Texts

atha khalu bhaiṣajyarājo bodhisattvo mahāsattvo mahāpratibhānaśca bodhisattvo mahāsattvo viṃśatibodhisattvaśatasahasraparivāro bhagavataḥ saṃmukhamimāṃ vācamabhāṣetām / (1.1) Par.?

alpotsuko bhagavān bhavatvasminnarthe // (1.2) Par.?

vayamimaṃ bhagavan dharmaparyāyaṃ tathāgatasya parinirvṛtasya sattvānāṃ deśayiṣyāmaḥ saṃprakāśayiṣyāmaḥ // (2.1) Par.?

kiṃcāpi bhagavan śaṭhakāḥ sattvāstasmin kāle bhaviṣyanti parīttakuśalamūlā adhimānikā lābhasatkārasaṃniśritā akuśalamūlapratipannā durdamā adhimuktivirahitā anadhimuktibahulā api tu khalu punarvayaṃ bhagavan kṣāntibalamupadarśayitvā tasmin kāle idaṃ sūtramuddekṣyāmo dhārayiṣyāmo deśayiṣyāmo likhiṣyāmaḥ satkariṣyāmo gurukariṣyāmo mānayiṣyāmaḥ pūjayiṣyāmaḥ // (3.1) Par.?

kāyajīvitaṃ ca vayaṃ bhagavan utsṛjya idaṃ sūtraṃ prakāśayiṣyāmaḥ // (4.1) Par.?

alpotsuko bhagavān bhavatviti // (5.1) Par.?

atha khalu tasyāṃ parṣadi śaikṣāśaikṣāṇāṃ bhikṣūṇāṃ pañcamātrāṇi bhikṣuśatāni bhagavantametadūcuḥ / (6.1) Par.?

vayamapi bhagavan utsahāmahe imaṃ dharmaparyāyaṃ saṃprakāśayitum api tu khalu punarbhagavan anyāsu lokadhātuṣviti // (6.2) Par.?

atha khalu yāvantaste bhagavataḥ śrāvakāḥ śaikṣāśaikṣā bhagavatā vyākṛtā anuttarāyāṃ samyaksaṃbodhāvaṣṭau bhikṣusahasrāṇi sarvāṇi tāni yena bhagavāṃstenāñjaliṃ praṇamayya bhagavantametadūcuḥ / (7.1) Par.?

alpotsuko bhagavān bhavatu // (7.2) Par.?

vayamapīmaṃ dharmaparyāyaṃ saṃprakāśayiṣyāmastathāgatasya parinirvṛtasya paścime kāle paścime samaye api tvanyāsu lokadhātuṣu // (8.1) Par.?

tatkasya hetoḥ / (9.1) Par.?

asyāṃ bhagavan sahāyāṃ lokadhātau adhimānikāḥ sattvā alpakuśalamūlā nityaṃ vyāpannacittāḥ śaṭhā vaṅkajātīyāḥ // (9.2) Par.?

atha khalu mahāprajāpatī gautamī bhagavato mātṛbhaginī ṣaḍbhir bhikṣuṇīsahasraiḥ sārdhaṃ śaikṣāśaikṣābhir bhikṣuṇībhiḥ utthāyāsanād yena bhagavāṃs tenāñjaliṃ praṇamayya bhagavantamullokayantī sthitābhūt // (10.1) Par.?

atha khalu bhagavāṃstasyāṃ velāyāṃ mahāprajāpatīṃ gautamīmāmantrayāmāsa / (11.1) Par.?

kiṃ tvaṃ gautami durmanasvinī sthitā tathāgataṃ vyavalokayasi / (11.2) Par.?

nāhaṃ parikīrtitā vyākṛtā ca anuttarāyāṃ samyaksaṃbodhau // (11.3) Par.?

api tu khalu punargautami sarvaparṣadvyākaraṇena vyākṛtāsi // (12.1) Par.?

api tu khalu punastvaṃ gautami ita upādāya aṣṭātriṃśatāṃ buddhakoṭīniyutaśatasahasrāṇāmantike satkāraṃ gurukāraṃ mānanāṃ pūjanām arcanām apacāyanāṃ kṛtvā bodhisattvo mahāsattvo dharmabhāṇako bhaviṣyasi // (13.1) Par.?

imānyapi ṣaḍ bhikṣuṇīsahasrāṇi śaikṣāśaikṣāṇāṃ bhikṣuṇīnāṃ tvayaiva sārdhaṃ teṣāṃ tathāgatānāmarhatāṃ samyaksaṃbuddhānāmantike bodhisattvā dharmabhāṇakā bhaviṣyanti // (14.1) Par.?

