par.?

somasya nīvir asi / (10.2) Par.?

viṣṇoḥ śarmāsi śarma yajamānasya / (10.3) Par.?

indrasya yonir asi / (10.4) Par.?

susasyāḥ kṛṣīs kṛdhi / (10.5) Par.?

ucchrayasva vanaspata ūrdhvo mā pāhy aṃhasa āsya yajñasyodṛcaḥ // (10.6) Par.?

vrataṃ kṛṇutāgnir brahmāgnir yajño vanaspatir yajñiyaḥ / (11.1) Par.?

daivīṃ dhiyaṃ manāmahe sumṛḍīkām abhiṣṭaye varcodhāṃ yajñavāhasaṃ sutīrthā no asad vaśe / (11.2) Par.?

ye devā manojātā manoyujo dakṣakratavas te no 'vantu te naḥ pāntu tebhyaḥ svāhā // (11.3) Par.?

śvātrāḥ pītā bhavata yūyam āpo asmākam antar udare suśevāḥ / (12.1) Par.?

tā asmabhyam ayakṣmā anamīvā anāgasaḥ svadantu devīr amṛtā ṛtāvṛdhaḥ // (12.2) Par.?

iyaṃ te yajñiyā tanūḥ / (13.1) Par.?

apo muñcāmi na prajām / (13.2) Par.?

aṃhomucaḥ svāhākṛtāḥ pṛthivīm āviśata / (13.3) Par.?

pṛthivyā saṃbhava // (13.4) Par.?

agne tvaṃ su jāgṛhi vayaṃ su mandiṣīmahi / (14.1) Par.?

rakṣā ṇo aprayucchan prabudhe naḥ punas kṛdhi // (14.2) Par.?

punar manaḥ punar āyur ma āgan punaḥ prāṇaḥ punar ātmā ma āgan punaś cakṣuḥ punaḥ śrotraṃ ma āgan / (15.1) Par.?

vaiśvānaro adabdhas tanūpā agnir naḥ pātu duritād avadyāt // (15.2) Par.?

tvam agne vratapā asi deva ā martyeṣv ā tvaṃ yajñeṣv īḍyaḥ / (16.1) Par.?

rāsveyatsomā bhūyo bhara devo naḥ savitā vasor dātā vasv adāt // (16.2) Par.?

eṣā te śukra tanūr etad varcas tayā saṃbhava bhrājaṃ gaccha / (17.1) Par.?

jūr asi dhṛtā manasā juṣṭā viṣṇave // (17.2) Par.?

tasyās te satyasavasaḥ prasave tanvo yantram aśīya svāhā / (18.1) Par.?

śukram asi candram asy amṛtam asi vaiśvadevam asi // (18.2) Par.?

cid asi manāsi dhīr asi dakṣiṇāsi kṣatriyāsi yajñiyāsy aditir asy ubhayataḥśīrṣṇī / (19.1) Par.?

sā naḥ suprācī supratīcy edhi mitras tvā padi badhnītāṃ pūṣādhvanas pātv indrāyādhyakṣāya // (19.2) Par.?

anu tvā mātā manyatām anu pitānu bhrātā sagarbhyo 'nu sakhā sayūthyaḥ / (20.1) Par.?

sā devi devam acchehīndrāya somaṃ rudras tvā vartayatu svasti somasakhā punar ehi // (20.2) Par.?

vasvy asy aditir asyādityāsi rudrāsi candrāsi / (21.1) Par.?

bṛhaspatiṣ ṭvā sumne ramṇātu rudro vasubhir ācake // (21.2) Par.?

adityās tvā mūrdhann ājigharmi devayajane pṛthivyā iḍāyās padam asi ghṛtavat svāhā / (22.1) Par.?

asme ramasva / (22.2) Par.?

asme te bandhuḥ / (22.3) Par.?

tve rāyaḥ / (22.4) Par.?

me rāyaḥ / (22.5) Par.?

mā vayaṃ rāyaspoṣeṇa viyauṣma / (22.6) Par.?

toto rāyaḥ // (22.7) Par.?

samakhye devyā dhiyā saṃ dakṣiṇayorucakṣasā / (23.1) Par.?

mā ma āyuḥ pramoṣīr mo ahaṃ tava / (23.2) Par.?

vīraṃ videya tava devi saṃdṛśi // (23.3) Par.?

eṣa te gāyatro bhāga iti me somāya brūtād eṣa te traiṣṭubho bhāga iti me somāya brūtād eṣa te jāgato bhāga iti me somāya brūtāc chandonāmānāṃ sāmrājyaṃ gaccheti me somāya brūtāt / (24.1) Par.?

