Texts

Help

Select a text:
Bibliography
Select a chapter:
 (no revisions)
Associated topic(s): agnicayana

Show parallels  Show headlines
Use dependency labeler
Chapter id: 16042
  • Click on a sentence to show its analysis
  • Keep the mouse pointer over a lemma to show its meanings.
aditis tvā devī viśvadevyāvatītīyaṃ vā aditiḥ // (1) Par.?
adityaivādityāṃ khanaty asyā akrūraṃkārāya // (2) Par.?
na hi svas svaṃ hinasti // (3) Par.?
devānāṃ tvā patnīr iti devānāṃ vā etāṃ patnīr agre 'trādadhuḥ // (4) Par.?
tābhir evaināṃ dadhāti // (5) Par.?
dhiṣaṇās tveti vidyā vai dhiṣaṇā // (6) Par.?
vidyayaivainām abhīnddhe // (7) Par.?
varutrīs tveti hotrā vai varutrīḥ // (8) Par.?
hotrābhir evaināṃ śrapayati // (9) Par.?
gnās tveti cchandāṃsi vai gnāḥ // (10) Par.?
chandobhir evaināṃ pacati // (11) Par.?
janayas tvācchinnapatrā iti devānāṃ vai patnīr janayas tā etām agre 'pacan // (12) Par.?
tābhir evaināṃ pacati // (13) Par.?
dviṣ pacantv ity āha // (14) Par.?
tasmād dvis saṃvatsarasya sasyaṃ pacyate // (15) Par.?
ṣaḍbhiḥ pacati // (16) Par.?
ṣaḍ vā ṛtavaḥ // (17) Par.?
ṛtubhir etāṃ devānāṃ patnīr apacan // (18) Par.?
tair evaināṃ pacati // (19) Par.?
varuṇamenir vā eṣābhīddhā // (20) Par.?
mitrasya carṣaṇīdhṛta iti mitreṇaiva varuṇamenim upaiti // (21) Par.?
devas tvā savitodvapatv iti sāvitryodvapati prasūtyai // (22) Par.?
avyathamānā pṛthivyām āśā diśa āpṛṇeti tasmād agnis sarvā diśo vibhāti // (23) Par.?
uttiṣṭha bṛhatī bhavordhvā tiṣṭha dhruvā tvam iti dṛṃhaty evainam // (24) Par.?
yad vā eṣā bhidyetārtiṃ yajamāna ārcheddhanyetāsya yajñaḥ // (25) Par.?
mitraitāṃ ta ukhāṃ paridadāmīti brahma vai mitraḥ // (26) Par.?
brahmaṇa evaināṃ paridadāti // (27) Par.?
yadi bhidyeta taiḥ kapālais saṃsṛjyānyāṃ kuryāt // (28) Par.?
saiva tato yajñasya niṣkṛtiḥ // (29) Par.?
vasavas tvāchṛndantu gāyatreṇa cchandaseti cchandobhir vā eṣā kriyate // (30) Par.?
chandobhir dhūpyate // (31) Par.?
chandobhiḥ pacyate // (32) Par.?
chandāṃsy eva cchandobhir ācchṛndanti svenāyatanena // (33) Par.?
asuryaṃ vai pātram anāchṛṇṇam // (34) Par.?
yad ācchṛṇatti devatraiva karoti // (35) Par.?
ajakṣīreṇācchṛṇatti // (36) Par.?
sā hy āgneyītamā samṛddhyai // (37) Par.?
atho parameṇaiva payasā // (38) Par.?
Duration=0.057742834091187 secs.