tataḥ pareṇa paratareṇa bodhisattvacaryāṃ paripūrya sarvasattvapriyadarśano nāma tathāgato 'rhan samyaksaṃbuddho loke bhaviṣyasi vidyācaraṇasampannaḥ sugato lokavidanuttaraḥ puruṣadamyasārathiḥ śāstā devānāṃ ca manuṣyāṇāṃ ca buddho bhagavān // (15.1) Par.?

sa ca gautami sarvasattvapriyadarśanastathāgato 'rhan samyaksaṃbuddhastāni ṣaḍ bodhisattvasahasrāṇi paraṃparāvyākaraṇena vyākariṣyatyanuttarāyāṃ samyaksaṃbodhau // (16.1) Par.?

atha khalu rāhulamāturyaśodharāyā bhikṣuṇyā etadabhavat / (17.1) Par.?

na me bhagavatā nāmadheyaṃ parikīrtitam // (17.2) Par.?

atha khalu bhagavān yaśodharāyā bhikṣuṇyāścetasaiva cetaḥparivitarkamājñāya yaśodharāṃ bhikṣuṇīmetadavocat / (18.1) Par.?

ārocayāmi te yaśodhare prativedayāmi te // (18.2) Par.?

tvamapi daśānāṃ buddhakoṭīsahasrāṇāmantike satkāraṃ gurukāraṃ mānanāṃ pūjanām arcanāmapacāyanāṃ kṛtvā bodhisattvo dharmabhāṇako bhaviṣyasi // (19.1) Par.?

bodhisattvacaryāṃ ca anupūrveṇa paripūrya raśmiśatasahasraparipūrṇadhvajo nāma tathāgato 'rhan samyaksaṃbuddho loke bhaviṣyasi vidhācaraṇasampannaḥ sugato lokavid anuttaraḥ puruṣadamyasārathiḥ śāstā devānāṃ ca manuṣyāṇāṃ ca buddho bhagavān bhadrāyāṃ lokadhātau // (20.1) Par.?

aparimitaṃ ca tasya bhagavato raśmiśatasahasraparipūrṇadhvajasya tathāgatasyārhataḥ samyaksaṃbuddhasyāyuṣpramāṇaṃ bhaviṣyati // (21.1) Par.?

atha khalu mahāprajāpatī gautamī bhikṣuṇī ṣaḍbhikṣuṇīsahasraparivārā yaśodharā ca bhikṣuṇī caturbhikṣuṇīsahasraparivārā bhagavato 'ntikāt svakaṃ vyākaraṇaṃ śrutvā anuttarāyāṃ samyaksaṃbodhau āścaryaprāptā adbhutaprāptāśca tasyāṃ velāyāmimāṃ gāthāmabhāṣanta // (22.1) Par.?

bhagavan vinetāsi vināyako 'si śāstāsi lokasya sadevakasya / (23.1) Par.?

āśvāsadātā naradevapūjito vayaṃ pi saṃtoṣita adya nātha // (23.2) Par.?

atha khalu tā bhikṣuṇyaḥ imāṃ gāthāṃ bhāṣitvā bhagavantametadūcuḥ / (24.1) Par.?

vayamapi bhagavan samutsahāmahe imaṃ dharmaparyāyaṃ saṃprakāśayituṃ paścime kāle paścime samaye 'pi tvanyāsu lokadhātuṣviti // (24.2) Par.?

atha khalu bhagavān yena tāny aśītibodhisattvakoṭīnayutaśatasahasrāṇi dhāraṇīpratilabdhānāṃ bodhisattvānām avaivartikadharmacakrapravartakānāṃ tenāvalokayāmāsa // (25.1) Par.?

atha khalu te bodhisattvā mahāsattvāḥ samanantarāvalokitā bhagavatā utthāyāsanebhyo yena bhagavāṃs tenāñjaliṃ praṇāmyaivaṃ cintayāmāsuḥ / (26.1) Par.?

asmākaṃ bhagavān adhyeṣati asya dharmaparyāyasya saṃprakāśanatāyai // (26.2) Par.?

te khalvevam anuvicintya samprakampitāḥ parasparamūcuḥ / (27.1) Par.?

kathaṃ vayaṃ kulaputrāḥ kariṣyāmo yad bhagavānadhyeṣati asya dharmaparyāyasyānāgate 'dhvani saṃprakāśanatāyai / (27.2) Par.?

atha khalu te kulaputrā bhagavato gauraveṇa ātmanaśca pūrvacaryāpraṇidhānena bhagavato 'bhimukhaṃ siṃhanādaṃ nadante sma / (27.3) Par.?

vayaṃ bhagavan anāgate 'dhvani imaṃ dharmaparyāyaṃ tathāgate parinirvṛte daśasu dikṣu gatvā sarvasattvāṃllekhayiṣyāmaḥ pāṭhayiṣyāmaś cintāpayiṣyāmaḥ prakāśayiṣyāmo bhagavata evānubhāvena // (27.4) Par.?

bhagavāṃśca asmākamanyalokadhātusthito rakṣāvaraṇaguptiṃ kariṣyati // (28.1) Par.?

atha khalu te bodhisattvā mahāsattvāḥ samasaṃgītyā bhagavantamābhirgāthābhiradhyabhāṣanta // (29.1) Par.?

alpotsukastvaṃ bhagavan bhavasva vayaṃ tadā te parinirvṛtasya / (30.1) Par.?

svaṃ paścime kāli subhairavasmin prakāśayiṣyāmida sūtramuttamam // (30.2) Par.?

