Occurrences of anuvāda in "Lāṭyāyanaśrautasūtrabhāṣya"
Click [+] to expand the context.
10.4.4.[1]ya ete pañcāhāstrayastriṃśadrātre coditāḥ te anādeśe prakṛtipratyayādityetadādibhirhetubhiḥ pṛṣṭhyastomapañcāhāniti pakṣaḥ pratigṛhyate tān pratyekamunmīlayiṣyāmaḥ tān pañcāhāneka ācāryyāḥ pṛṣṭhyastomapañcāhān manyante kiṃ kāraṇam anādeśe prakṛtipratyayāt yatra hyādeśo nāsti tatra prakṛteḥ pratyayo bhavati iha sarve vilopāddaśarātrādbhavanti ucyate yadyevaṃ pṛṣṭhyastomapañcāhānityevaṃ na vaktavyaṃ na hi pṛṣṭhyaḥ stomaḥ prakṛtiḥ ucyate pṛṣṭhyapañcāhā evāsya vivakṣitāḥ bṛhadrathantarapṛṣṭhyatāmabhipretya samūḍhañca pṛṣṭhyastomena pradeśaṃ karoti yadi tu pṛṣṭhyena pradeśaṃ kuryyāt pṛṣṭhyāni prasajyeran vyūḍhasamūḍhatāyāñca vikalpaḥ syāt evaṃ mābhūdityataḥ pṛṣṭhyastomena pradiśati pṛṣṭhya eva tvasya prakṛtitvenābhipretaḥ viśvajidanvavāyāt iha ca manyāmahe pṛṣṭhyastomapañcāhā iti yenaiva viśvajidanvavaiti ya ete pṛṣṭhyavilopā etān sarvān viśvajidanvavaiti tathā tṛtīye ṣaḍrātre abhyāsaṅgyaḥ pañcāho viśvajidatirātraḥ tathā dvitīye navarātre jyotiṣṭomo'gniṣṭomo gaurukthya āyurukthyo'bhyāsaṅgyaḥ pañcāho viśvajidatirātra iti daśarātre'bhyāsaṅgyaḥ pañcāhāśvān vā yaśchandomā viśvajidatirātra iti eteṣāṃ pṛṣṭhyavilopaṃ kṛtvā viśvajidanvavāyo bhavati pṛṣṭhyānugrahārthaṃ nānā brahmasāmatvācca manyāmahe pṛṣṭhyastomapañcāhā iti na hi nānā brahmasāma abhiplavaḥ śyaitanaudhasabrahmasāmatvāt tena pradeśaḥ nānā brahmasāmānyupayantīti nityānuvādo'yaṃ yadi hyapūrvo bhavet vidhirevābhaviṣyat vidhāyakena vākyena vyavāyaḥ syāt nānā brahmasāmānyupeyuriti ṣaṣṭhasyālopavacanāt itaśca manyāmahe pṛṣṭhyastomapañcāhā iti yasmāt pṛṣṭhyaṃ prati ṣaṣṭhasyālopavacanaṃ lupyate vā etat ṣaṣṭhamaharyatpañcāhānupayanti narttavaḥ kalpante yatpṛṣṭhyaḥ ṣaḍahastena ṣaṣṭhamaharna lupyate narttavaḥ kalpanta iti tadyadi pārṣṭikaṃ ṣaṣṭamaharna luptaṃ tataḥ pṛṣṭhyasya ṣaḍahasya kriyāyāmalopavacanaṃ nopapadyate atha punarābhiplavikaṃ ṣaṣṭhamaharna luptaṃ tasya pārṣṭikena ṣaṣṭhenāhnā alopavacanaṃ nopapadyate jyotirgaurāyurityanādeśāt yadyasyābhiplavikaḥ pañcāha iṣṭo bhavati tatropadiśyate vātirātrojyotigaurāyugaurāyuḥ pañcāha iti iha punastasyānādeśāt manyāmahe pṛṣṭhyastomapañcāhā iti trivṛtā prayanti trivṛtodyantoti cāha evaṃ brāhmaṇamāha trivṛtā prayanti trivṛtodyantīti tasya trivṛtstomaṃ prathamamahaḥ āvṛttasya tadevohanīyaṃ bhavati evametairhetubhirmanyāmahe pṛṣṭhyastomapañcāhā iti
