Texts

anumānaṃ dvividhā // (1) Par.?

svārthaṃ parārthaṃ ca // (2) Par.?

tatra svārthaṃ trirūpāl liṅgād yad anumeye jñānaṃ tad anumānam // (3) Par.?

pramāṇaphalavyavasthā atra api pratyakṣavat // (4) Par.?

trairūpyaṃ punar liṅgasya anumeye sattvam eva sapakṣa eva sattvam asapakṣe ca asattvam eva niścitam // (5) Par.?

anumeyo 'tra jijñāsitaviśeṣo dharmī // (6) Par.?

sādhyadharmasāmānyena samāno 'rthaḥ sapakṣaḥ // (7) Par.?

na sapakṣo 'sapakṣaḥ // (8) Par.?

tato 'nyas tadviruddhas tadabhāvaś ceti // (9) Par.?

trirūpāṇi ca trīṇy eva liṅgāni // (10) Par.?

anupalabdhiḥ svabhāvaḥ kāryaṃ ceti // (11) Par.?

tatrānupalabdhir yathā na pradeśaviśeṣe kvacid ghaṭaḥ upalabdhilakṣaṇaprāptasya anupalabdher iti // (12) Par.?

upalabdhilakṣaṇaprāptir upalambhapratyayāntarasākalyaṃ svabhāvaviśeṣaś ca // (13) Par.?

yaḥ svabhāvaḥ satsv anyeṣu upalambhapratyayeṣu san pratyakṣa eva bhavati sa svabhāvaviśeṣaḥ // (14) Par.?

svabhāvaḥ svasattāmātrabhāvini sādhyadharme hetuḥ // (15) Par.?

yathā vṛkṣo ayaṃ śiṃśapātvād iti // (16) Par.?

kāryaṃ yathā vahnir atra dhūmād iti // (17) Par.?

atra dvau vastusādhanau ekaḥ pratiṣedhahetuḥ // (18) Par.?

svabhāvapratibandhe hi saty artho arthaṃ gamayet // (19) Par.?

tadapratibaddhasya tadavyabhicāraniyamābhāvāt // (20) Par.?

sa ca pratibandhaḥ sādhye arthe liṅgasya // (21) Par.?

vastutas tādātmyāt tadutpatteś ca // (22) Par.?

atadsvabhāvasya atadutpatteś ca tatra apratibaddhasvabhāvatvāt // (23) Par.?

te ca tādātmyatadupattī svabhāvakāryayor eva iti tābhyām eva vastusiddhiḥ // (24) Par.?

pratiṣedhasiddhir api yathoktāyā eva anupalabdheḥ // (25) Par.?

sati vastuni tasyā asambhavāt // (26) Par.?

anyathā ca anupalabdhilakṣaṇaprāpteṣu deśakālasvabhāvaviprakṛṣṭeṣv artheṣv ātmapratyakṣanivṛtter abhāvaniścayābhāvāt // (27) Par.?

amūḍhasmṛtisaṃskārasya atītasya vartamānasya ca pratipattṛpratyakṣasya nivṛttir abhāvavyavahārapravartanī // (28) Par.?

tasyā eva abhāvaniścayāt // (29) Par.?

sā ca prayogabhedād ekadaśaprakārā // (30) Par.?

svabhāvānupalabdhir yathā na atra dhūma upalabdhilakṣaṇaprāptasya anupalabdhir iti // (31) Par.?

kāryānupalabdhir yathā na iha apratibaddhasāmarthyāni dhūmakāraṇāni santi dhūmābhāvād iti // (32) Par.?

vyāpakānupalabdhir yathā na atra śiṃśapā vṛkṣābhāvād iti // (33) Par.?

svabhāvaviruddhaupalabdhir yathā na atra śītasparśo vahner iti // (34) Par.?

viruddhakāryaupalabdhir yathā na atra śītasparśo dhūmād iti // (35) Par.?

viruddhavyāptaupalabdhir yathā na dhūmabhāvī bhūtasya api bhāvasya vināśaḥ hetvantarāpekṣaṇād iti // (36) Par.?

kāryaviruddhaupalabdhir yathā na iha apratibaddhasāmarthyāni śītakāraṇāni santi vahner iti // (37) Par.?

vyāpakaviruddhaupalabdhir yathā na atra tuṣārasparśo vahner iti // (38) Par.?

kāraṇānupalabdhir yathā na atra dhūmo vahnyabhāvād iti // (39) Par.?

kāraṇaviruddhaupalabdhir yathā na asya romaharṣādiviśeṣāḥ saṃnihitadahanaviśeṣatvād iti // (40) Par.?

kāraṇaviruddhakāryaupalabdhir yathā na romaharṣādiviśeṣayuktapuruṣavān ayaṃ pradeśaḥ dhūmād iti // (41) Par.?

ime sarve kāryānupalabdhyādayo daśānupalabdhiprayogāḥ svabhāvānupalabdhau saṃgraham upayānti // (42) Par.?

pāraṃparyeṇa arthāntaravidhipratiṣedhāyāṃ prayogabhede api // (43) Par.?

prayogadarśanābhyāsāt svayam apy evaṃ vyavacchedapratītir bhavati iti svārthe apy anumāne asyāḥ prayoganirdeśaḥ // (44) Par.?

sarvatra ca asyām abhāvavyavahārasādhanyām anupalabdhau yeṣāṃ svabhāvaviruddhādīnām upalabdhyā kāraṇādīnām anupalabdhyā ca pratiṣedha uktas teṣām upalabdhilakṣaṇaprāptānām // (45) Par.?

eva upalabdhir anupalabdhiś ca veditavyā // (46) Par.?

anyeṣāṃ virodhakāryakāraṇabhāvasiddheḥ // (47) Par.?

pramāṇanivṛttav apy arthābhāvāsiddher iti // (48) Par.?