ākrośāṃstarjanāṃścaiva daṇḍodgūraṇāni ca / (31.1) Par.?

bālānāṃ saṃsahiṣyāmo 'dhivāsiṣyāma nāyaka // (31.2) Par.?

durbuddhinaśca vaṅkāśca śaṭhā bālādhimāninaḥ / (32.1) Par.?

aprāpte prāptasaṃjñī ca ghore kālasmi paścime // (32.2) Par.?

araṇyavṛttakāścaiva kanthāṃ prāvariyāṇa ca / (33.1) Par.?

saṃlekhavṛtticāri sma evaṃ vakṣyanti durmatī // (33.2) Par.?

raseṣu gṛddha saktāśca gṛhīṇāṃ dharma deśayī / (34.1) Par.?

satkṛtāśca bhaviṣyanti ṣaḍabhijñā yathā tathā // (34.2) Par.?

raudracittāśca duṣṭāśca gṛhavittavicintakāḥ / (35.1) Par.?

araṇyaguptiṃ praviśitvā asmākaṃ parivādakāḥ // (35.2) Par.?

asmākaṃ caiva vakṣyanti lābhasatkāraniśritāḥ / (36.1) Par.?

tīrthikā batime bhikṣū svāni kāvyāni deśayuḥ // (36.2) Par.?

svayaṃ sūtrāṇi granthitvā lābhasatkārahetavaḥ / (37.1) Par.?

parṣāya madhye bhāṣante asmākamanukuṭṭakāḥ // (37.2) Par.?

rājeṣu rājaputreṣu rājāmātyeṣu vā tathā / (38.1) Par.?

viprāṇāṃ gṛhapatīnāṃ ca anyeṣāṃ cāpi bhikṣuṇām // (38.2) Par.?

vakṣyantyavarṇamasmākaṃ tīrthyavādaṃ ca kārayī / (39.1) Par.?

sarvaṃ vayaṃ kṣamiṣyāmo gauraveṇa maharṣiṇām // (39.2) Par.?

ye cāsmān kutsayiṣyanti tasmin kālasmi durmatī / (40.1) Par.?

ime buddhā bhaviṣyanti kṣamiṣyāmatha sarvaśaḥ // (40.2) Par.?

kalpasaṃkṣobhamīṣmasmin dāruṇasmi mahābhaye / (41.1) Par.?

yakṣarūpā bahu bhikṣū asmākaṃ paribhāṣakāḥ // (41.2) Par.?

gauraveṇeha lokendre utsahāma suduṣkaram / (42.1) Par.?

kṣāntīya kakṣyāṃ bandhitvā sūtrametaṃ prakāśaye // (42.2) Par.?

anarthikāḥ sma kāyena jīvitena ca nāyaka / (43.1) Par.?

arthikāśca sma bodhīya tava nikṣepadhārakāḥ // (43.2) Par.?

bhagavāneva jānīte yādṛśāḥ pāpabhikṣavaḥ / (44.1) Par.?

paścime kāli bheṣyanti saṃdhābhāṣyamajānakāḥ // (44.2) Par.?

bhṛkuṭī sarva soḍhavyā aprajñaptiḥ punaḥ punaḥ / (45.1) Par.?

niṣkāsanaṃ vihārebhyo bandhakuṭṭī bahūvidhā // (45.2) Par.?

ājñaptiṃ lokanāthasya smarantā kāli paścime / (46.1) Par.?

bhāṣiṣyāma idaṃ sūtraṃ parṣanmadhye viśāradāḥ // (46.2) Par.?

nagareṣvatha grāmeṣu ye bheṣyanti ihārthikāḥ / (47.1) Par.?

gatvā gatvāsya dāsyāmo nikṣepaṃ tava nāyaka // (47.2) Par.?

preṣaṇaṃ tava lokendra kariṣyāmo mahāmune / (48.1) Par.?

alpotsuko bhava tvaṃ hi śāntiprāpto sunirvṛtaḥ // (48.2) Par.?

sarve ca lokapradyotā āgatā ye diśo daśa / (49.1) Par.?

satyāṃ vācaṃ prabhāṣāmo adhimuktiṃ vijānasi // (49.2) Par.?