10.4.5.[1]samāstvete hetavaḥ ya ete pṛṣṭhyastomapañcāhatve hetava uktāstān samīkariṣyāmaḥ tuśabdaḥ pūrvapakṣanivṛtyarthaḥ yaduktaṃ pṛṣṭhyastomapañcāhā iti tanna ya evaite hetava uktā ubhayatraite samāḥ pṛṣṭhyastomapañcāheṣvabhiplavapañcāheṣu ca yattāvaduktam anādeśe prakṛtipratyayādityatra brūmaḥ naiva pṛṣṭhyaḥ stomaḥ prakṛtiḥ yaduktaṃ tvayā pṛṣṭhyamabhipretya pṛṣṭhyastomena pradiśatyetannopapadyate kathaṃ hi pṛṣṭhyastomapañcāhā ityukte pṛṣṭhyastomapañcāhā iti pratīyeran tadyathaiva pṛṣṭhyastomasya dāsarātrikānyahāni prakṛtirevamabhiplavasyāpi tānyeva prakṛtiḥ tasmādanādeśe prakṛtipratyayāditi ubhayatrāyaṃ samohetuḥ ubhāvetau ṣaḍahāvabhiplavapṛṣṭhyastomau vikṛtī tasmādubhayordaśāhikaḥ ṣaḍahaḥ prakṛtiḥ atha yaduktaṃ viśvajidanvavāyādityatra brūmaḥ nātra pṛṣṭhānāṃ vilopoyadarthaṃ viśvajidanvavaitīti atra hi daśarātraprayogo vakṣyate tatprayogādeva pṛṣṭhānāmavilopaḥ na cāpi pṛṣṭhārthena viśvajidāgacchati viṣuvadarthenāgacchati atra viśvajit tato ayamapi samohetuḥ atha yaduktaṃ nānā brahmasāmatvādatra brūmaḥ nātra nānābrahmasāmānīti anityārthavādaḥ apūrvameva nānā brahmasāmatvaṃ vidhīyate nityānuvādavadvidhānāni dṛśyante yathā rathantaraṃ bhavati cārkṣaṃ cāsmai daṇḍaṃ prayacchanvācayediti atha yaduktaṃ pṛṣṭhyataḥ ṣaṣṭhasyālopavacanāditi atrāpyucyate yathaiva pṛṣṭyastomasya bṛhadrathantarapṛṣṭhasya sataḥ ṣaṣṭhamaharlupyate evamevābhiplavasthāpi tasmāt samānolopaḥ ṣaḍahatantre atha yaduktaṃ jyotirgaurāyurityanādeśādityatra brūmaḥ yatra hyasya pṛṣṭhyastomapañcāhā iṣṭāḥ tatrāpyādiśatyeva yathā pṛṣṭhyasya na labdhiḥ abhyāsaṅgyaḥ pañcāha iti yathā dvitīye navarātre daśarātre chando bhavati tadyathaivātra jyotirgaurāyurityanādeśe iti evaṃ pṛṣṭhyastome'pyanādeśa iti yaduktaṃ trivṛtā prayanti trivṛtodyantīti cāheti atra brūmaḥ ayaṃ trivṛchandaḥ na kevalaṃ stomavācīti tritvañcāpekṣya bhavati yathā agninā pṛthivyauṣadhibhistenāyaṃ lokastrivṛt tathā agne vivasvaduṣasa iti sandhinā stuyurityadhikṛtya trikaṃ stomaṃ vidhāyāha prāṇāvai trivṛtstomānāmiti evamayaṃ trivṛcchandastrivṛtā prayanti trivṛtodyantīti uttame ca trayastriṃśadrātre tritvamiha samākhyābhipravarttate trivṛtā prayanti trivṛtodyantīti purastāttrayaḥ pañcāhāstraya upariṣṭāditi tasmādayamapi heturubhayatra samaḥ ata ete hetavaḥ samīkṛtāḥ pratyuktāḥ svapakṣamidānīṃ sthāpayiṣyāmaḥ