Texts

pra mandine pitumad arcatā vaco yaḥ kṛṣṇagarbhā nirahann ṛjiśvanā / (1.1) Par.?

avasyavo vṛṣaṇaṃ vajradakṣiṇam marutvantaṃ sakhyāya havāmahe // (1.2) Par.?

yo vyaṃsaṃ jāhṛṣāṇena manyunā yaḥ śambaraṃ yo ahan piprum avratam / (2.1) Par.?

indro yaḥ śuṣṇam aśuṣaṃ ny āvṛṇaṅ marutvantaṃ sakhyāya havāmahe // (2.2) Par.?

yasya dyāvāpṛthivī pauṃsyam mahad yasya vrate varuṇo yasya sūryaḥ / (3.1) Par.?

yasyendrasya sindhavaḥ saścati vratam marutvantaṃ sakhyāya havāmahe // (3.2) Par.?

yo aśvānāṃ yo gavāṃ gopatir vaśī ya āritaḥ karmaṇi karmaṇi sthiraḥ / (4.1) Par.?

vīﾱoś cid indro yo asunvato vadho marutvantaṃ sakhyāya havāmahe // (4.2) Par.?

yo viśvasya jagataḥ prāṇatas patir yo brahmaṇe prathamo gā avindat / (5.1) Par.?

indro yo dasyūṃr adharāṁ avātiran marutvantaṃ sakhyāya havāmahe // (5.2) Par.?

yaḥ śūrebhir havyo yaś ca bhīrubhir yo dhāvadbhir hūyate yaś ca jigyubhiḥ / (6.1) Par.?

indraṃ yaṃ viśvā bhuvanābhi saṃdadhur marutvantaṃ sakhyāya havāmahe // (6.2) Par.?

rudrāṇām eti pradiśā vicakṣaṇo rudrebhir yoṣā tanute pṛthu jrayaḥ / (7.1) Par.?

indram manīṣā abhy arcati śrutam marutvantaṃ sakhyāya havāmahe // (7.2) Par.?

yad vā marutvaḥ parame sadhasthe yad vāvame vṛjane mādayāse / (8.1) Par.?

ata ā yāhy adhvaraṃ no acchā tvāyā haviś cakṛmā satyarādhaḥ // (8.2) Par.?

tvāyendra somaṃ suṣumā sudakṣa tvāyā haviś cakṛmā brahmavāhaḥ / (9.1) Par.?

adhā niyutvaḥ sagaṇo marudbhir asmin yajñe barhiṣi mādayasva // (9.2) Par.?

mādayasva haribhir ye ta indra vi ṣyasva śipre vi sṛjasva dhene / (10.1) Par.?

ā tvā suśipra harayo vahantūśan havyāni prati no juṣasva // (10.2) Par.?

marutstotrasya vṛjanasya gopā vayam indreṇa sanuyāma vājam / (11.1) Par.?

tan no mitro varuṇo māmahantām aditiḥ sindhuḥ pṛthivī uta dyauḥ // (11.2) Par.?