Texts

ā yātv indraḥ svapatir madāya yo dharmaṇā tūtujānas tuviṣmān / (1.1) Par.?

pratvakṣāṇo ati viśvā sahāṃsy apāreṇa mahatā vṛṣṇyena // (1.2) Par.?

suṣṭhāmā rathaḥ suyamā harī te mimyakṣa vajro nṛpate gabhastau / (2.1) Par.?

śībhaṃ rājan supathā yāhy arvāṅ vardhāma te papuṣo vṛṣṇyāni // (2.2) Par.?

endravāho nṛpatiṃ vajrabāhum ugram ugrāsas taviṣāsa enam / (3.1) Par.?

pratvakṣasaṃ vṛṣabhaṃ satyaśuṣmam em asmatrā sadhamādo vahantu // (3.2) Par.?

evā patiṃ droṇasācaṃ sacetasam ūrja skambhaṃ dharuṇa ā vṛṣāyase / (4.1) Par.?

ojaḥ kṛṣva saṃ gṛbhāya tve apy aso yathā kenipānām ino vṛdhe // (4.2) Par.?

gamann asme vasūny ā hi śaṃsiṣaṃ svāśiṣam bharam ā yāhi sominaḥ / (5.1) Par.?

tvam īśiṣe sāsminn ā satsi barhiṣy anādhṛṣyā tava pātrāṇi dharmaṇā // (5.2) Par.?

pṛthak prāyan prathamā devahūtayo 'kṛṇvata śravasyāni duṣṭarā / (6.1) Par.?

na ye śekur yajñiyāṃ nāvam āruham īrmaiva te ny aviśanta kepayaḥ // (6.2) Par.?

evaivāpāg apare santu dūḍhyo 'śvā yeṣāṃ duryuja ā yuyujre / (7.1) Par.?

itthā ye prāg upare santi dāvane purūṇi yatra vayunāni bhojanā // (7.2) Par.?

girīṃr ajrān rejamānāṁ adhārayad dyauḥ krandad antarikṣāṇi kopayat / (8.1) Par.?

samīcīne dhiṣaṇe vi ṣkabhāyati vṛṣṇaḥ pītvā mada ukthāni śaṃsati // (8.2) Par.?

imam bibharmi sukṛtaṃ te aṅkuśaṃ yenārujāsi maghavañchaphārujaḥ / (9.1) Par.?

asmin su te savane astv okyaṃ suta iṣṭau maghavan bodhy ābhagaḥ // (9.2) Par.?

gobhiṣ ṭaremāmatiṃ durevāṃ yavena kṣudham puruhūta viśvām / (10.1) Par.?

vayaṃ rājabhiḥ prathamā dhanāny asmākena vṛjanenā jayema // (10.2) Par.?

bṛhaspatir naḥ pari pātu paścād utottarasmād adharād aghāyoḥ / (11.1) Par.?

indraḥ purastād uta madhyato naḥ sakhā sakhibhyo varivaḥ kṛṇotu // (11.2) Par.?