āsmāko 'si śukras te grahyo vicitas tvā vicinvantu // (24.2) Par.?

abhi tyaṃ devaṃ savitāram oṇyoḥ kavikratum arcāmi satyasavaṃ ratnadhām abhi priyaṃ matiṃ kavim / (25.1) Par.?

ūrdhvā yasyāmatir bhā adidyutat savīmani hiraṇyapāṇir amimīta sukratuḥ kṛpā svaḥ / (25.2) Par.?

prajābhyas tvā / (25.3) Par.?

prajās tvānuprāṇantu prajās tvam anuprāṇihi // (25.4) Par.?

śukraṃ tvā śukreṇa krīṇāmi candraṃ candreṇāmṛtam amṛtena / (26.1) Par.?

sagme te goḥ / (26.2) Par.?

asme te candrāṇi / (26.3) Par.?

tapasas tanūr asi prajāpater varṇaḥ parameṇa paśunā krīyase sahasrapoṣaṃ puṣeyam // (26.4) Par.?

mitro na ehi sumitradhaḥ / (27.1) Par.?

indrasyorum āviśa dakṣiṇam uśann uśantaṃ syonaḥ syonam / (27.2) Par.?

svāna bhrājāṅghāre bambhāre hasta suhasta kṛśāno / (27.3) Par.?

ete vaḥ somakrayaṇās tān rakṣadhvaṃ mā vo dabhan // (27.4) Par.?

pari māgne duścaritād bādhasvā mā sucarite bhaja / (28.1) Par.?

ud āyuṣā svāyuṣodasthām amṛtāṁ anu // (28.2) Par.?

prati panthām apadmahi svastigām anehasam / (29.1) Par.?

yena viśvāḥ pari dviṣo vṛṇakti vindate vasu // (29.2) Par.?

adityās tvag asi / (30.1) Par.?

adityai sada āsīda / (30.2) Par.?

astabhnād dyāṃ vṛṣabho antarikṣam amimīta varimāṇaṃ pṛthivyāḥ / (30.3) Par.?

āsīdad viśvā bhuvanāni samrāḍ viśvet tāni varuṇasya vratāni // (30.4) Par.?

vaneṣu vy antarikṣaṃ tatāna vājam arvatsu paya usriyāsu / (31.1) Par.?

hṛtsu kratuṃ varuṇo vikṣv agniṃ divi sūryam adadhāt somam adrau // (31.2) Par.?

sūryasya cakṣur ārohāgner akṣṇaḥ kanīnakam / (32.1) Par.?

yatraitaśebhir īyase bhrājamāno vipaścitā // (32.2) Par.?

usrāv etaṃ dhūrṣāhau yujyethām anaśrū avīrahaṇau brahmacodanau / (33.1) Par.?

svasti yajamānasya gṛhān gacchatam // (33.2) Par.?

bhadro me 'si pracyavasva bhuvas pate viśvāny abhi dhāmāni / (34.1) Par.?

mā tvā paripariṇo vidan mā tvā paripanthino vidan mā vṛkā aghāyavo vidan / (34.2) Par.?

śyeno bhūtvā parāpata yajamānasya gṛhān gaccha tan nau saṃskṛtam // (34.3) Par.?

namo mitrasya varuṇasya cakṣase maho devāya tad ṛtaṃ saparyata / (35.1) Par.?

dūredṛśe devajātāya ketave divas putrāya sūryāya śaṃsata // (35.2) Par.?

varuṇasyottambhanam asi / (36.1) Par.?

varuṇasya skambhasarjanī sthaḥ / (36.2) Par.?

varuṇasya ṛtasadany asi / (36.3) Par.?

varuṇasya ṛtasadanam asi / (36.4) Par.?

varuṇasya ṛtasadanam āsīda // (36.5) Par.?

yā te dhāmāni haviṣā yajanti tā te viśvā paribhūr astu yajñam / (37.1) Par.?

gayasphānaḥ prataraṇaḥ suvīro 'vīrahā pracarā soma duryān // (37.2) Par.?